Read luo Mathayo 21 Bible Online

Mathayo 21 - luo bible

Mathayo 21

¹Kane gichopo Bethfage e got Zeituni, man machiegni gi Jerusalem, Yesu nooro jopuonjrene ariyo nyime, kowachonigi niya,

²“Dhiuru e dala man nyimu cha, to gikanyono mudonjoe ubiro nwang’o kanyna motue, kaachiel gi nyathine. Gonygiuru mondo ukelna gi.

³To ka ng’ato openjou gimoro, to wachneuru ni, ‘Wuon-gi dwarogi.’ Kowinjo wachno, to obiro yie ukawgi mana gi sano.”

⁴Mano notimore mondo wach mane janabi owacho ochopi. Nowacho niya,

⁵ ‘Nyisuru jo-Sayun ni, Neuru! Ruoth biro iru, kamuol, kendo koidho kanyna. Chutho oidho kanyna matin. Adier, en mana nyathi kanyna.’

⁶Jopuonjrego nodhi, motimo kaka Yesu nowachonigi.

⁷Ne gikelo kanyna gi nyathine, mi gipedho lepgi e dieng’egi, mi Yesu obetie.

⁸Ji mathoth nopedho lepgi e yo, to jomoko nong’ado bede yien ema opedho e yo.

⁹ Joma notelo nyim Yesu, kod joma ne luwo bang’e nokok niya, “Duong’ obed ni Wuod Daudi! Ogwedh ng’ama biro e nying Ruoth! Duong’ obed ni Nyasaye e polo malo!”

¹⁰Kane Yesu odonjo Jerusalem, dala duto nosakni, ka ji penjore ni, “Jali en ng’a?”

¹¹To oganda mane kowo Yesu nodwokogi ni, “Ma e Yesu, janabi moa Nazareth e piny Galili.”

¹²Yesu nodonjo e Hekalu, moriembo ji duto mane loko ohala kendo ng’iewo gik moko kanyo. Nokawo mesni mag jowil pesa, kod kombe mag jolok akuche, mogoyo piny.

¹³ Eka nowachonigi niya, “Ondiki e Muma ni, ‘Oda noluong ni od lemo.’ Un to uloke od jomecho!”

¹⁴Muofni kod rang’onde nobiro ire e Hekalu, mochangogi.

¹⁵To kane jodolo madongo kod jopuonj Chik oneno honni mane otimo, kendo kaka ne nyithindo kok ei Hekalu ni, “Duong’ obed ni Wuod Daudi,” mirima nomakogi,

¹⁶ mi giwachone niya, “Bende iwinjo gima jogi wacho?” To Yesu nodwokogi ni, “Ee, awinjo. To pok usomo Muma kama wacho ni, ‘Isemiyo nyithindo mayom, koda ka mago mapod dhoth, paki maber’?”

¹⁷Bang’ mano noa Jerusalem oweyogi, modhi obworo Bethania.

¹⁸Kinyne gokinyi, kane Yesu dok Jerusalem, kech nochako kaye.

¹⁹Noneno ng’owo moro e bath yo, to kane osudo bute machiegni, ne ok oyudo olemo kuome, to mak mana pote kende. Omiyo nowacho ni yadhno niya, “Kik ichak inyag olemo kendo nyaka chieng!” Gikanyono ng’owono notwo.

²⁰Kane jopuonjrene oneno gima otimore ni yadhno, ne giwuoro, mi gipenjo niya, “Ere kaka ng’owoni otwo piyo kama?”

²¹ To Yesu nodwokogi ni, “Awachonu adier ni, ka un gi yie, ma ok uriwo gi kiawa to un bende unutim gima otim ni ng’owoni. To ok mano kende ema nubed gi teko mar timo, to kata mana godni, kuwachone ni, ‘Mukri, inyumri e nam,’ to notimre mana kamano.

²²Ka un gi yie, to unuyud gimoro amora mukwayo kulemo.”

²³Kane Yesu ochako odonjo e Hekalu, jodolo madongo kod jodong oganda nobiro ire kane oyudo opuonjo, mopenje niya, “Ere teko ma in-go, momiyo itimo gik makamagi? Koso ng’ama omiyi teko mar timogi?”

²⁴To Yesu nodwokogi niya, “An bende abiro penjou gimoro achiel kende, kendo ka udwoka to eka abiro nyisou kuma ayudoe e teko ma atimogo gigi.

