Read luo Mathayo 27 Bible Online

Mathayo 27 - luo bible

Mathayo 27

¹Kane piny oru gokinyi mang’ich, jodong oganda nopimo wach kaka digineg Yesu.

²Eka ne gitueye mi gigole kanyo, gitere ir Pilato, ruoth mane jo-Rumi oketo.

³ Kane Judas, jandhok Yesu oneno ni oseng’ad ni Yesu buch tho, chunye nodoko malit ahinya, nodwoko siling’ piero adek kande ni jodolo madongo kod jodong oganda,

⁴kowachonigi niya, “Asetimo richo kuom ndhogo remo ma onge ketho.” To ne gidwoke ni, “Mano obadho mana in! Ok en wachwa.”

⁵Kane Judas owinjo kamano, nowito pesago e Hekalu, modhi odere.

⁶Jodolo madongo nokawo pesago, kawacho e kindgi niya, “Chik ok oyie mondo oket pesagi kar keno mar Hekalu, nikech gin pesa remo.”

⁷Omiyo ne gipimo wach, mi ging’iewo puoth jachue agulni gi pesago mondo obed kama inyalo yikoe joma welo.

⁸Mano emomiyo puodhono iluongo ni Puoth Remo nyaka chil kawuono.

⁹ Kamano gima ne Jeremia janabi okoro notimore. Nosekoro niya, “Ne gikawo siling’ piero adek, ma en nengo mar ng’at mane jo-Israel moko ogoyo nengone,

¹⁰mi ging’iewo puoth jachue agulni, kaka ne Ruoth Nyasaye ochika.”

¹¹Yesu koro noter e nyim ruoth Pilato, mi ruoth nopenje niya, “In e ruodh jo-Yahudi koso?” Yesu to nodwoke ni, “In ema isewacho kamano.”

¹²To kane jodolo madongo gi jodong oganda ochung’ donjone, to ne ok odwoko gimoro.

¹³Eka Pilato nowachone niya, “Donge iwinjo weche madongo ma jogi donjonigogi?”

¹⁴To Yesu ne ok odwoko kata wach achiel, omiyo ruoth nowuoro ahinya.

¹⁵To higa ka higa e Sap Pasaka, ruoth ne gonyo ng’at achiel ma ji okwaye kuom joma otue.

¹⁶To ndalogo noyudo nitie ng’at motue marahuma, ma nyinge Yesu Baraba.

¹⁷Omiyo kane ji osechokore kanyakla, Pilato nopenjogi niya, “Ng’ano mudwaro mondo agonynu, Yesu Baraba, koso Yesu miluongo ni Mesia?”

¹⁸Nowacho kamano nikech nong’eyo maber ni gitero Yesu ire mana nikech nyiego.

¹⁹Kane oyudo obet e kom ng’ado bura, chiege noorone wach niya, “Kik imul wach ng’at makareno, nikech wachne nende ochanda ahinya e lek gotieno.”

²⁰To noyudo jodolo madongo gi jodong oganda osesemo ji mondo okwa Pilato ogonynigi mana Baraba, to Yesu mondo onegi.

²¹Emomiyo kane ruoth openjogi ng’at mane gidwaro mondo ogonynigi kuom ji ariyogo, to ne gidwoke ni, “Gonynwa Baraba!”

²²Eka Pilato nopenjogi ni, “To ka kamano, to atim ang’o gi Yesu miluongo ni Mesia?” Giduto ne gidwoke niya, “Gure e msalaba!”

²³To nochako openjogi ni, “Ere gima rach mosetimo, momiyo onego ogure?” To ne gimedo kok moloyo, ka giwacho ni, “Gure!”

²⁴ Kane Pilato oneno ni ok ginyal yie kode, kendo tulo ema dwaro wuok, nokawo pi, mologo e nyim ji, kowacho niya, “An aonge bura kuom remb ng’atni. Mano en wachu!”

²⁵To ji duto nodwoko niya, “Rembe mondo obed e wiwa, kendo e wi nyithindwa.”

²⁶Eka Pilato nogonyonigi Baraba, kendo kane osegolo chik mochwad Yesu malit, nochiwe mondo ogure e msalaba.

²⁷Bang’e askeche ruoth nokawo Yesu, motero e laru mar od ruoth, mi gichoko askeche duto, molwore.

²⁸Ne gilonyo lepe, mi girwakone kandhu makwar.

²⁹Bende ne giloso osimbo mar kudho mi gisidhone e wiye. Eka ne giketo luth e lwete korachwich, ka gichare, kendo giwachone niya, “Ruodh jo-Yahudi mondo odag aming’a!”

³⁰Ne ging’udho kuome olawo, kendo ne gikawo ludh cha, mi gichwadogo wiye.

³¹Kane gisetieko chare kamano, ne gilonyo kandhu oko kuome, mi girwakone lepe owuon. Eka ne gitere oko mondo gigure e msalaba.

³²Kane giwuok oko, ne ginwang’o ja-Kurene moro ma nyinge Simon, mi gichuno mondo oting’ni Yesu msalape.

