Read luo Kwan 23 Bible Online

Kwan 23 - luo bible

Kwan 23

¹Eka Balam nowacho ni Balak niya, “Gerna kende abiriyo mag misango ka, kendo kelna ruedhi abiriyo gi imbe abiriyo.”

²Balak notimo kamano, mochiwo rwath achiel gi im achiel e kendo ka kendo mar misango.

³Eka nowachoni Balaam niya,

⁴“Aseloso kende abiriyo mag misango kendo asechiwo rwath achiel gi im achiel e kendo ka kendo.” Balaam nowacho ni Balak niya, “Chung’ e bath misango misechiwo to an iweya adhi kenda. Kamoro dipo ka Ruoth Nyasaye ofwenyorena, kendo gimoro amora mowachona abiro nyisi.” Kamano nowuok modhi, kendo Nyasaye nofwenyorene

⁵monyise weche ma onego owachi, kowachone niya, “Dog ir Balak, kendo iwachne mana kaka anyisi.”

⁶Omiyo nodok moyudo Balak kochung’ e bath misango mane osechiwo, kaachiel gi jodong Moab duto.

⁷Eka ne Balaam ohulo wach moa kuom Nyasaye kama: “Balak ruodh Moab oseoma Aram piny gode man wuok chieng’ kowachona niya, ‘Bi mondo ikuong’na joka Jakobo! Bi ikwer jo-Israel.’

⁸To ere kaka dakwong’ joma Nyasaye ok osekuong’o? Ere kaka dakwer joma Ruoth Nyasaye ok osekwero?

⁹Anenogi kachung’ ewi lwendni maboyo, kendo arangogi gi ewi gode. Aneno oganda modak kar kende, ma ok oseriwore gi ogendni mamoko.

¹⁰Ere ng’ama nyalo kwano oganda joka Jakobo, kata manyalo riwo kar romb jo-Israel? Weuru atho kaka joma kare tho, kendo abed achiel kodgi.”

¹¹Bang’ mano Balak nowacho ni Balaam niya, “Mano to ang’o misetimono? Ne aluongi mondo ikuong’na wasika, to in koro isemana guedhogi!”

¹²To Balaam nodwoke niya, “Donge nyaka awach mana gima Ruoth Nyasaye osenyisa?”

¹³Eka Balak nowachone niya, “Bi mondo ateri kamoro machielo ma inyalo nenogo mana bath jo-Israel konchiel, to ok giduto, mondo ikuong’nagi kanyo.”

¹⁴Kamano ne otero Balaam e paw Zofim ewi got Pisga, kendo nogeroe kende abiriyo mag misango, mi ochiwoe rwath achiel gi im achiel e kendo ka kendo.

¹⁵Eka ne Balaam owacho ni Balak niya, “Chung’ but misango misechiwo, an to adhi romo gi Nyasaye kucha.”

¹⁶Ruoth Nyasaye nofwenyore ni Balaam monyise gima onego owachi kowachone niya, “Dog ir Balak kendo iwach mana kaka anyisi.”

¹⁷Omiyo nodok, moyudo ka Balak ochung’ e bath misangone kaachiel gi jodong Moab. Balak nopenjo gima Ruoth Nyasaye owacho.

¹⁸Mi Balaam nohulo wach moa kuom Nyasaye kama: “Balak a malo mondo iwinj! Ruodh Zipor winji gima onyisa mondo awachi!

¹⁹Nyasaye ok en dhano ma doriambi. Ooyo, ok en dhano ma dolokre. Osewuoyo, to donge obiro timo kaka owacho? Adier, obiro chopo gima osehulo.

²⁰Osechika mondo achiw gueth, omiyo abiro chiwo gueth, to ok anyal loko guethno.

²¹Onge ketho moseyudo kuom joka Jakobo. Ooyo, onge richo moseneno kuom jo-Israel. Ruoth Nyasaye ma Nyasachgi ni kodgi en ema giyie ni en e Ruodhgi.

²²Nyasaye, ma nogologi e piny Misri, tekone chalonigi gi teko jowi.

²³Tim ajuoke onge kuom joka Jakobo, adier, timbe ndagla onge kuom jo-Israel. Koro ma e sa monego wanyisie joka Jakobo ma jo-Israel niya, ‘Neyeuru gima Nyasaye osetimonu!’

²⁴Ogandagi chalo gi sibuor ma dhako mokichore, kendo ojuol ka sibuor ma dichwo. Ok onyal nindo piny, ka pok ochamo gima onego momadho rembe.”

²⁵Eka Balak nowacho ni Balaam niya, “Ka ok idwar kuong’ogi, to kara ber mondo kik iguedhgi bende.”

²⁶To Balaam nodwoke niya, “Donge ne anyisi ni nyaka atim gik moko duto ma Ruoth Nyasaye ochika?”

²⁷Balak nowachone niya, “Bi mondo ateri kamoro machielo, dipo ka Nyasaye oyie, mi ikuong’onagi kanyo.”

²⁸Kamano notero Balaam ewi got Peor, momanyore gi Jeshimon.

²⁹Eka Balam ne onyise mondo olosne kende abiriyo mag misango kanyo, kendo ochiw ruedhi abiriyo kod imbe abiriyo.

³⁰Balak notimo kaka ne Balam onyise mi ochiwo rwath achiel gi im achiel e kendo ka kendo.