Read luo Zekaria 8 Bible Online

Zekaria 8 - luo bible

Zekaria 8

¹Wach Ruoth Nyasaye Manyalo Gik Moko Duto nobirona niya,

²“Magi e weche Ruoth Nyasaye Manyalo Gik Moko Duto: Hera malich ma aseherogo Sayun osemiyo abedo gi mirima. Adier, hera maherego osemiya mirima mager.

³Koro an Ruoth Nyasaye awacho ni aseduogo Sayun kendo abiro dak Jerusalem. Jerusalem ibiro luongo ni, ‘Dala ma Adiera Nitie’, kendo god Ruoth Nyasaye Manyalo Gik Moko Duto noluong ni, ‘Got Maler’.

⁴Bende an Ruoth Nyasaye Manyalo Gik Moko Duto awacho ni, Jodongo kod mon moti biro chako bet e wang’yore mag Jerusalem kendo, ka moro ka moro sirore gi luth nikech hike oniang’ ahinya.

⁵Bende yawuowi gi nyiri nopong’ wang’yore mag dala ka tugo.

⁶“An Ruoth Nyasaye Manyalo Gik Moko Duto, awacho kama: Kata kapo ni gima kamano nenore ni joma odong’ e ogandani ka gima ok nyal timore, koro an bende nonenrena kamano?

⁷Winjuru! Abiro reso joga kagolo e pinje ma yo wuokchieng’ gi ma yo podho chieng’,

⁸mi adwokgi Jerusalem mondo gidagie. Ginibed joga kendo anabed Nyasachgi, kuom adiera kod tim makare.”

⁹Ruoth Nyasaye Manyalo Gik Moko Duto wacho kama: “Beduru gi chir, un joma ndaloni weche ma jonabi osebedo kawacho, chakre chieng’ mane iketoe mise mar Hekalu mara, mondo ochak oger kendo.

¹⁰To kane pok kindeno ochopo, ji kata jamni ne ok ti tich michulo, kendo kane ng’ato owuok dhi e tije, to ok ong’ere kata ka doduogi, nikech wasigu ne ng’eny. Bende ne athuwo ng’ato ka ng’ato gi wadgi.

¹¹To koro ok abi timo ni joma odong’ e ogandani kaka natimo e kinde mokadho. An Ruoth nyasaye Manyalo Gik Moko Duto ema awacho kamano.

¹²Ginichwo kodhi ka gin gi kue, mi mzabibu nonyag olembe, kendo lowo nochieg cham. Koth bende nochuenigi maber, kendo anaguedh joma odong’ kuom jogagi gi gigo duto.

¹³Un jo-Juda kod jo-Israel, usebedo ranyisi malong’o ni ogendini mamoko duto kuom gima timore ni joma akuong’o, to koro abiro resou, mi ubed ranyisi mar gima timore ni joma aguedho. Kuom mano kik ubed maluor, to beduru gi chir.”

¹⁴Ruoth Nyasaye Manyalo Gik Moko Duto owacho niya, “Kaka ne awacho ni abiro tiekou, nikech kwereu nomiya mirima, mi ok aloko parona,

¹⁵e kaka asechano mondo aguedh Jerusalem kod jo-Juda: omiyo kik ubed maluor.

¹⁶ To gik ma onego utim e magi: Ng’ato ka ng’ato nyaka wach mana adiera kende ni wadgi, kendo nyaka uyal bura kare, kendo gi adiera, mondo kue obedie.

¹⁷Kik ng’ato chan timo gima mono ni wadgi, kendo kik ukuong’ru gi miriambo, nikech amon gi gik ma kamago duto. An Ruoth Nyasaye Manyalo Gik Moko Duto ema awacho kamano.”

¹⁸Wach Ruoth Nyasaye Manyalo Gik Moko Duto nobirona niya,

¹⁹“Kinde mag riyo kech e due mar ang’wen gi mar abich gi mar abiriyo kod mar apar biro lokore sewni mag mor gi ilo ni jo-Juda. Omiyo beduru gi adiera kod kue.”

²⁰Bende magi e weche Ruoth Nyasaye Manyalo Gik Moko Duto: “Kinde biro chopo ma ogendini madongo moa e pinje marateke kendo e mier madongo nobi Jerusalem.

²¹Joma odak e dala moro nodhi ir joma odak e dala machielo, mi wachnigi niya, ‘Wadhiuru ir Ruoth Nyasaye Manyalo Gik Moko Duto mondo walame, kendo wakwaye mondo oguedhwa.’

²²Kamano ogendini madongo kod ji marateke nobi Jerusalem mondo olam Ruoth Nyasaye Manyalo Gik Moko Duto kendo okwaye mondo oguedhgi.”

²³Ruoth Nyasaye Manyalo Gik Moko Duto wacho niya, “E kindego ji apar moa e ogendini mamoko, mawacho dhok mopogore opogore, nobi ir ja-Yahudi, mi mak riak lawe, ka wachone niya, ‘Wadwaro dhi kodi, nimar wasewinjo ni Nyasaye ni kodi.’ ”