Read luo Hagai 2 Bible Online

Hagai 2 - luo bible

Hagai 2

¹Due piero ariyo gachiel, due mar abiriyo e higa mar ariyo mar loch ruoth Darius, weche mane Ruoth Nyasaye owacho gi dho janabi Hagai e magi:

²“Penj Zerubabel wuod Shealtiel ma jatend Juda gi Joshua wuod Jehozada, jadolo maduong, kod joma moko duto niya,

³ ‘Bende nitie ng’ato modong’ kuomu duto mane oneno Hekaluni kapod nigi duong’ne machon? Ka kamano, to tinde onene kochal nadi? Donge ochalnu ka gima onge?’

⁴Bang’e nyis Zerubabel gi Joshua wuod Jehozadak jadolo maduong’ kod ji moko duto mondo ojiwre obed motegno. An Ruoth Nyasaye ema awacho kamano.” Ruoth Nyasaye Manyalo Gik Moko Duto owacho ni, “Chakuru achaka tich, nikech an kodu,

⁵ kendo Roho mara ni kuomu. Kik ubed maluor,

⁶ nikech awacho kama: Gimoro achiel kende ema odong’; en ni abiro yiengo polo gi piny kod nam.

⁷Bende anayieng ogendini duto, mi mwandugi duto nobi ka, mi anapong’ Hekalu gi duong’ maler. An Ruoth Nyasaye ema awacho kamano.

⁸An e wuon fedha, kendo an e wuon dhahabu.

⁹Duong’ ma Hekaluni biro bedogo achien nolo duong’ mane en go mokwongo, kendo anakel kue gi gueth ka. An Ruoth Nyasaye Manyalo Gik Moko Duto awacho kamano.”

¹⁰Due piero ariyo gang’wen, due mar ochiko, e higa mar ariyo mar loch Darius, wach Ruoth Nyasaye mane obiro gi dho janabi Hagai e ma:

¹¹Ruoth Nyasaye Manyalo Gik Moko Duto owacho kama “Nyis jodolo mondo odwok wach ma apenjogini.

¹²‘Ka nga’to oting’o ring’o mowal ni tich Nyasaye e riak lawe, mi riak laweno ogere e makati, kata e kado, kata e divai, kata e mo, kata e chiemo moro amora, to gima ogere kuomeno bende didok mowal ni tich Nyasaye koso?’ ” Eka Hagai nopenjoo jodolo wachno, mi gidwoke ni, “Ooyo.”

¹³ Hagai nodhi nyime kapenjogi niya, “To ka ng’ato omuloo ringre ng’at motho, mi koro odoko mogak, bang’e ogere kuom gimoro, koro gino bende didok mogak koso?” Jodolo nodwoke niya, “Dodok mogak.”

¹⁴Eka Hagai nowacho niya, “Ruoth Nyasaye wacho kama: Mano e kaka jo-Israel, kod gik moko duto ma gitimo, chalo. Mano emomiyo gik moko duto ma gichiwona e Hekaluni ogak.

¹⁵To paruru ane gima biro timore chakre kawuono. Kane pok uchako gero Hekalu mar Ruoth Nyasaye kendo, to ere kaka ne uchalo?

¹⁶Donge kane ng’ato obiro kama ochokie cham, ka oparo ni obiro yudo gunde piero ariyo, to ne oyudo mana apar kende?

¹⁷Ne asektho chambu duto gi dera marach kod pe, to kata kamano ne ok uduogo ira. An Ruoth Nyasaye ema awacho kamano.”

¹⁸“Paruru, chakre kawuono, due piero ariyo gang’wen due mar ochiko, ma en odiechieng’ moketie mise mar Hekalu mara.

¹⁹Adier, chakre kawuono paruru matut mondo une ane ka pod cham dibed matin, kata kapod mzabibu gi komamanga kod zeituni ok dinyag olemo. Ooyo, ok nobed kamano, nikech chakre kawuono abiro guedhou.”

²⁰Chieng’ due piero ariyo gang’wenno, wach Ruoth Nyasaye nochako obiro ni Hagai niya,

²¹“Nyis Zerubabel jatend Juda ni abiro yiengo polo gi pinyu.

²²Analok loch ruodhi, mi aketh teko mag pinje mamoko, kendo anago geche mag lweny piny, kaachiel gi joithgi. Ng’ato ka ng’ato noked gi wadgi, mi farese kod joma idhogi nonegi.

²³To chieng’no anakawi, in jatichna Zerubabel wuod Shealtiel kendo anami ibed ruodh jogo, nikech in ema aseyieri. An Ruoth Nyasaye ema awacho kamano.”