Read luo Nahum 2 Bible Online

Nahum 2 - luo bible

Nahum 2

¹Un jo-Israel ma nyikwa Jakobo, Ruoth Nyasaye biro dwokonu duong’ ma yande un go, kata obedo ni joma monjou oseyakou, mi okawo olemb mzabipu. Un jo-Nineve, oganda lweny mag wasiku ma ketho gik moko oselworou moketou diere. Ranguru yo, kendo jiwreuru gi tekou duto!

³Jolwenjgi oserwakore gi nengni makwar, kendo kuodigi kwar ka remo. Gechegi mag lweny oriedo, kendo rieny mana ka wang’ chieng’!

⁴Giringo ka gimwomore e alap mar dala, ka moro ka moro tuomore gi wadgi. Gichalo gi meny ma ng’angni kendo gimil e dir dala mana ka polo.

⁵Ruodh Nineve kok ka golo chik ni jotende. Gichwanyore ka gireto, kendo girikni mondo gidhi gichan jolwenjgi e ohinga.

⁶To dhorangeye mag aore molworo dala oseyawore, kendo kibaji goyo joka ruoth.

⁷Chi ruoth ogol oko duk, moter e tuech, kendo jotichne duto manyiri ywak malit komako wigi.

⁸Nineve koro chalo gi yawo ma pige dwono, nikech jolwenje duto ringo weye. Okoknigi kowacho ni, “Chung’uru!” To onge ng’ama duogo.

⁹Mwandu mag fedha gi dhahabu oyaki, kendo nenore ni ging’eny ma ok rum. Gin mwandu mabeyoe moloyo ma chuny ng’ato nyalo gombo.

¹⁰Mago duto oyaki motieki, ma onge gima odong’. Kibaji goyo joge, kendo chongegi tuomore ka gitetni, kendo wengegi olokore makwar haa!

¹¹Koro tinde ere dala mane ong’ere kaka gond sibuor, kama thuondi ne nitie, kendo kama mon gi nyithindo ne odakie ka onge gima giluoro?

¹²Nineve ne chalo gi sibuor. Nonego wasike mondo opidhgo nyithinde kod monde, mi opong’o dalane kod mieche mamoko gi mwandu moyaki kaachiel gi wasumbni.

¹³Ruoth Nyasaye wacho niya, “Asedoko mamon kodi, kendo abiro wang’o gecheni mag lweny! Nyithindi duto biro tho e lweny, kendo gik moko duto mane iyako nomayi. Bende dwond jotendi mioro ok nowinji.”