Read luo Nahum 3 Bible Online

Nahum 3 - luo bible

Nahum 3

¹Mano kaka inine marach yaye dala Nineve! In dala momienore gi remo kendo ma miriasia gi gik moyaki opong’o.

²Winjie kaka del michwadogo farese ywak, kendo kaka geche mag lweny ringo matek ka tiendegi wuo! Tiend faras diko piny matek, kendo geche lweny chikore ka mwomore.

³Ligengni gi tonge ng’ang’ni, kendo mil. Joma otho okadho akwana, kendo ringregi odhurore pidhepidhe kuonde duto. Ji chwanyore achwanya kuomgi.

⁴Mago duto otimore nikech timbeni modwanyore. Ne in dala ma jaber, to ipong’ gi timbe mag juok. Ne indhogo ogendini gi timbeni mag juok gi mag dwanyruokgo.

⁵Ruoth Nyasaye Manyalo Gik Moko Duto wacho niya, “Amon kodi, kendo abiro elo lepi nyaka malo e ng’uti mondo ogendini duto one dugi, mi wiyi kuodi.

⁶Abiro bolo kuomi gik mochido modwanyore ka akuodo wiyi, mondo ji duto onyieri.

⁷Ji duto moneni nobwogi, ka wacho niya, ‘Mano kaka Nineve okethore malich!’ To kata kamano, onge ng’ama noho chunyi. Chutho ere kama diyudie ng’ama diywagi?”

⁸In iparo ni ditony moloyo jo-Amon, dala mane ni e but aora Nael, ka pi olworo koni gi koni ka ohinga?

⁹Jo-Ethiopia gi jo-Misri ne e tekre, kendo ne gin gi teko mathoth. Jo-Put kod jo-Libya bende ne konye.

¹⁰To kata kamano, en bende ne oloye, mi omak joge moter e tuech. Nyithind dalano ne ochwad piny e akek yore, mi otho, kendo ne ogo ombulu mondo ong’ego joma dikaw jotende ka wasumbni. Jodongo mage duto bende ne otue gi nyororo.

¹¹Kamano e kaka in Nineve bende ibiro kwang’ ka ng’at momer, mi piny chami, kendo inimany kar tony kiringo wasigu.

¹²Kuondeni duto mochiel motegno mag siro lweny nopodhi. Notiekgi mana ka ng’owo mokwongo chiek, ma lwar e dho joma yiengo yath.

¹³Jolwenji nodok manyap ka mon. Dhorangeye mag pinyi noyawre malach ni wasigu, kendo mach nowang’gi pep.

¹⁴Ikreuru ni ageng’a mabiro. Umburu pi kendo nyonuru lowo, unywasi mondo ogogo matafari mang’eny ulosgo kuonde mag siro lweny obed motegno.

¹⁵To e kinde ma utimoe gigo, mach nowang’u, mi tieku pep, kendo ligangla nonegu, mi wasigu notieku mana ka nyithi bonyo ma chamo gik moko duto ma giyudo. Kata obedo ni unywoloru ka dede kamano, to unulal nono mana kaka rumbi mar dede mahuyo kendo lal nono.

¹⁶Jou ma johala ng’eny ka sulue ma e polo,

¹⁷kendo jodongu kod jotendu chokore kaachiel mana ka dede mopoto e chiel ka koyo ng’ich. To giduto gibiro ringo mi gilal nono mana ka det bonyo ma ringo ka chieng oowo piny, kendo onge ng’ama ong’eyo kuma gidhiye.

¹⁸A yaye ruodh Asuria, jodongi oriere piny kotho, bende jogi oke e kor gode ka onge ng’at machokgi.

¹⁹Adhondeni ok nyal chango, nimar gidhi marach. Ji duto mowinjo gima otimoreni biro pamo lwetgi gi mor, nimar onge kata ng’at achiel e piny ngima ma pok isebedo kisando.