Read luo Mathayo 11 Bible Online

Mathayo 11 - luo bible

Mathayo 11

¹Kane Yesu osetieko puonjo jopuonjrene apar gariyo, noa kanyo modhi mondo oland Wach Maber kendo opuonji e mier machiegni gi kanyo.

²Johana Jabatiso nowinjo gie jela gik mane Kristo timo, omiyo nooro jopuonjrene moko ire,

³mondo odhi openje ni, “In e jal monego bi, koso pod warit ng’at machielo?”

⁴Yesu nodwokogi niya, “Doguru mondo unyis Johana gik musewinjo, kendo uneno.

⁵ Nyiseuru ni muofni neno, pudhe wuotho, jodhoho ichango, joma itgi odino winjo wach, joma otho ichiero, kendo joma odhier ilandonigi Wach Maber.

⁶To ng’at ma wachna ok chwany chunye en jahawi!”

⁷Kane oyudo jopuonjre Johana koro dok, Yesu nowuoyo ni ji kuom Johana, kopenjogi niya, “E kinde mane udhi ir Johana e thim, ang’o mane udhi neno? Odundu ma yamo yiengo koso?

⁸To ka ok kamano, to ang’o mane udhi neno? Koso ne udhi neno ng’at morwakore gi lewni mabeyo? Ooyo! Joma rwakore kamano iyudo mana e ut ruodhi!

⁹To kara, ang’o mane udhi neno kuno? Neno janabi koso? Adier awachonu ni ne udhi neno ng’at moloyo janabi,

¹⁰ nikech Johana e jaote ma Muma wuoyo kuome ni, ‘Eri aoro jaotena otel nyimi, mondo olosni yo.’

¹¹Awachonu adier ni, kuom yawuot mon duto, onge moro maduong’ie moloyo Johana Jabatiso. Kata kamano, ng’at matinie mogik e Loch Polo to oloye gi duong’.

¹² Chakre ndalo Johana Jabatiso nyaka chil kawuono, ji osebedo kadwaro donjo e Piny Ruodh Polo gi teko, kendo joma rateke eme donjoe,

¹³nikech nyaka chop ndalo mane Johana obiroe, jonabi duto kod kitap Chik Musa nosebedo kanyiso gik mabiro timore,

¹⁴ kendo ka unyalo yie wachna to ubiro neno ni Johana e Elija mane okor wachne ni nobi.

¹⁵Ng’at man gi it mar winjo, to mondo owinji!

¹⁶“Ere gima dapimgo tieng’ ma kawuononi? Gichalo gi nyithindo mobet e pap, makok ni jowetegi ni,

¹⁷‘Nende wagoyonu thum, to ne utamoru miel. Bende ka nende wagoyonu nduru, to ne udagi ywak.’

¹⁸Awachonu kamano nikech Johana nobiro modak katueyo chiemo kendo ka ok madh divai, omiyo ji duto wacho ni jachien ni kode.

¹⁹Wuod dhano to nobiro ka chiemo kendo metho, omiyo ji duto wacho niya, ‘Neyeuru jali! En jawuoro, kendo jamer, bende en osiep josol osuru kod joricho!’ To kata kamano, awachonu ni, olemo ma rieko mar Nyasaye nyago ema nyiso ni riekone ni kare.”

²⁰Yesu nochako wuoyo kuom mier mane otimoe honni mang’eny, korogo ni joma odakie nikech ne gitamore loko chunygi.

²¹ Nowachonigi niya, “Yaye, un jo-Korazin! Mano kaka unune malit! Yaye, un jo-Bethsaida! Mano kaka un bende unune malit! Dine bed ni honni mane otimnu ne otim mana ne jo-Turo gi jo-Sidon, to dikoro ne giseloko chunygi, mi girwako piende gugru, kendo gibukore gi buru!

²²Awachonu ni, Chieng’ Bura to Nyasaye nokumu malit moloyo kaka nokum Turo gi Sidon.

²³ “To in dala, mar Kapernaum, iparo ni initing’ri malo nyaka e polo koso? Ooyo, ibiro boli piny, mana e Piny Joma Otho! Dine bed ni honni mane otim kuomi ne otim Sodom, to dikoro Sodom pod nitie nyaka chil kawuono!

²⁴ Awacho ni, Chieng’ Bura to Nyasaye nokumi malit moloyo kaka nokum Sodom!”

²⁵E kindeno Yesu nowacho niya, “A Wuora, ma Ruodh polo gi piny, agoyoni erokamano nikech isepando wechegi ni joma riek kod joma osomo, to isenyiso mana ji ajia.

²⁶Adier Wuora, osetimore kamano nikech mano e kaka ne long’oni.

²⁷ “Wuora oseketo gik moko duto e lweta. To onge ng’ama ong’eyo Wuoro to mak mana Wuowi, kod joma Wuowi omiyo ong’eye.

²⁸“Biuru ira, un duto mujony kendo mugangoru mapek, mondo amiu yueyo.

²⁹ Rwakuru lodi ma amiyou e ng’utu, kendo puonjreuru kuoma, nikech chunya muol kendo dembore.

³⁰Kamano unuyud yueyo e chunyu, nnimar lodi ma amiyou yom, kendo misika yot.”