Read luo Zekaria 5 Bible Online

Zekaria 5 - luo bible

Zekaria 5

¹Ne ating’o wang’a, mi aneno kalatas moban kahuyo e kor yamo.

²Eka malaika cha nopenja niya, “Ineno ang’o?” Ne adwoke ni “Aneno kalatas moban kahuyo. Borne oromo mita apar, to lachne mita abich.”

³Bang’e nowachona niya, “Mano en kuong’ ma lak e piny ngima. Weche mondik e bath kalatasno konchiel biro tieko jokuo duto, kendo weche mondik e bathe komachielo notiek ji duto ma kuong’ore gi miriambo.

⁴Ruoth Nyasaye Manyalo Gik Moko Duto wacho ni, ‘Anaor kuong’no e ut jokuo duto, kende e od ng’ato ang’ata makuong’ore gi miriambo e nyinga. Kuong’no nosik e udigo, mi tiekgi pep, koda ka yien gi kite mogergigo.’ ”

⁵Malaika mane wuoyo koda cha ne oduogo ira mowachona niya, “Ting’ wang’i mondo ineye gima birono kaka chalo.”

⁶Ne apenje ni en ang’o, mi odwoka ni en atonga ma opong’ gi richo duto motim e piny ngima.

⁷Eka raum mapek molos gi chuma mane oumgo atongano noelore, mi apo ka aneno dhako mobet piny.

⁸Malaika nowachona niya, “Dhakono e richo.” Eka ne odhiro dhakono, modwoko ei atonga, mi ochako oumo dhoge gi raum mapekno.

⁹Bang’ mano ne aneno mon ariyo mahuyo e kor yamo, ka biro irwa gi buombe machalo buombe ogungo. Ne gikawo atonga, mi gidhigo e kor polo malo.

¹⁰Eka ne apenjo malaika mane wuoyo koda cha kuma giteroe atongano.

¹¹Nodwoka niya, “Gitere e piny Babulon mondo ogerne ot kuno, kendo ka oseger odno, to norenj atongano kare molosne kanyo.”