Read luo Kwan 36 Bible Online

Kwan 36 - luo bible

Kwan 36

¹Jodong dhout Gilead wuod Makir ma wuod Manase ma achiel kuom dhout Josef, nodhi ir Musa gi jotend oganda kod jodong dhout Israel,

² mowacho niya, “Jaduong’, Ruoth Nyasaye nochiki mondo ipog ni jo-Israel lowo gi ombulu, to bende nochiki mondo ipog lowo ma dine owadwa Zelofehad oyudo ni nyige.

³To kapo ni moro kuom nyirigo okendi e dhood ja-Israel moro, to lowo mopogne biro lal kuom lop kwerewa, mi nomiye dhoot ma okendie nyakono. Kamano lopwano dilal.

⁴Ka higa mar mor ochopo e piny Israel, to lowono nomi dhoot mokendie nyakono, mi nolal chuth kuom lop kwerewa.”

⁵Kane Musa oseng’eyo gima Ruoth Nyasaye dwaro, nonyiso jo-Israel niya,

⁶“Joka Josef ni kare, kendo kama e kaka Ruoth Nyasaye osechiko kuom wach nyi Zelofehad. Ginyalo tedo ni ng’ato ang’ata ma gihero, mak mana ni nyaka bed ni okendgi e dhoodgi.

⁷Onge lop ja-Israel moro amora ma nowuog e dhoodgi, kimiyo dhoot machielo, to ng’ato ka ng’ato e Israel nyaka sik mana gi lop wuon mare.

⁸Nyar Israel moro amora ma opogne lop wuon mare nyaka kendi mana e dhoodgi. Kamano ng’ato ka ng’ato e Israel nosik e lop kwerene.

⁹Onge lowo ma noa e dhoot moro kimiyo dhoot machielo, to dhoot ka dhoot nosik gi lope.”

¹⁰Kuom mano, Mala gi Tirza gi Hogla gi Milka kod Noa, ma nyi Zelofehad, notimo kaka Ruoth Nyasaye nochiko Musa, mi gitedo mana ni yawuot omine wuon-gi.

¹²Nokendgi e dhood Manase ma wuod Josef, kendo lopgi nosik mana e dhood kweregi.

¹³Mago e chike mane Ruoth Nyasaye omiyo Musa onyiso jo-Israel e piny Moab mamwalo e bath aora Jordan kama omanyore gi Jeriko.