Read luo Kwan 25 Bible Online

Kwan 25 - luo bible

Kwan 25

¹Kane jo-Israel ni Shitim, ne gichako terore gi nyi Moab,

²mane luongogi e sep misengni mane gitimo ni nyisechegi. Ne gidhi, mi gichamo chiemogo, kendo gilamo nyiseche jo-Moab.

³Kane jo-Israel ochako lamo Baal-peor kamano, Ruoth Nyasaye nokecho kodgi.

⁴Mowacho ni Musa niya, “Ter jotend oganda ewi got idhir olwar piny, mondo otho e nyima odiechieng’ alanga, mondo mirimba mager oa kuom jo-Israel.”

⁵Omiyo Musa nowacho ni jong’ad bura mag Israel niya, “Ng’ato ka ng’ato kuomu nyaka neg joge moselamo Baal-peor.”

⁶Noyudo ja-Israel moro okelo nyar Midian e hembe ratiro ka Musa kod oganda duto neno, ka noyudo giywak e dho Hemb Romo.

⁷Kane Finehas wuod Eleazar ma wuod Harun jadolo onene, nowuok e oganda mokawo tong’,

⁸kendo odonjogo e ot ma iye, kodwaro ja-Israelno. Nochwowe gi tong’ moriwe kaachiel gi nyakono. Eka tho mane oyudo ogoyo jo-Israel orumo.

⁹To noyudo ka thono osenego ji piero ariyo gang’wen.

¹⁰Ruoth Nyasaye nowacho ni Musa niya,

¹¹“Finehas wuod Eleazar ma wuod Harun jadolo osemiyo mirima mane an go gi jo-Israel orumo, nikech mirima mosemake kodgi chal gi mara. Mano emomiyo kata obedo ni ne an gi nyiego kod jo-Israel nikech aherogi ahinya, to ne ok atiekogi.

¹²Dhi iwach ni Finehas ni asingorane ni obiro bedo jadolo nyaka chieng’.

¹³Asingorane, en kaachiel gi nyikwaye ni ginibed jodolo nyaka chieng’ nikech osebedo gi mirima ma nyiso ni ohero Nyasache, mi opwodho jo-Israel kuom richogi.”

¹⁴Ja-Israel mane onegi kaachiel gi nyar Midian niluongo ni Zimri wuod Salu ma jatend dhoot achiel kuom dhout jo-Simeon.

¹⁵To nyar Midian ma ne onegno nyinge ne Kozbi nyar Zur, ma ne jatend dhout Midian moko.

¹⁶Ruoth Nyasaye nowacho ni Musa niya,

¹⁷“Sanduru jo-Midian, kendo uneggi,

¹⁸nikech ne githagou gi timbegi mag amara mane gitimo Peor, kendo kuom wach Kozbi ma nyargi, ma nyar jatend Midian, mane oneg ndalo mane yamb tho obiro nikech gima notimore Peor.”