Read luo Kwan 4 Bible Online

Kwan 4 - luo bible

Kwan 4

¹Ruoth Nyasaye nowacho ni Musa gi Harun niya,

²“Kwanuru jo-Lawi ma joka Kohath e dhoutgi, kaluwore gi kweregi,

³kundiko nying joma hikgi nie kind piero adek gi piero abich, monego ti tich lemo e Hemb Romo.

⁴“Tich momi joka Kohath e Hemb Romo ma en tich maler moloyo, ema:

⁵Ka udaro kambiu, to Harun gi yawuote nyaka bi mi lor pasia mogeng’o Kama Ler moloyo, kendo giumgo Sandug Rapar.

⁶Eka giume gi piende monyong’, kendo giboye gi law mambulu. Bang’e girwakne ludhe miting’ego.

⁷Ginipedh law mambulu e mesa miketoe makati e nyim Nyasaye pile, kendo giniketie tewni gi tegni gi kikombe kod agwetni mitiyogo kitimo misengni nilo piny. Makati michiwo pile bende nyaka bed ewi mesano.

⁸Bang’ mano, nyaka gipedh law makwar ewi gigo, kendo gichak giumgi duto gi piende monyong’. Eka girwak ludhe miting’ego.

⁹Ginikaw law mambulu, giumgo rachung taya gi teyni mage, gi rangisni gi rajow, kod gik miting’ogo mor taya,

¹⁰ginibo rachung taya kod gige duto gi piende monyong’, kendo giniting’e koliero e luth.

¹¹Ginipedh law mambulu e mesa mar dhahabu kendo giniume gi piende monyong’. Bang’e ginirwakne ludhe miting’ego.

¹²Ginikaw gik moko duto mitiyogo e Kama Ler, mi giket e law mambulu, kendo giumgi gi piende monyong’, eka giniting’gi ka giliero e luth.

¹³Ginijow buru e kendo-mar-misango, mi gium kendono gi law maralik.

¹⁴Eka giniket kuome gik moko duto mitiyogo e tich dolo, kaka tep mach gi rachwow gi rajow gi tewni kod gik moko duto mag kendo mar misango. Giniume gi piende monyong’, kendo ginirwakne ludhe miting’ego.

¹⁵Pile ka kambi dar, to joka Kohath nyaka bi mondo oting’ Hema Maler kod gige duto. To kik gibi ka pok Harun gii yawuote otieko umogi, bende kik gimul gimoro amora maler, nono to githo. Mago duto gin gik Hemb Romo ma joka Kohath ema ting’o.

¹⁶Eleazer wuod Harun jadolo ema norit mor taya gi ubani mang’ue ng’ar, gi mor wir kod misango mar cham michiwo pile. Hema Maler gi gik moko duto manie iye, tiende ni Kama Ler kod gige, bende en ema noriti.”

¹⁷Ruoth Nyasaye nowacho ni Musa gi Harun niya,

¹⁸“Kik uwe dhood joka Kohath rum mi lal kuom jo-Lawi wetegi,

¹⁹to nyisgiuru ni ka gisudo machiegni gi gik maler, to gima onego tim mondo kik githo ema: Harun gi yawuote ema nyaka donji mondo omi ng’ato ka ng’ato tije kod gima onego ng’atno ting’

²⁰to joka Kohath kik donj, nikech dipo ka gigoyo wang’gi kuom gik maler, mi githo.”

²¹Ruoth Nyasaye nowacho ni Musa niya,

²²“Kwan joka Gershon e dhoutgi, kaluwore gi kweregi,

²³kindiko nying joma hikgi ni e kind piero adek kod piero abich, monego ti e Hemb Romo.

²⁴“Tije momigi kod gik ma onego giti e magi:

²⁵Giniting’ pasia mag Kama Ler kendo giniting’ Hemb Romo gi law miumego, kaachiel gi piende monyong’ moluow kuome, gi pasia mar dhood Hemb Romo,

²⁶gi rageng’ni mag laru gi mag pasia mar rangach midonjogo e laru mar aluora mar Hema maler gi aluora mar kendo-mar-misango gi tondegi kod gik moko duto mitiyogo. Gin ema omigi tich rito gigo.

²⁷Harun gi yawuote ema nochan tije duto mag joka Gershon, kod gik ma onego giting’.

²⁸Mano e tich momi joka Gershon e Hemb Romo. Ithamar wuod harun jadolo ema nobed jatendgi.

²⁹“Nyaka ikwan joka Merari e dhoutgi moluwore gi kweregi,

³⁰kindiko nying ji duto ma hikgi ni e kind piero adek gi piero abich, monego ti e Hemb Romo.

³¹“Gik ma onego giting’ kaka tichgi e Hemb Romo e magi: Frembe mag Hema Maler gi rariw mage gi sirni mage gi rachungi,

³²gi sirni mag laru molworo hema, gi rachungine gi loyegi gi tondegi kod gik moko duto mitiyogo kanyo. Nyaka pog ni ng’ato ka ng’ato gik ma onego giting’.

³³Mago e tije momi joka Merari e hemb Romo. Ithamar wuod Harun jadolo ema nobed jatendgi.”

³⁴Musa gi Harun kod jodong oganda jo-Israel nokwano joka Kohath e dhoutgi kaluwore gi kweregi,

³⁵ka gindiko nying ng’ato ka ng’ato ma hike ni e kind piero adek gi piero abich, moromo tiyo e Hemb Romo.

³⁶Kar rombgi kochan e dhoutgi ne alufu ariyo gi mia abiriyo gi piero abich.

³⁷Mano ne e kar romb joka Kohath mane tiyo e Hemb Romo. Musa gi Harun nokwanogi mana kaka ne Ruoth Nyasaye omiyo Musa onyisogi.

³⁸Joka Gershon ma hikgi ne ni e kind piero adek gi piero abich ma ne tiyo e Hemb Romoo nondik nyinggi kaluwore gi kweregi.

³⁹

⁴⁰Kar rombgi e dhoutgi kaluwore gi kweregi ne alufu ariyo gi mia auchiel gi piero adek.

⁴¹Mago e joka Gershon mane tiyo e tich Hemb Romo, kendo mane Musa gi Harun ondiko nyinggi kaka Ruoth Nyasaye nosechikogi.

⁴²Joka Merari ma hikgi ne ni e kind piero adek gi piero abich mane oromo tiyo e Hemb Romo ne ondik nyinggi e dhoutgi kaluwore ki kweregi.

⁴³

⁴⁴Kar rombgi e dhoutgi ne alufu adek gi mia ariyo.

⁴⁵Musa gi Harun nondiko nying joka Merarigo ka gichanogi e dhoutgi kaka Ruoth Nyasaye nomiyo Musa ochikogi.

⁴⁶Mano e kaka Musa gi Harun kod jodong Israel nondiko nying jo-Lawi duto e dhoutgi kaluwore gi kweregi.

⁴⁷Ne gin joma hikgi ni e kind piero adek gi piero abich mane tiyo tije mopogore opogore e Hemb Romo, kendo mane ting’oo gik Hemb Romo.

⁴⁸Kar rombgi duto ne alufu aboro gi mia abich kod piero aboro.

⁴⁹Musa nondiko nying ng’ato k a ng’ato kuomgi kaka ne Ruoth Nyasaye ochike, kaluwore gi tijegi kod gik mane onego giting’. Mano e kaka Ruoth Nyasaye nochiko Musa mondo otim.