Read luo Mika 6 Bible Online

Mika 6 - luo bible

Mika 6

¹Winjuru kaka Ruoth Nyasaye yalo jo-Israel. A Ruoth Nyasaye, bi mondo ihul wachni ka gode winjo kendo bedo joneno.

²Un gode, kendo un mise mochwere mag piny, winjuru weche ma Ruoth Nyasaye dwaro yalo, nikech en gi bura gi joge, kendo obiro yalo kodgi.

³Ruoth Nyasaye wacho niya, “Un joga, ere gima asetimonu? Ere kaka asemiyo ubedo mool? Dwokauru!

⁴ Nene agolou e piny Misri, kendo aresou e tich bedo wasumbni, Ne aoro Musa gi Arun kod Miriam mondo otelnu.

⁵ Un joga, parieuru gima ne Balak ruodh Moab ochano timonu. Kendo kaka Balaam wuod Beor nodwoke. Bende parieuru gik mane otimore e yo, kua Shitim udhi Gilgal, mana ni mondo ung’e timbe madongo mane atimo mondo aresugo.”

⁶Ang’o ma dakel ni Ruoth Nyasaye ma Nyasach polo, ka abiro mondo alame? Dakel nyiroye ma hikgi achiel achiel mondo awang’ne ka misango?

⁷Koso Ruoth Nyasaye dibed mamor ka akelone rombe gana gi gana, kata ka akelone mor zeituni mamol ka aora? Koso onego achiw nyathina makayo ka misango mondo achulgo richona?

⁸To, in dhano, Ruoth Nyasaye osenyisi yo maber monego iluw. Odwaro mondo itim gik makare, kendo iher ji gi ng’wono, bende iluor Ruoth Nyasachi gi chunyi mamuol.

⁹Luoro Ruoth Nyasaye en rieko. Ruoth Nyasaye luongo jo-Jerusalem niya, “Winjuru, un joma ochokore e dalani.

¹⁰Mwandu muyudo e yor miganga ema opong’o ut joma richo. Gipimo gik moko gi rapim ma ok ni kare, ma ok adwar.

¹¹Bende uparo ni anyalo weyo ni joma tiyo gi rapim ma ok ni karego richogi?

¹²Joma jomoko manie dalani mayo joma odhier. Gin jomriambo mosiko ka hango wach ahanga.

¹³To koro asechako goyou gi goch malit mondo atieku nikech richou.

¹⁴Kuom mano, unuchiem to ok unuyieng’, kendo kech pod nokau akaya. Ka ugolo gik moko e uteu mondo upandi, to ok unyal. To kapo ni ureso gimoro, to abiro miyo okethre e lweny!

¹⁵Ubiro chuoyo, to ok unuka cham, kendo ubiro biyo zeituni, mi uyud mo, to ok unukonyru gi morno. Bende unulos divai, to ok unumadhi.

¹⁶ Useluwo timbe maricho mag ruodh Omri, gi mag dhood Ahab, kendo pok uweyogi. Omiyo abiro tiekou, mi jou bed joma ichayo. Adier, ogendini mamoko duto biro mana charou.”