Read luo Mathayo 15 Bible Online

Mathayo 15 - luo bible

Mathayo 15

¹Bang’e jo-Farisai moko kod jopuonj Chik moko nobiro ir Yesu, koa Jerusalem, mi openje ni,

²“Ere gima omiyo jopuonjreni oketho tim kwerewa? Ok gilogi e yo ma Chikwa dwaro ka gidwaro chiemo!”

³Yesu nodwokogi ni, “Un to, ere gima omiyo uketho chik Nyasaye mana ni mondo urit chikeu uwegi?

⁴ Nyasaye nowacho ni, ‘Luor meru gi wuoru’, kendo ni, ‘Ng’at moyanyo wuon kata min nyaka negi’.

⁵Un to upuonjo ni, ‘Gik moko duto ma dakonyigo, asewalo ni tich Nyasaye’,

⁶to koro ok onego okony wuon gi gimoro. Mano e kaka umiyo chike Nyasaye bedo kayiem nono, kuluwo chikeu uwegi.

⁷Un joma wuondore ni ohero Nyasayegi! Isaya ne ni kare kane okoro wach kuomu ni,

⁸ ‘Jogi paka mana gi dhogi, to chunygi bor koda.

⁹Gilama kayiem nono, nimar gipuonjo chike mag dhano, mana ka gima gin chike Nyasaye!’ ”

¹⁰Yesu noluongo ji ire, mi owachonigi niya, “Winjuru gima awachonu mondo ung’e tiende.

¹¹Gik ma donjo e dho dhano ok ema mi dhano dok jaketho, to mana gik mawuok e dhoge ema miyo odoko jaketho”

¹²Eka jopuonjrene nobiro ire, mopenje niya, “Bende ing’eyo ni jo-Farisai nende osin kodi, kane giwinjo gima iwacho?”

¹³Yesu nodwokogi ni, “Gimoro amora mane Wuora mae polo ok opidho, ibiro pudho.

¹⁴ Omiyo wegiuru aweya! Gin jotelo mamuofni. Ka muofu otelo ni muofu wadgi, to donge giduto ginyumore e bur?”

¹⁵To Petro nokwaye mondo onyisgi tiend ngerono.

¹⁶Yesu nodwokogi ni, “Kara un bende weche pok odonjonu?

¹⁷Donge uneno ka gik moko duto madonjo e dho dhano kadho e iye, kendo wuok oko?

¹⁸ To gik mawuok e dho dhano a mana e chunye, kendo mago ema miyo odoko jaketho,

¹⁹nikech chuny dhano ema paro maricho nitie, mamiyo otimo gik maricho, kaka nek gi terruok gi wuowo gi kuo gi miriambo, kod kuoth.

²⁰Mago e gik mamiyo dhano doko jaketho. To ka ng’ato ochiemo ka ok ologo e yo ma chik dwaro, to mano ok mi odok jaketho.”

²¹Yesu nowuok, modhi e gweng’ machiegni gi mier mag Turo kod Sidon.

²²Dhako moro ma nyar Kanaan mane odak e gweng’no nobiro ire, mi okok kaywakne niya, “Ruoth! Wuod Daudi! Yie ikecha. Jachien marach osemako nyara, kendo thage malit.”

²³To Yesu ne ok odwoke kata wach achiel. Bang’e jopuonjrene nobiro ire, mokwaye ni, “Riemb dhakoni odhi, nikech oluwo bang’wa kogoyo koko.”

²⁴Yesu nodwoko ni, “Ne oora mana ir jo-Israel molal ka rombe.”

²⁵Kane dhakono owinjo kamano, nobiro mopodho e tiend Yesu, koywak niya, “Ruoth, Konya!”

²⁶Yesu nodwoke ni, “Ok en gima ber, wito chiemb nyithindo ni guogi.”

²⁷To dhakono nowachone ni, “Mano en adier, Ruoth, to kata mana guogi bende chamo ng’injo molwar e bwo mesa wegegi.”

²⁸Mano omiyo Yesu nodwoke niya, “In dhako man gi yie maduong’! Gima idwaro mondo otimreni.” Kamano nyare nochango gie sano.

²⁹Yesu noa kanyo mowuotho koluwo dho nam Galili. Eka nodhi ewi got moro, mobet piny kuno.

³⁰Ji mathoth nokelone rang’onde gi muofni gi pudhe gi momni kod jomoko duto matuo. Ne giketogi e nyime, mi ochangogi.

³¹Ji nowuoro kane gineno momni ka wuoyo, kendo rang’onde kochango, gi pudhe kawuotho, kod muofni kaneno, mine gipako Nyasach Israel.

³²Yesu noluongo jopuonjrene, mowachonigi niya, “Akecho jogi, nikech gisebet koda kuom ndalo adek, to koro gionge chiemo. To ok adwar weyogi gidog ka gidenyo kamano, nimar dipo ka nong’no oterogi e yo.”

³³To jopuonjrene nopenje ni, “Ere kama dwayudie chiemo e thim ka, ma dirom oganda maduong’ni?”

³⁴Yesu nopenjogi ni, “Un gi makati adi?” Ne gidwoke ni, “Wan gi makati abiriyo, kod rech moko manok matindo tindo.”

³⁵Yesu nowacho ni ji duto mondo obed piny.

³⁶Eka nokawo makati abiriyo kod rechgo, mogoyo ni Nyasaye erokamano. Nong’ingogi, momiyogi jopuonjrene, eka jopuonjrene nopogo ni ji.

³⁷Kamano ji duto nochiemo moyieng’. Bang’e ne okwany ng’injo modong’, mi oromo atonge abiriyo.

³⁸Kar romb joma chwo mane ochiemo ne alufu ang’wen, ka ok okwan mon gi nyithindo.

³⁹Eka Yesu nogonyo ji, moa. En to nodonjo e yie, modhi e gweng’ Magadan.