Read luo Mathayo 20 Bible Online

Mathayo 20 - luo bible

Mathayo 20

¹Eka Yesu nomedo wacho niya, “Loch Polo chalo gi wuon puoth mzabibu mane owuok gokinyi mang’ich kadhi dwaro jotich mondo otine e puothe.

²Ne owinjore gi jotich moko ni obiro chulogi siling’ achiel achiel, odieching’ kodiechieng’, mi noorogi e puodho.

³Ne ochako owuok kar sa adek, mi odhi oyudo jomoko kochung’ achung’a e chiro, ka onge gima gitim.

⁴Nowachonigi niya, ‘Un bende, dhiuru e puotha, to abiro miyou pok mowinjore.’

⁵Kamano ne gidhi. Eka ng’atno nochako owuok kar sa auchiel, kendo kar sa ochiko, mi odhi oyudo jomoko, kendo owinjorego bende.

⁶Nochako owuok kar sa apar gachiel, mi odhi oyudo jomoko ka pod ochung’ achung’a e chiro, omiyo nopenjogi niya, ‘Ere gimomiyo ubudho abudha ka onge gima utimo odiechieng’ duto?’

⁷Ne gidwoke ni, ‘Wobudho ka nikech onge ng’at mosemiyowa tich’. Eka nowachonigi niya, ‘Kara, un bende dhiuru e puotha mar mzabibu’.

⁸ “Kane piny ochopo odhiambo, wuon puodho nowacho ni nyapara ni, ‘Luong jotich mondo obi ichulgi pokgi, kichako gi joma nende obiro achien, kendo itieko gi joma nende obiro mokwongo’.

⁹Kuom mano, joma ne ochako tich sa apar gachiel mar odhiambo nobiro, moyudo siling’ achiel achiel.

¹⁰To bang’e kane joma nokwongo ochako tich obiro, ne gigalo ni gibiro nwang’o pok mang’eny mokadho kanyo, to kata kamano, gin bende ne omigi mana siling’ achiel achiel.

¹¹To kane gikawo pok gi ne ging’ur ni wuon puodho ka giwacho niya,

¹²‘Ji manende obiro achien-gi osetiyo mana kuom sa achiel kende, to ere gima omiyo isemiyogi pok mana marom kodwa? Wan donge ema wasechandore gi tich matek odiechieng’ ngima, to chieng’ makech chamowa?’

¹³To ng’atno nodwoko achiel kuomgi niya, ‘Omera, onge gima rach ma asetimoni. Donge nende wawinjore kodi ni abiro chuli siling’ achiel?

¹⁴Kara, kaw pokni mondo idhi! An ema ahero miyo joma nende ochako tich achien-gi pok marom gi mau!

¹⁵Donge an gi ratiro mar timo gima adwaro gi pesana awuon? Koso in gi nyiego nikech ineno ni an ng’at mang’won?’ ”

¹⁶ Eka Yesu notieko, kawacho niya, “Kamano joma koro odong’ chien notel, to joma koro otelo nodong’ chien!”

¹⁷Kane oyudo Yesu nie yo dhi Jerusalem, nokawo jopuonjrene apar gariyo, motero tenge kar kendgi, mowachonigi ka giwuotho niya,

¹⁸“Winjuru! Koro wadhi Jerusalem, kuma ibiro chiwie Wuod Dhano e lwet jodolo madongo gi jopuonj Chik. Gining’adne buch tho,

¹⁹mi gikete e lwet joma ok jo-Yahudi mondo ochare kendo ochwade mi gure e msalaba. To chieng’ mar adek nochiere.”

²⁰Bang’e min yawuot Zebedi nobiro ir Yesu gi yawuote. Ne ogoyo chonge piny mondo okwaye gimoro.

²¹Yesu nopenje ni, “En ango’ midwaro?” Nodwoke ni, “Yie igol chik mondo wuoda achiel obed e badi korachwich, to machielo obedi e badi koracham, kisekawo lochni.”

²²To Yesu nodwokogi niya, “Ok ung’eyo gima ukwayo! Uparo ni unyalo madho kikombe mar masira ma abiro madho?” Ne gidwoke ni, “Ee, wanyalo.”

²³Eka nowachonigi niya, “Adier ubiro madho kikombena to yiero ng’ama onego bedi e bada korachwich kata e bada koracham, to ok nie tekona. Wuora ema nochiw kuondego ni joma oseiknigi.”

²⁴Kane jopuonjrene apar modong’ owinjo wachno ne gisin gi owete ariyogo.

²⁵ To Yesu noluongogi giduto, mowacho nigi niya, “Ung’eyo ni ruodhi mag piny tiyo jogi gi thuon, kendo jogo man gi loch nigi teko kuom joma gitiyo.

²⁶ Kuomu to, ok nobed kamano. To ka ng’ato kuomu dwaro bedo gi duong’, to nyaka obed jatichu,

²⁷kendo ka ng’ato dwaro bedo jatendu, to nyaka obed misumbau,

²⁸mana kaka Wuod Dhano bende ne ok obiro mondo ji otine, to mana ni mondo oti ni ji, kendo mondo ochiw ngimane owargo ji mang’eny.”

²⁹Kane giwuok Jeriko, oganda maduong’ noluwo Yesu.

³⁰Muofni ariyo mane obet piny e dir yo nowinjo ni Yesu kadho, omiyo ne gikok niya, “Wuod Daudi, kechwa”

³¹Ji nokwerogi ni mondo giling’, to ne gimedo mana kok matek niya, “Ruoth, kechwa! Wuod Dhano, kechwa!”

³²Yesu nochung’, mi oluongogi, kendo openjogi niya, “Ere gima udwaro ni mondo atimnu?”

³³Ne gidwoke ni, “Ruoth, wadwaro mondo iyawnwa wengewa”

³⁴Yesu nokechogi, omiyo nomulo wengegi, mi wengegi oyepo mana gikanyono. Eka ne giluwe.