Read luo Habakuk 3 Bible Online

Habakuk 3 - luo bible

Habakuk 3

¹Ma e lemo mar Habakuk janabi:

²A Ruoth Nyasaye, asewinjo humbi, kendo timbeni miya luoro. Chak itim timbeni machon mana e ndalogi, kendo kata obedo ni ikecho kamano to ng’wonnwae.

³Nyasaye biro koa Teman. Ee, Ng’ama Ler biro koa got Paran. Duong’ne maler opong’o kor polo kaachiel gi piny.

⁴Othinyore ka ler mar okinyi, kendo meny ariyo rieny e bathe koni gi koni. Kor polo kanyo e kama opandoe duong’ne maler.

⁵Tho malich otelo e nyime, to dera luwo bang’e.

⁶Ka ochung’ to piny yiengni, kendo ka ong’icho, to ogendini kirni, bende gode duto ma nyaka nene barore kendo nimo. Pod owuotho mana kaka ne owuotho chon.

⁷Aneno ka kihondko malich omako jo-Kushan gi jo-Midian, madak e hembe.

⁸A Ruoth Nyasaye, mirima omaki gi aore koso? Koso ikecho gi nam, ma omiyo ibiro kiidho fareseni kod gecheni ma ilochogo?

⁹Igolo atung’ oko, kendo ipong’o olalo gi asere. Imiyo ohula baro piny,

¹⁰bende ka gode orangi, to tetni ka luoro omako. Ohula mwomo ka ridore, kendo nam matut wuo matek ka apaka gingore.

¹¹Wang’ chieng’ gi due ochung’ achung’a keregi, ka gineno polo ka mil, mana ka gima gin aserni gi tong’ magi.

¹²Iwuotho e piny gi gero, kendo inyono ogendini piny gi mirima.

¹³Ibiro mondo ires jogi, kaachiel gi ruoth miseyiero. Iseketho od jaricho, chakre tado nyaka dier ot, kimuko mise mare chuth.

¹⁴Wasikwa nobiro ka kalausi, kaparo ni ibiro tiekowa, mana kaka inyalo tieko ng’at modhier man kar kende. To kata kamano ne itiekogi mana gi gilwenjegi giwegi.

¹⁵Ka ingado nam gi fareseni, to apaka madongo gingore.

¹⁶Ka awinjo gigi to kibaji goya, kendo dhoga tetni. Chokena duto nyosore, kendo tiendena kirni ka luoro ohewa. Ahora mos, karito chieng’ ma masira biro makoe joma monjowa.

¹⁷Kata obedo ni ng’owo ok thiew, kendo mzabibu gi zeituni ok nyagi, bende puothe ok chieg cham, kendo rombe gi dhok onge dala,

¹⁸to pod anamor amora kuom Ruoth Nyasaye, kendo anabed moil kuom Nyasaye jawarna.

¹⁹ Ruoth Nyasaye e tekra. En ema omiyo tienda bedo mayot ka tiend mwanda, mondo awuothgo kuonde moting’ore.