Read luo Kwan 27 Bible Online

Kwan 27 - luo bible

Kwan 27

¹Bang’ kweno, nyi Zelofehad nobiro. Zelofehad ne wuod Hefer ma wuod Gilead ma wuod Makir ma wuod Manase ma wuod Josef. Nying nyirigo ne Mala gi Noa gi Hogla gi Milka kod Tirza.

²Ne gibiro e dho Hema Miromoe gi Nyasaye e nyim Musa gi Eleazar jadolo kaachiel gi jodongo kod oganda duto, mi giwacho niya,

³“Wuonwa ne otho e thim, to ne ok en achiel gi jo-Korah mane piem gi Ruoth Nyasaye. Ne otho athoya kuom richone owuon, kendo noonge gi yawuowi.

⁴Koro ere gimomiyo nying wuonwa dilal e dhoodgi mana nikech oonge gi wuowi? Pognwa lowo mana kaka ipogo ni omine wuonwa.”

⁵Kuom mano Musa notero wachgi e nyim Ruoth Nyasaye,

⁶mi Ruoth Nyasaye nowachone niya,

⁷ “Gima nyi Zelofehad dwaro ni kare. Nyaka ipognigi lowo mana kaka ipogo ni omine wuon-gi.

⁸To wach ni jo-Israel ni ka ng’ato otho maonge wuowi, to mwandune nyaka dong’ ni nyare.

⁹Ka oonge gi nyako, to mwandune nyaka dong’ ni owetene.

¹⁰To ka oonge gi owetene, to mwandune dong’ ni omine wuon-gi.

¹¹Ka wuon onge gi ominene, to mwandune dong’ ni watne moro machiegni, kendo ng’atno ema kawo. Wachni nobed chik ni jo-Israel.” Mano e kaka Ruoth Nyasaye nochiko Musa.

¹² Ruoth Nyasaye nowacho ni Musa niya, “Idh got Abarim, mondo ine piny masemiyo jo-Israel.

¹³Ka isenene, to ibiro tho miluw kwereni, mana kaka Harun owadu notho,

¹⁴nikech nutamoru rito chikna kane oganda jo-Israel piem koda e sokni manie thim Zin, kendo ne ok unyiso oganda ni an Ng’ama Ler.” (Mago e sokni mag Meriba man but Kadesh e thim Zin.)

¹⁵Bang’e Musa nowacho niya,,

¹⁶“A Ruoth Nyasaye ma Nyasach ngima, yier jatelo ni ogandani,

¹⁷ mondo otel nigi e gik moko duto ma gitimo, kendo oritgi ka giwuok kendo ka giduogo dala, mondo oganda Ruoth Nyasaye kik bed ka rombe maonge jakwath.”

¹⁸ Ruoth Nyasaye nodwoko Musa niya, “Kaw Joshua wuod Nun, ng’at ma teko ni kuome, mondo iket lweti kuome,

¹⁹kendo ikete e nyim Eleazar jadolo gi oganda duto. Miye chik e nyimgi,

²⁰kendo imiye tekoni moko mondo oganda jo-Israel duto oluore.

²¹ Enobed kodhi ir Eleazar jadolo ma nobed ka goyone ombulu miluongo ni Urim, mondo ong’ego gima Ruoth Nyasaye dwaro. Oganda jo-Israel, kaachiel gi Joshua, nowuog oko kendo noduog dala, mana kaka Eleazar ochikogi.”

²²Musa notimo kaka Ruoth Nyasaye nochike. Nokawo Joshua moketo e nyim Eleazar jadolo gi oganda duto,

²³ moyieyo lwete kuome, kendo omiye chik kaka Ruoth Nyasaye nosechike.