Read luo Mathayo 22 Bible Online

Mathayo 22 - luo bible

Mathayo 22

¹Yesu nochako wuoyo kodgi gi ngeche, kawacho niya,

²“Loch Polo chalo gi ruoth mane oloso nyasi mar kisech wuode.

³Ne ooro jotichne mondo odhi onyis joma oluongi mondo obi, to joma oluonggo nodagi.

⁴Omiyo nochako ooro jotich mamoko, kowachonigi ni mondo ginyis joma oluonggo niya, ‘Nyasi oseikore, kendo aseyang’o ruetha gi jamba moko machwe, kendo gik moko duto oselosi. Omiyo biuru e kisera.’

⁵To joma noluonggo ne ok odewo wachno, mi ng’at achiel nodhi adhiya e puodho, to machielo odhi e ohande,

⁶to joma moko nomako jotichnego, motimonigi malit, kendo onegogi.

⁷Mirima nohewo ruodhno, omiyo nooro askechene, mi odhi otieko jonekgo, kendo owang’o dalagi.

⁸Eka nowacho ni jotichne niya, ‘Kisera koro oseikore, to joma ne oluongi ok oromo betie e kiserani.

⁹Kuom mano, dhiuru e akek yore mondo uluong ji duto munwang’o obi e kisera,’

¹⁰Omiyo jotich nodhi e akek yore, mochoko ji duto mane ginwang’o, joma richo kod joma beyo machalre, mi welo nopong’o siwandha.

¹¹“To kane ruoth obiro neno welo, noyudo ng’at moro kanyo ma ok orwako law kisera,

¹²mi owachone ni, ‘Omera, ere kaka idonjo ka, to ionge gi law kisera?’ To dho ng’atno nomoko.

¹³ Eka ruoth nowacho ni jotichne niya, ‘Tueuru luetene gi tiendene, mondo uwite oko e mudho mandiwa, kuma ywagruok kod muodo lak nitie.’ ”

¹⁴Yesu notieko ka wacho ni, “Ji ma iluongo ng’eny, to joma iyiero nok.”

¹⁵Bang’e jo-Farisai nodhi, mi jopimo wach kaka digindhog Yesu gi weche mowacho.

¹⁶Eka ne gioro jopuonjre maggi kod jo-Herode ire, mi jogo nodhi openje niya, “Japuonj, wang’eyo ni in jaadiera, kendo ipuonjo yor Nyasaye gi adiera, ma ok iluoro wang’ ng’ato, bed ni en ng’ama nadi.

¹⁷Koro nyiswae gima iparo kuom wach golo osuru. Chikwa oyie mondo wagol osuru ni Kaisar, koso ok oyie?”

¹⁸To Yesu nong’eyo paro marach ma gin-go, omiyo nodwokogi niyya, “Ang’o momiyo utema, un andhokegi?

¹⁹Nyisauru ane pesa migologo osuru.” Kuom mano ne gikelo ne siling’,

²⁰mi openjogi niya, “Kidoni gi nying’ni mag ng’a?”

²¹Ne gidwoke ni, “Gin mag Kaisar.” Eka Yesu nowachonigi niya, “Emomiyo, chiwuru ni Kaisar gi Kaisar, to gi Nyasaye chiwuru ni Nyasaye.”

²²To kane giwinjo kamano, ne giwuoro, mi giweye gidhi.

²³ Chieng’onogo jo-Sadukai nobiro ir Yesu. (Gin e joma wach ni chier onge)

²⁴ Ne giwachone niya, “Japuonj! Musa nopuonjowa ni, ka ng’ato otho maonge nyathi, to owadgi nyaka kaw chiege mondo onywolnego nyithindo.

²⁵To ne nitie owete abiriyo mane odak kodwa ka. Wuowi maduong’ nokendo, to otho ka ok onywolo nyathi, omiyo chiege nodong’ ni owadgi maluwe.

²⁶Gima kamano bende ema notimore ni owadgi mar ariyo gi mar adek, nyaka mar abiriyo.

²⁷To bang’ tho jogo duto, dhakono bende notho.

²⁸Koro, chieng’ chier, to dhakono nobed chi ng’a kuom ji abiriyogo, nikech giduto ne gibet kode?”

²⁹To Yesu nodwokogi niya, “Uruenyo, nikech ok ung’eyo weche manie Muma kata teko mar Nyasaye bende ok ung’eyo.

³⁰Bang’ chier, ji ok nokendre, to ginichal gi malaika manie polo.

³¹“To kuom wach chier mar joma otho, pok usomo gima ne Nyasaye owachonu ni,

³² An e Nyasach Ibrahim, gi Nyasach Isaka, kod Nyasach Jakobo’? To wang’eyo ni Nyasaye ok en Nyasach joma otho, to en Nyasach joma ngima.”

³³Kane ji owinjo wachno, ne giwuoro puonjne.

³⁴To kane jo-Farisai owinjo ni Yesu osemako dho jo-Sadukai gi wach, ne gichokore kanyakla,

³⁵mi ng’at achiel kuomgi, ma japuonj Chik, nopenje, kateme, niya,

³⁶“Japuonj, ere chik Musa maduong’ie moloyo chikene mamoko duto?”

³⁷ Yesu nodwoke ni, “Her Ruoth Nyasachi gi chunyi duto, kendo gi paroni duto, kendo gi riekoni duto.

³⁸Mano e chik mokwongo kendo maduong’ie moloyo.

³⁹ To chik mar ariyo ma bende chalo kode e ma: Her wadu kaka iherori iwuon.

⁴⁰ Chike Musa duto, kod puonj mag jonabi otenore mana kuom chike ariyogo.”

⁴¹Kane jo-Farisai osechokore molworo Yesu kamano, nopenjogi niya,

⁴²“Uparo ang’o kuom Mesia? En nyakwar ng’a?” Ne gidwoke ni, “En nyakwar Daudi.”

⁴³Eka nomedo penjogi ni, “Ere gima omiyo Roho Maler nomiyo Daudi owuon oluongo Mesia ni, Ruodhe? Apenjo kamano nikech Daudi nowacho niya,

⁴⁴ ‘Ruoth Nyasaye nowacho ni Ruodha ni, “Bed e bada korachwich ka, nyaka chop aket wasiki e bwo tiendi.” ’

⁴⁵Koro, ka Daudi ema luongo Mesia ni Ruoth kamano, to ere kaka Mesia dibed nyakwar Daudi?”

⁴⁶Onge ng’ama ne nyalo dwoke kata wach achiel, to bende, chakre chieng’no, onge ng’ama nohedhore penje wach moro kendo.