Read luo Mathayo 26 Bible Online

Mathayo 26 - luo bible

Mathayo 26

¹Kane Yesu osetieko wechego duto, nowacho ni jopuonjrene niya,

² “Ung’eyo ni bang’ ndalo ariyo Sap Pasaka biro betie, kendo nondhog Wuod Dhano mondo ogur e msalaba,”

³To e kindeno, jodolo madongo kod jodong oganda ne jochokre e laru mar jadolo maduong’ ma nyinge Kaiafa.

⁴Ne gichano kaka digimak Yesu ling’ling’ mondo ginegi.

⁵To ne gineno ni ber mondo kik gimake e ndalo Sawo, nikech dipo ka ji otimo koko.

⁶Kane Yesu ni Bethania e od Simon jadhoho,

⁷ dhako moro nobiro ire gi chupa molos gi alabasta, moting’o mo mang’ue ng’ar ma nengone tek, mi oolo e wi Yesu, ka Yesu chiemo.

⁸To kane jopuonjrene oneno kamano, mirima nomakogi, mi gipenjore niya, “Morni iketho nang’o?

⁹Ka da ni oloke, to da okelo pesa mang’eny, mi opog ni joma odhier.”

¹⁰To Yesu nong’eyo gima giparo, mowachonigi niya, “Ere gima omiyo uchando dhakoni? Osetimona gima kare kendo maber.

¹¹ Joma odhier ni kodu ndalo duto, to an ok an kodu ndalo duto.

¹²Kane oolo morni kuoma, to nomiyo ringra odoko moikore ni yik.

¹³Awachonu adier ni kamoro amoro ma nolandie wach maber man kuomani e piny duto to gima dhakoni osetimo bende nohul, kiparego.”

¹⁴Bang’e, ng’at achiel kuom jopuonjre Yesu apar gariyo, ma nyinge Judas Iskariot, nodhi ir jodolo madongo,

¹⁵ mopenjogi niya, “Ang’o ma dumiya, ka aketo Yesu e luetu?” Kuom mano ne gimiye siling’ piero adek.

¹⁶Omiyo chakre chieng’no, Judas nochako rango yo ma dondhoggo Yesu.

¹⁷Chieng’ mokwongo mar Sap makati ma ok ketie Thowi, jopuonjre Yesu nodhi ire, mopenje ni, “Ere kama idwaro ni mondo waiknie Sap Pasaka?”

¹⁸Nodwokogi niya, “Dhiuru Jerusalem ir ng’at moro, mondo uwachne ni, ‘Japuonj owacho ni sane osechopo, kendo obiro chamo Sap Pasaka e odi kod jopuonjrene.’ ”

¹⁹Jopuonjrene notimo kaka Yesu nowachonigi, mi gidhi giiko Pasaka.

²⁰Kane koro piny oseyuso, Yesu nobet piny kod jopuonjrene apar gariyo mondo ochiem,

²¹kendo kane oyudo gichiemo nowachonigi niya, “Awachonu adier ni ng’at achiel kuomu biro ndhoga.”

²²Kane giwinjo kamano, chunygi nochandore malit, mi moro ka moro openje ni, “Ruoth, en an koso?”

²³ Yesu to nodwokogi niya, “Ng’at achiel maluto lwete koda e tawo kuomu, un ji apar gariyo, ema biro ndhoga.

²⁴Wuod Dhano biro tho mana kaka Muma wacho, to mano kaka nodok malit ni ng’at ma biro ndhoge! Da obedo maber ni ng’atno ka dine ok onywole.”

²⁵To Judas, mane biro ndhoge, nopenje niya, “Japuonj an e ng’atno koso?” Eka Yesu nodwoke ni, “Isewacho.”

²⁶Kane gichiemo kamano, Yesu nokawo makati, moguedho, eka nong’ingo, momiyo jopuonjrene, kowacho niya, “Kawuru, ucham. Ma e ringra.”

