Read luo Mika 2 Bible Online

Mika 2 - luo bible

Mika 2

¹Enobed marach manade ni joma riere e kitanda ka paro timo timbe maricho! Gichiew ka piny yawore mondo gitim richogo, nikech ging’eyo ni gin gi teko mar timo kamano.

²Ka gidwaro lop ng’ato, to gikawo akawa gi thwon. To kata ka gidwaro udi, to mago bende gikawo akawa. Gimayo ji kata mana utegi kaachiel gi mwandugi, mi giwegi nono.

³Omiyo Ruoth Nyasaye wacho niya, “Achano kelo masira kuomu, kendo enochal lodi e ng’utu ma ok unyal gonyo. Ok unuchak uwuothi ka uchung’ tir, nikech kindeno nobednu kinde marach.

⁴Ka kindeno ochopo, to ji nogou ngero, ka wero wend ywak niya, ‘Otiekwa chuth! Ruoth Nyasaye osekawo pinywa, mi omiyo joma oketowa e tuech!’

⁵Kuom mano, onge ng’ato kuomu ma biro yudo lowo chieng’ ma ipoge kendo ni Ruoth Nyasaye.”

⁶Ji lwera, kawachona niya “Kik ilwerwa! We lwerowa gi weche ma kamago. Masira ma kamano ok bi makowa!

⁷Iparo ni okwong’ jo-Israel koso? Bende Ruoth Nyasaye dikechi, mi tim gik ma kamago adier? Donge en ema owuoyo maber gi joma timbegi ni kare?”

⁸To Ruoth Nyasaye dwoko niya, “To donge un ema uselokoru wasik joga? Joma duogo gi kue kaa e lweny ka paro ni masira orumo, umayo lopegi.

⁹Uriembo mond joga e mier ma gihero, kendo gueth moa kuoma usemayo nyithindgi nyaka chieng’.

¹⁰Auru malo mondo udhi! Ka eri ok en kama onego uyuee. Ubiro rado gi masira.

¹¹Aneno ni janabi ma ji ohero en mana ng’at ma lworore e kor gweng’, gi weche maag miriambo, kokoro ni ji ni gibiro yudo divai gi kong’o mang’eny.

¹²“To un jo-Israel modong’ abiro chokou kanyakla mana ka rombe manie abila, kata ka kweth manie lek. Koko nogore e pinyu nikech ng’eny mar ji.

¹³Jal ma noyawnigi rangach ema nogolgi oko. Ginipusre e dhorangach, mi gitony. Ruodhgi, ma en Ruoth Nyasaye owuon, ema notelnigi ka giwuok.”