Read luo Mathayo 17 Bible Online

Mathayo 17 - luo bible

Mathayo 17

¹Bang’ ndalo auchiel, Yesu nokawo Petro kaachiel gi Jakobo kod Johana owadgi Jakobo, moterogi malo ewi got mabor kar kendgi.

²Eka kite nolokore mana e nyimgi ka gineno, mi wang’e orieny ka wang’chieng’, kendo lepe odoko matar ka pe.

³Bang’ mano ne gipo ka gineno Musa kod Elija ka jowuoyo gi Yesu.

⁴Eka Petro nowacho niya, “Ruoth, bedowa kaeri en gima ber. Ka ihero, to abiro gero kiche adek ka, ma achiel mari, to machielo mar Musa, kendo moro mar Elija.”

⁵ To kane pod owuoyo, bor polo marieny nobiro moumogi gi tipone, kendo ne giwinjo dwol moro ka wacho gie bor polo niya, “Ma e Wuoda mahero. Chunya mor kode. Winjeuru.”

⁶Kane jopuonjre owinjo dwolno, luoro nomakogi malich, mi gipodho piny auma.

⁷To Yesu nosudo irgi, momulogi, kawachonigi niya, “Auru malo! Kik ubed maluor!”

⁸Kamano ne giting’o wang’gi, mi ok gineno ng’ato machielo, to mak mana Yesu kende.

⁹To kane oyudo gilor gia e got, Yesu nokwerogi ni kik ginyis ng’ato hono ma giseneno, nyaka chop chieng’ ma ochierie Wuod Dhano, koa kuom joma otho.

¹⁰ Bang’e jopuonjre nopenjo Yesu niya, “Ere gima omiyo jopuonj Chik wacho ni Elija nyaka bi mokwongo?”

¹¹Yesu nodwokogi ni, “Adier, Elija nyaka bi mokwongo, kendo en ema obiro loso gik moko duto obed kare.

¹² To awachonu ni Elija osebiro, kendo ji ne ok ong’eye, to ne gitimore atima kaka gidwaro. Kamano bende e kaka gibiro sando Wuod Dhano.”

¹³Bang’ mano jopuonjre nong’eyo ni kara owuoyonigi mana kuom Johana Jabatiso.

¹⁴Kane gichopo ir oganda, ng’at moro nobiro ir Yesu, mogoyo chonge piny e nyime, kawacho niya,

¹⁵“Jaduong’, yie ikech wuoda, nikech en gi tuo ndulme, kendo chande marach. Pile pile ogore e mach, kendo e pi.

¹⁶Nende akele ni jopuonjreni, to ne ok ginyal change.”

¹⁷Yesu nowacho niya, “Yaye! Ma tieng’ maonge gi yie, kendo mobam manade! Nyaka karang’o ma onego abedie kodu? Koso anachandra kodu nyaka karang’o?”

¹⁸Eka Yesu nokwero jachiendno matek, mi owuok oko kuom rawerano, mi rawerano ochango mana gikanyo.

¹⁹Bang’e jopuonjre nodhi ir Yesu kar kende, mopenje ni, “Ang’o momiyo wan ne ok wanyal golo jachiendno?”

²⁰ Yesu nodwokogi ni, “Nende ok unyal gole nikech un gi yie matin. Awachonu adier niya, Da bed ni un gi yie kata matin marom mana gi koth karadali, to duwachi ni godni ni, ‘Aye ka, dhi kucha’, mi dodhi. Bende onge gima ditamu timo. [

²¹To jachien ma kamano igolo mana gi lemo kod tueyo chiemo kende.]”

²²To kane oyudo Yesu wuotho gi jopuonjrene e piny Galili, nowachonigi niya, “Wuod Dhano ibiro keto e lwet ji,

²³mi gininege, to chieng’ mar adek nochiere.” To kane jopuonjre owinjo kamano, ne gibedo gi chuny mokuyo.

²⁴ Kane Yesu gi jopuonjrene ochopo Kapernaum, josol osuch Hekalu nobiro ir Petro, mopenje ni, “Bende japuonju golo osuch Hekalu?” (Osuch Hekalu ne en nus-shekel.)

²⁵Petro nodwokogi ni, “Ee, ogolo.” To kane Petro odonjo e ot, Yesu ema nokwongo wuoyo kode, kapenje niya, “Simon, in iparo ang’o kuom wach golo osuruni? Joma nadi magolo osuru ni ruodhi mag pinyni? Gin jopinje ruodhigo, koso gin jopinje mamoko?”

²⁶Petro nodwoke ni, “Jopinje mamoko eme golo.” Eka Yesu nowachone ni, “Ka kamano, to kara jopinjegi ok onego chul gimoro.

²⁷To kata kamano, ok onego wachwany chuny josol osurugi, omiyo dhiyo, ibol olowu e nam, iywa rech mokwongo. Eka iyaw dhoge, inwang’ie shekel achiel. Kawe, imi josol osurugo, obed osuchwa, wan ji ariyo.”