²⁷Bang’e nokawo kikombe, kendo kane osegoyo ni Nyasaye erokamano, nomiyogi kowacho niya, “Madhuru uduto,

²⁸ nikech ma e remba, mochuer ni ji mang’eny, kitimonigigo Winjruok gi Nyasaye mondo owenigi richogi.

²⁹Awachonu ni chakre kawuono ok nachak amadh divai ngang’ nyaka chop amadh divai manyien kodu e piny Wuora.”

³⁰Bang’ mano ne giwer, to kane gisewer, ne giwuok gidhi e got Zeituni.

³¹ Eka Yesu nowachonigi niya, “Uduto ubiro ringo uweya gotienoni nikech gima ang’ notimrena, nimar ondiki e Muma ni, ‘Ananeg jakwath, mi rombe noke.’

³² To ka osechiera, to natel nyimu adhi Galili.”

³³To Petro nodwoke niya, “Kata ka ji duto oringo oweyi nikech gima otimoreni, anto ok naweyi ngang’.”

³⁴Yesu nodwoke ni, “Adier awachoni ni, otieno ma kawuononi, ka pok thuon gweno okok, to ibiro kweda didek.”

³⁵To Petro nokone niya, “Ooyo, ok nakwedi ngang’ kata ka ochuno ni nyaka atho kodi.” Jopuonjrene mamoko duto bende nowacho mana kamano.

³⁶Bang’e yesu nodhi gi jopuonjrene kama iluongo ni Gethsemane, mi owachonigi niya, “Beduru kaeri, ka anto adhi kucha mondo alem.”

³⁷Nokawo Petro gi yawuot Zebedi ariyo odhigo. Eka chunye nochako doko malit, ka oparore ahinya.

³⁸Nowachonigi niya, “Chuny lit ma an-go lich, madwaro mana nega. Beduru ka, kukonya rito.”

³⁹Eka nochwalore nyime matin, mopodho piny auma, kolemo niya, “A Wuora, kanyalore to kikombe mar masira ni mondo okadha; to kik obed kaka an ema adwaro to mana kaka in ema idwaro.”

⁴⁰Eka nodok ir jopuonjrene adek kande, moyudo ka nindo oterogi, mi owacho ni Petro ni, “Kara unindo! Ok unyal konya rito kata mana kuom sa achiel kende?

⁴¹Beduru kuneno mondo ulem, kik udonj e tem. Adier, chuny oyie, to ringruok ema nyap.”

⁴²Yesu nochako odok mar ariyo, mi olemo niya, “Wuora, ka kikombeni ok nyal kadho mak amadho, to gima idwaro ema mondo otimre.”

⁴³Ne ochako odwogo, monwang’o ka nindo ochako oterogi nikech wengegi ne pek.

⁴⁴Ne oweyogi, mi ochako odok olemo kendo mar adek, konwoyo mana weche mane osewacho mokwongo.

⁴⁵Bang’e ne ochako odwogo ir jopuonjrene, mopenjogi niya, “Pod unindo aninda kuyueyo? Winjuru, sa koro chiegni mibiro chiwoe Wuod Dhano e lwet joricho.

⁴⁶Chunguru, wadhiuru. Ero, jandhona osekayo machiegni.”

⁴⁷Kane Yesu pod loso, Judas, ma achiel kuom jopuonjre apar gariyo, notucho gi oganda maduong’ man gi ligengni kod arunge, koa ka jodolo madongo kod jodong oganda.

⁴⁸Jandhokne nosenyiso jogo gima obiro timo, kowachonigi niya, “Ng’at ma ang’ amoso kanyodho e en. Makeuru!”

⁴⁹Kamano Judas nodhi ir Yesu piyo-piyo, monyodhe, komose ni, “Misawa, japuonj.”

⁵⁰To Yesu nowachone niya, “Omera, tim atima gima okeli.” Eka jogo nobiro momako Yesu matek.

⁵¹To ng’at achiel kuom joma ne nigi Yesu norieyo bado, mowuodho liganglane, mochadhogo it jatich jadolo maduong’ oko.

⁵²To Yesu nowachone niya, “Dwok liganglani e olalo, nikech ji duto makawo ligangla notho mana tho ligangla.

