Read luo Kwan 8 Bible Online

Kwan 8 - luo bible

Kwan 8

¹ Ruoth Nyasaye nowacho ni Musa

²mondo onyis Harun niya, “Ka iketo teyni abiriyo e rachungi, to cha-ngi mondo girieny ka gimenyo kanyim rachungi.”

³Omiyo Harun noketo teyni mondo orieny kamenyo kanyim rachungi mana kaka ne Nyasaye ochiko Musa.

⁴Kor rachungi kaachiel gi bedene kod thiepene ne othedhi gi dhahabu. Musa nolose mana machal gi kido mane Ruoth nyasaye onyise.

⁵Ruoth Nyasaye nochako owacho ni Musa niya,

⁶“Pog jo-Lawi kuom dhout Israel mamoko mondo ipwodhgi.

⁷To ma e kaka nipwodhgi: Kir kuomgi pi mapwodho richo. Nyaka giliel dendgi duto, kendo gilwok dendgi, mi gidok mopwodhore.

⁸Bang’ mano gikaw nyarwath mondo otimgo misango miwang’o pep. In to nikaw nyarwath machielo mondo otimgo misango mar golo richo.

⁹Eka nikel jo-Lawi e dho Hemb Romo michok oganda duto mar Israel kanyakla.

¹⁰Ka isekelo jo-Lawi e nyim Ruoth Nyasaye, to inimi jo-Israel ket lwetgi e wigi.

¹¹Bang’ mano Harun nochiw jo-Lawi e nyim Ruoth Nyasaye ka mich moyiedhi moa kuom jo-Israel, kendo nowalgi ni tich Ruoth Nyasaye.

¹²Jo-Lawi noket lwetgi ewi ruedhi kande. Rwath achiel notimgo misango mar golo richo, to machielo notimgo ni Ruoth Nyasaye misango miwang’o pep, mondo opwodhgo ni jo-Lawi richogi.

¹³Bang’e iniket jo-Lawi e nyim Harun gi yawuote kichiwogi ni Ruoth Nyasaye ka mich moyiedhi.

¹⁴Kamano iniwal jo-Lawi kuom dhout Israel mamoko, mi ginibed joga.

¹⁵“Ka isepwodho jo-Lawi kichiwogi ka mich moyiedhi kamano, to ginidonj e Hemb Romo mondo gitiye,

¹⁶nimar osewalgi chuth kuom jo-Israel duto. Asetimogi joga, ka akawogi kar nyithind Israel duto makayo,

¹⁷ nikech nyathi moro amora ma dichwo mokwong nywol e Israel en mara, bed ni en nyathi dhano kata nyathi chiayo. Chieng’ mane anegoe nyithindo makayo e piny Misri, nawalo nyithindo makayo duto e piny Israel mondo obed maga,

¹⁸to koro asekawo jo-Lawi kargi.

¹⁹Aseketo jo-Lawi e lwet Harun gi yawuote, ka joma owal kuom jo-Israel mondo oti tich lemo ni jo-Israel e Hemb Romo kendo opwodhnigi richogi, mono kik jo-Israel tho ka sudo machiegni gi Kama Ler.”

²⁰Musa gi Harun kaachiel gi jo-Isarel duto nochopo chike duto mane Nyasaye omiyo Musa kuom tich walo jo-Lawi.

²¹Jo-Lawi nopwodhre kuom richogi, kendo olwoko lepgi eka Harun nochiwogi e nyim Nyasaye ka mich moyiedhi kendo mitimogo misango mipwodgo richo mondo gibed maler.

²²Bang’e ne gidonjo e Hemb Romo mondo giti tich lemo e nyim Harun gi yawuote, kamano Musa notimo ni jo-Lawi mana kaka Ruoth Nyasaye noochike.

²³Ruoth Nyasaye nochako owacho ni Musa niya,

²⁴“Chik moketi ni jo-Lawi ma: Ka ja-Lawi oseromo higni piero ariyo gabich, to nochak tich e Hemb Romo.

²⁵To kosebedo jahigni piero abich, to nowe tich.

²⁶Onyalo konyo jowadgi kuom tich Hema, to ok nobed kotiyo tich mapile. Mano e kaka inichan tich jo-Lawi.”