Read luo Kwan 35 Bible Online

Kwan 35 - luo bible

Kwan 35

¹ Ruoth Nyasaye nowuoyo gi Musa e piny Moab mamwalo but aora Jordan kama omanyore gi Jeriko, mowacho niya,

²“Nyis jo-Israel mondo oyier miechgi moko, kaachiel gi lowo molworogi, mondo omi jo-Lawi odagie.

³Ginidag e miergo, kendo jambgi nokwa e legegi.

⁴Lach mar lowo mumiyo jo-Lawi, chakre e ohinga mar dala ka dala, kadhi nyime noromo mita mia abich kuonde duto koni gi koni.

⁵Kamano bor tong’ man yo wuok chieng’ nobed mita alufu achiel, gi man yo milambo gi man yo podho chieng’ kod man yo nyandwat, duto mita alufu achiel achiel maromre. To dala nobed e dier lowono tir. Lowo molworo dala ka dala nobed lek ma joma odak e dalano kwayoe jambgi.

⁶“Ka umiyo jo-Lawi miechgi, to auchiel kuomgi nobed miech tony, ma joma oneko nyalo pondoe. To bende unumigi mier piero ang’wen gariyo mamoko.

⁷Kamano kar romb mier monego umi jo-Lawi, kaachiel gi legegi, gin piero ang’wen gaboro.

⁸Ka uyiero miergo e piny jo-Israel duto, to ukaw mier mang’eny kuom dhoudi matindo. Dhoot ka dhoot nomi jo-Lawi mier maromre gi lowo mane opogne.”

⁹ Ruoth Nyasaye nowacho ni Musa

¹⁰mondo onyis jo-Israel niya, “Kuseng’ado aora Jordan, mudonjo e piny Kanaan,

¹¹to yieruru mier moko mondo obed kuonde ma ma ng’at moneko kobothne nyalo tonyie.

¹²Miergo nobed miech tony, ma ng’at moneko nyalo tonyie koringo ng’at madwaro chulone kuor, mondo kik nege kapok oyale e nyim oganda.

¹³Ginibed mier auchiel moyier kaka miech tony,

¹⁴ka adek ni yo wuok chieng’ mar aora Jordan, to adek nie piny Kanaan.

¹⁵Mier auchielgo nobed kuonde tony, ma ka ng’ato oboth monego nyawadgi, to onyalo tonyie, bed ni en ja-Israel kata wendo kata japiny moro modak kuomu.

¹⁶“Ka ng’ato ogoyo wadgi gi gima olos gi nyinyo, mi otho, to ng’at mogoyeno doko janek, omiyo nyaka nege.

¹⁷Ka ng’ato nigi kidi e lwete ma nyalo nego ng’ato, mi ogoyogo wadgi, motho, to en janek, kendo nyaka nege.

¹⁸Kata ka ng’ato nigi gimoro molos gi yien e lwete manyalo neko, mi ogoyogo wadgi motho, to en janek, omiyo nyaka nege.

¹⁹Owadgi ng’at monegno nyaka neg janekno koyudo mondo ochulne kuor.

²⁰Ka ng’ato odhiro wadgi goyiem, kata ka odiro gimoro mogoye,

²¹kata kogoye adhong’, motho, to nyaka nege, nikech en janek. Owadgi ng’at monegno nyaka neg janekno, koyudo.

²²“Kapo ni odhiro wadgi ma ok gimonrego, kata ka ochiele gi gimoro ka ok en gi paro mar goye,

²³kata ka oboth, mobolo kuome kidi manyalo neko ka ok onene, mi otho, kendo ka en adier ni ok gimonre, kendo ne ok odwar hinye,

²⁴to oganda nyaka yal wachno e kind janek gi owadgi ng’at monegi, kaluwore gi chikegi eki.

²⁵Oganda nyaka kony janekno kuom kuor ma owadgi ng’at monegi dochulone, mi gidwoke e dala tony, kuma ne otonyie mokwongo. Enobed kuno nyaka jadolo maduong’ tho.

²⁶To kapo ni chieng’ moro janekno okadho tong’ mar dala tony,

²⁷mi owadgi ng’at mane onego cha oyude monege, to owadgi ng’at mane onegono onge gi ketho.

²⁸Janek nyaka sik mana e dala tony nyaka jadolo maduong’ tho. Ka jadolo maduong’ osetho, to eka onyalo dok thurgi.

²⁹Mago nobednu chik mochwere, kamoro amora mudakie.

³⁰ “Ng’at moneko nyaka ng’adne buch tho mana kuom dho joneno. To wach janeno achiel kende ok oromo ng’ado ni ng’ato buch tho.

³¹Kik uyie janek mong’adne buch tho warre, to nyaka nege.

³²Bende kik uyie ng’at mopondo e dala tony warre mi dog dag e dala, kapok jadolo maduong’ otho.

³³Kik uketh pinyu gi remo kamano, nikech remo ketho piny, kendo pinyu ok nyal pwodhore kuom gak mar remo mochuer, mak mana ka opwodhe gi remb ng’at mane ochuero remono.

³⁴Kik uchid pinyu mudakie, kendo ma an bende adakie, nimar an Ruoth nyasaye adak e kind jo-Israel.”