⁵³Uparo ni ok anyal kwayo Wuora, mi oorna piyopiyo malaika mang’eny moloyo ogend lweny apar gariyo?

⁵⁴To ka kamano, to wach Muma mawacho ni gigi nyaka timre, dichop nadi?”

⁵⁵ Sa nogo Yesu nowacho ni oganda mane obirono niya, “Ere gima omiyo ubirona gi ligengni kod arunge, ka joma dwaro jamecho? Pile yande abet ka apuonjo e Hekalu, to ne ok umaka.

⁵⁶To magi duto otimore mondo wach mane jonabi ondiko ochop kare.” Eka jopuonjrene duto noringo moweye.

⁵⁷Joma ne omako Yesu notere e od Kaiafa, jadolo maduong’ kuma ne jopuonj Chik kod jodong oganda osechokore.

⁵⁸To Petro noluwe gi chien nyaka laru mar jadolo maduong’. Nodonjo kanyo mobet piny gi jorit, mondo owinj giko mar wachno.

⁵⁹Jodolo madongo gi jobura duto ne dwaro weche mag mirambo ma digidonjnigo ni Yesu mondo onegi.

⁶⁰To ne ok ginwang’o wach moro, kata obedo ni joneno mang’eny mag miriambo nobiro kamano. To mogik, ji ariyo nochung’ e nyim jobura,

⁶¹ mowacho niya, “Ng’atni nowacho ni onyalo ketho Hekalu mar Nyasaye, mi kendo ochak ogere kuom ndalo adek.”

⁶²Eka jadolo maduong’ nochung’ mopenjo Yesu ni, “Ok idwokie wach moro kuom weche ma jogi donjonigo koso?”

⁶³Yesu to noling’ aling’a thi. Jadolo maduong’ nowachone niya, “Aketi mondo ikuong’ri gi nying Nyasaye Mangima: Nyiswa ane ka in Kristo, Wuod Nyasaye.”

⁶⁴ Yesu nodwoke ni, “Ero, isewacho, to awachonu ni chakre kawuono, ubiro neno Wuod Dhano kobet e bat korachwich mar Nyasaye Ma Nyalo Gik Moko Duto, kobiro e boche polo.”

⁶⁵ Kane jodolo maduong’ owinjo kamano, noyiecho lawe kowacho ni, “Oseyanyo Nyasaye! Koro ang’o momiyo pod wadwaro joneno? Ero, usewinjo kaka oyanyo Nyasaye!

⁶⁶Un uneno ang’o?” Ne gidwoke ni, “Bura oloye! Nyaka otho!”

⁶⁷ Bang’e ne ging’udho kuome olawo, mi gigoye adhong’, kendo githale,

⁶⁸ka gipenje ni, “In Kristo! Hulnwa ane ng’ama ogoyi!”

⁶⁹To noyudo Petro obet oko e laru. Jatich moro manyako nodhi ire, mowachone niya, “In bende ne in kod Yesu ja-Galili.”

⁷⁰To ne okwer e nyimgi duto, kowacho ni, “Ok ang’eyo gima iwacho.” Eka noa kanyo, modhi e dho rangach.

⁷¹Nyako machielo nonene kueno, mowacho ni joma ne ni kanyo niya, “Jali bende ne ni kod Yesu ja-Nazareth.”

⁷²To ne ochako okwer kendo, kokuong’ore niya, “Ok ang’eyo ng’atno!”

⁷³Bang’ kinde matin, joma nochung’ kanyo nosudo machiegni, mowacho ni Petro niya, “Kwerie ane ka ok in achiel kuomgi, nikech dhok miwacho ema fwenyi.”

⁷⁴Eka nochako kuong’ore, koramo ni, “Ok ang’eyo ng’atno.” To gikanyono thwon gweno nokok,

⁷⁵mi Petro noparo gima ne Yesu osewacho ni, “Kapok thwon gweno okok to nikweda didek.” Mano omiyo Petro nowuok oko, moywak malit.