Read luo Mathayo 14 Bible Online

Mathayo 14 - luo bible

Mathayo 14

¹Ndalono ema ne ruoth Herode owinjoe wach Yesu,

²mi owacho niya, “Nyaka bed ni ng’atni en Johana Jabatiso! Osechier oa kuom joma otho. Mano ema omiyo en gi tekogi duto.”

³ Noyudo ka Herode osemako Johana, motueyo e jela, nikech wach Herodia, chi Filipo owadgi Herode,

⁴ nimar Johana nosiko kakwero Herode ni, “Ok en gima kare, kawo dhakono.”

⁵Herode ne dwaro nego Johana, to kata kamano, ne oluoro jo-Yahudi, nikech ne gikawo Johana ka janabi.

⁶To kane sawo mar paro chieng’ nywol Herode ochopo, nyar Herodia nomiel mamit e nyim welo, mi olombo Herode ahinya.

⁷Mano nomiyo Herode okuong’ore ni nyakono ni nomiye gimoro amora mokwaye.

⁸To min nyako nosunde mondo okwa mana wi Johana Jabatiso okelne kanyo e tawo.

⁹Kane ruoth owinje gimaodwaro, chunye nodoko malit. To kata kamano nogolo chik mondo omi nyakono gima okwayo, nikech kuong’ruok mane osekuong’orego e nyim wende.

¹⁰Ne ooro ng’ato modhi ong’ado wi Johana e jela,

¹¹okelo koketo e tawo, mi omiyonyakono otero ni min mare.

¹²Bang’e jopuonjre Johana nobiro, mi okawo ringre, odhi oyiko. Eka ne gidhi, mi ginyiso Yesu gima osetimore.

¹³Kane Yesu owinjo wachno, noidho yie, modhi kaamoro e bath nam kar kende. To ji nowinjo kamano, mi owuok e miechgi, molworo oko gi tiendgi, kadhi ire.

¹⁴Omiyo kane Yesu owuok e yie, noneno ji mathoth, kendo nokechogi, mochango joma tuo kuomgi.

¹⁵Kane piny ochopo odhiambo, jopuonjrene nodhi ire, mowachone ni, “Piny koro yuso, kendo kaeri en thim, omiyo we ni ji thuolo mondo odhi e mier, ong’iew chiemo ma gibiro chamo.”

¹⁶To Yesu nodwokogi ni, “Ok onego gia. Un ema mondo umigi chiemo.”

¹⁷Ne gidwoke ni, “To waonge gi gimoro ka, mak mana makati abich gi rech ariyo kende.”

¹⁸Yesu nowachonigi ni, “Kelnagiuru ka.”

¹⁹Bang’ mano, nonyiso ji mondo obed piny e lum. Eka nokawo makati abich gi rech ariyogo, mong’iyo malo, kendo ogwedhogi. Ne ong’ingo makatigo, momiyo jopuonjrene, eka jopuonjrene nomiyo ji,

²⁰mi ji duto nochiemo moyieng’. Bang’e nokwany ng’injo modong’, mopong’o aditni apar gariyo.

²¹Kar romb chwo mane ochiemo ne alufu abich, ka ok okwan mon gi nyithindo.

²²Bang’e Yesu nowacho ni jopuonjrene mondo odonj e yie, otel nyime loka machielo, ka en to pod ogonyo ji mondo odog miechgi.

²³Kane osegonyo ji, nodhi e got kar kende mondo olem, kendo piny ne oyuso kapod en mana kanyo kende.

²⁴To yie koro ne ni e chuny nam, ka apaka thage malich, nikech yamo ne ogeng’one.

²⁵Yesu nodhi irgi kar koguen ka wuotho ewi pi.

²⁶To kane jopuonjre onene kowuotho kamano, ne gibwok ahinya, mi gikok ka giwacho niya, “Macha jachien!”

²⁷To gikanyono Yesu nowuoyo kodgi, ka wacho niya, “Beduru gi kue! Kik ubed maluor, en mana an!”

²⁸To Petro nodwoke ni, “Ruoth, ka en in adier, to wachna mondo awuothi ewi pi, abi iri.”

²⁹Yesu noyiene ni, “Bi.” Omiyo Petro nowuok e yie, mowuotho ewi pi, kadhi ir Yesu.

³⁰To kane oneno yamo, nobedo maluor, mi ochako nyumore e pi. Ne oywak niya, “Ruoth! Resa!”

³¹Yesu norieyo lwete piyopiyo, momake, ka wachone ni, “Yaye! Mano kaka in gi yie matin! Marang’o niriwo gi kiawa?”

³²Eka ne gidonjo e yie, mi yamo okue.

³³Jopuonjre mane nie yie nomiyo Yesu duong’, kawacho niya, “Adier in Wuod Nyasaye!”

³⁴Kane gisetieko ng’ado nam, ne gigowo Genesaret,

³⁵to ji nong’eyo Yesu, omiyo ne gioro wach e gweng’no duto, mi okel joma tuo ire.

³⁶Ne gihombe mondo oyie joma tuo omulie kata mana riak lawe kende. Kamano ji duto mane omulo riak lawe nochango.