Read luo Kwan 34 Bible Online

Kwan 34 - luo bible

Kwan 34

¹Ruoth Nyasaye nowacho ni Musa

²mondo onyis jo-Israel niya, “Koro uchiegni donjo e piny Kanaan, momiu mondo obed mwandu nyaka chieng’. En piny Kanaanno duto, ma tong’ne chalo kama:

³pinyu man yo milambo nochakre e thim Zin manie tong’ piny Edom. Tong’u ma yo milambo mogik yo wuok chieng’ nobed giko mar nam Kado.

⁴Eka kochopo yo milambo mar pith Akrabim, too nogom mokadh Zin, kendo gikone ma yo milambo nobed Kadesh-barnea. Eka nochom Hazar, mochop Azmon,

⁵kendo nogom kochomo aora manie tong’ piny Misri, mi nogik e Nam Mediterenia.

⁶“Tong’u ma yo podho chieng’ to nobed Nam Mediterenia, gi dho namno. Mano ema nobed tong’u ma yo podho chieng’.

⁷“To tong’u ma yo nyandwat nobed koa e Nam Mediterenia kochomo got Hor tir,

⁸kendo koa got Hor, nochom kama idonjogo Hamath, mi nogik Zadad.

⁹Eka noa kanyo kochomo Zifron, mi nodhi ogik Hazer-enan. Mano ema nobed tong’u ma yo nyandwat.

¹⁰“Tong’u ma yo wuok chieng’ noa Hazar-enan kochomo Shefam tir.

¹¹Bang’e noridre koa Shefam nyaka Ribla yo wuok chieng’ mar Ain, molor nyaka gode man yo wuok chieng’ mar Nam Galili.

¹²Eka nomed lor nyaka aora Jordan, mi ogik e Nam kado. Kamano piny duto ma tong’go olworo nobed maru.”

¹³ Bang’e Musa nochiko jo-Israel kama: “Mano e piny ma ubiro pogo gi ombulu, mondo dhoot ka dhoot oyud lope. En piny ma Ruoth Nyasaye osechiko ni mondo omi dhoudi ochiko gi nus,

¹⁴nikech jo-Reuben gi jo-Gad kod nus jo-Manase oseyudo pinygi, dhoot ka dhoot.

¹⁵Dhoudi ariyo gi nusgo oseyudo pinygi loka aora Jordan koni, yo wuok chieng’ mar Jeriko.”

¹⁶Eka Ruoth Nyasaye nowacho ni Musa niya,

¹⁷“Joma biro konyi pogo pinyno e magi: Eleazar jadolo kod Joshua wuod Nun.

¹⁸To bende nyaka ikaw jotend dhoot ka dhoot mondo okonyi e tijno,

¹⁹kendo magi e nyinggi: E dhood jo-Juda en Kaleb wuod Jefune.

²⁰E dhood jo-Simeom en Samuel wuod Amihud,

²¹to e dhood jo-Benjamin en Elidad wuod Kislon.

²²E dhood jo-Dan to jatelo nobed Buki wuod Jogli.

²³Kuom joka Josef, jatend dhood Manase nobed Haniel wuod Efod,

²⁴to jatend dhood Efraim nobed Kemuel wuod Shiftan.

²⁵E dhood jo-Zebulun to jatelo nobed Elizafan wuod Parnak,

²⁶to e dhood jo-Isakar jatelo nobed Paltiel wuod Azan.

²⁷E dhood jo-asher, jatelo nobed Ahihud wuod Shelomi,

²⁸to e dhood jo-Naftali, jatelo nobed Pedahel wuod Amihud.”

²⁹Mago e joma ne Ruoth Nyasaye oyiero mondo opog ni jo-Israel lowo e piny Kanaan.