³³Kane gisechopo kama iluongo ni Golgotha, tiende ni ‘Kar Hanga Wich’,

³⁴ ne gimiyo Yesu divai moruw gi yath makueyo rem mondo omadhi to kane osebile, notamore madhe.

³⁵ Eka ne gigure, mi gipogore lepe gi ombulu.

³⁶Bang’ mano ne gibet piny kanyo ka girite.

³⁷Wach modonjnego, mawacho ni, “JALI E YESU, RUODH JO-YAHUDI”, noket e wi msalaba malo.

³⁸Jomecho moko ariyo bende nogur kode, achiel e bathe korachwich, to machielo e bathe koracham.

³⁹ Joma ne kadho kanyo nojaro Yesu, katwenyone umgi,

⁴⁰ kendo wachone niya, “In mane iwacho ni ibiro muko Hekalu, mi ichak iger bang’ ndalo adek, koro resri ane, ilor ia e msalaba, ka in Wuod Nyasaye adier!”

⁴¹Kamano bende e kaka jodolo madongo gi jopuonj Chik kod jodong oganda nochare, kawacho niya,

⁴²“Noreso jomoko, to en koro dak oresre? Donge en ruodh Israel? Koro mondo olor ane oa e msalaba, eka wayie kuome.

⁴³ Osebedo ka ogeno kuom Nyasaye mondo orese ane kohero, nikech nowacho ni en Wuod Nyasaye!”

⁴⁴Jomecho mane ogur kode bende noyanye mana kamano.

⁴⁵Piny duto notimo mudho, chakre sa auchiel nyaka sa ochiko,

⁴⁶ kendo kar sa ochikono Yesu nokok matek niya, “Eli, Eli, lama sabakthani?” tiende ni, “Nyasacha, Nyasacha, iweya nang’o?”

⁴⁷Jomoko mane ochung’ kanyo nowinjo wechego, mowacho niya, “Ng’atni luongo Elija.”

⁴⁸ To ng’at achiel kuomgi noringo piyopiyo, mokawo sipanj, onyumo e kong andwayo. Eka nochwowo sipanjno e dho odundu motero e dho Yesu gi odunduno mondo onyodhi.

⁴⁹Jomoko to nowacho niya, “Weuru wane ane ka Elija biro biro rese.”

⁵⁰To Yesu nochako okok matek, eka noweyo chunye owuok, motho.

⁵¹ Gikanyono nanga mane ogeng’o Kama Ler mar Hekalu noriedore diere ariyo, chakre malo nyaka piny. Piny noyiengni, kendo lwendni nobarore.

⁵²Liete bende noyawore, kendo jo Nyasaye mang’eny mane osetho nochier.

⁵³Bang’ chier Yesu, jogo nowuok e lietegi, modhi Jerusalem, Dala Maler, mi ji mathoth onenogi kuno.

⁵⁴Kane jaduong’ lweny kod joma ne konye rito Yesu oneno kaka piny yiengni, kendo kaka gik moko timore, ne gibedo maluor ahinya, mi giwacho niya, “Adier, ng’atni ne en Wuod Nyasaye!”

⁵⁵ Mon mang’eny bende ne ni kanyo, ka ng’icho gi chien. Ne gisebedo ka giluwo Yesu, ka gitiyone.

⁵⁶Kuomgi kanyo ne nitie Maria nyar Magdala, gi Maria min Jakobo gi Josef, kod min Yawuot Zebedi.

⁵⁷Kane piny ochopo odhiambo, ja-Arimathaya moro ma jamoko ma nyinge Josef nobiro. En bende ne en japuonjre Yesu.

⁵⁸Nodhi ir Pilato, mokwaye mondo omiye ringre Yesu, mi Pilato nogolo chik mondo omiye.

⁵⁹Josef nokawe, moboye gi nanga maler,

⁶⁰eka nokete e bur manyien, mane osekunyo ariwa e kor lwanda. (En bur mane oloso mondo chieng’ moro oyikee, kotho.) Bang’e nong’ielo kidi maduong’ moloro dho bur, mi oa odhi.

⁶¹Maria nyar Magdala gi Maria machielo ne ni kanyo, kobet momanyore gi liel.

⁶²To kinyne, mane en chieng’ maluwo bang’ chieng’ Ikruok, tiende ni chieng’ Sabato, jodolo madongo gi jo-Farisai nochokore modhi ir Pilato, mowachone niya,

⁶³ “Ruoth, wanyalo paro ni kane jawuondno pod ngima, nowacho ni obiro chier bang’ ndalo adek.

⁶⁴Kuom mano, gol chik mondo orit liel maber nyaka chop ndalo mar adek, nono to jopuonjrene obiro mokwalo ringre, mi bang’e digiwach ni ji ni, osechier oa kuom joma otho. Kamano wuond machien dibed marach moloyo mokwongo”.

⁶⁵Pilato nowachonigi niya, “Ee, kawuru askeche, udhi urit liel maber kaka unyalo.”

⁶⁶Kuom mano ne gidhi, mi girito liel maber. Ne giketo kido kuom kidi mane olorgo dho liel, kendo ne giweyo askeche karito.