²⁵Teko mane Johana batisogo ji noa kanye? Ne oa e polo koso noa kuom dhano?” Eka jogo nochako wuoyo e kindgi giwegi, ka gipenjore ni, “Ere kaka dwadwoke? Ka wawacho ni teko Johana noa kuom Nyasaye to obiro penjowa gimomiyo ne ok wayie kuom Johana.

²⁶To ka wawacho ni noa kuom dhano, to ji nyalo hinyowa, nikech ji duto oyie ni Johana en janabi.”

²⁷Kuom mano ne gidwoko Yesu ni, “Ok wang’eyo.” Eka yesu nowachonigi ni, “Ka kamano, to an bende ok anyal nyisou kuma ayudoe teko matimogo gigi.

²⁸“To koro uparo nadi kuom wachni? Ng’at moro ne nigi yawuowi ariyo. Nodhi ir wuode maduong’, mowachone niya, ‘Nyathina, kawuono dhiyo mondo iti e puoth mzabibu.’

²⁹Wuodeno nodwoke ni, ‘Ee, adhi.’ To kata kamano ne ok odhi.

³⁰Bang’ mano, ng’atno nodhi ir wuode machielo, mowachone mana kaka nowacho ni wuode maduong’. Wuowini to nodwoke ni, ‘Ok adhi.’ To achien noloko parone, modhi.

³¹To koro apenjou ni, kuom yawuowi ariyogo, ere ng’ama notimo gima ne wuon mare dwaro?” Ne gidwoke ni, “Wuowi matin.” Eka Yesu nowachonigi niya, “Adier awachonu ni josol osuru gi jochode kwongonu donjo Piny Ruodh Nyasaye.

³² Awacho kamano nikech Johana nobiro iru, monyisou yo makare monego uluw, to ne utamoru yie wachne. Josol osuru gi jochode to noyie. To kata obedo ni ne uneno kamano, to ne ok ulokoru mondo uyie wachne.

³³ “Koro winjuru ngero machielo. Ne nitie ng’at moro mane oloso puoth mzabibu. Nochielo puodhono, mokunyone bur mibiyoe mzabibu, kendo ogerone kar rito. Eka ne oweye e lwet jopur, mi owuok odhi e piny moro mabor.

³⁴To kane ndalo pono mzabibu ochopo, nooro jotichne ir jopurgo, mondo oomne olemo monego oyudi.

³⁵To jopur nomako jotichnego mi ogoyo achiel, to moro ginego, kendo machielo gigoyo gi kite.

³⁶Wuon puodho nochako ooro jotich mamoko, mang’eny moloyo mokwongo ka, to jogo notimonigi mana kaka ne gitimo ni jotich mokwongo kande.

³⁷To e gikone nooro wuode irgi, koparo ni, ‘Wuoda to ang’eyo i ngibiro miyo luor’

³⁸To kane jopurgo oneno wuode ne giwacho e kindgi giwegi ni, ‘Jali ema biro bedo wuon lowo, omiyo biuru wanege, mondo wakaw lope.’

³⁹Kuom mano ne gimake mi giwite oko e tok puoth mzabibu, kendo ginege.

⁴⁰“To koro apenjou ni, ka wuon puodho obiro, to ang’o ma notim ni jopurgo?”

⁴¹Ne gidwoke ni, “Enoneg jomarichogo gi nek marach, mi okaw puotheno omi jopur moko nono manyalo miye olemo monego oyudi e kinde ka kinde ma olemo ochiekie.”

⁴² Eka Yesu nopenjogi ni, “Pok usomo e Muma niya, ‘Kidi mane jogedo odagi, ema koro osedoko kidi motegno moriwo kor ot. Mano en tich Ruoth Nyasaye, kendo en gima lichnwa miwuoro’?

⁴³“Emomiyo awachonu ni Loch Nyasaye ibiro golo kuomu, kendo nomiye oganda moro manyalo nyago olemo makare. [

⁴⁴Ng’ato ang’ata mopodho kuom kidino, notur matindotindo, to ka kidino ema opodho kuom ng’atno, to norege ka buru!]”

⁴⁵Kane jodolo madongo gi jo-Farisai owinjo ngechenego, ne ging’eyo ni owuoyo mana kuomgi.

⁴⁶Omiyo ne gidwaro make, to kata kamano ne giluoro ji, nikech ji ne oyie ni Yesu en janabi.