Read luo Mathayo 28 Bible Online

Mathayo 28 - luo bible

Mathayo 28

¹Kar kogwen chieng’ Jumapil, kane chieng’ Sabato oserumo, Maria nya Magdala gi Maria machielo nobiro mondo olim liel.

²To piny noyiengni matek apoya nono, kendo malaika mar Ruoth Nyasaye nolor koa e polo, mong’ielo kidi mane olorgo dho bur gi chien, mobetie.

³Kit malaikano ne chalo gi mil polo, kendo lawe ne tar ka pe.

⁴Jorit ne luoro omako malich mi otetni, kendo olokore mana ka joma osetho.

⁵To malaika nowacho ni mongo niya, “Kik ubed maluor. Ang’eyo ni udwaro Yesu ma nyocha ogur e msalaba,

⁶to oonge ka, nimar osechier mana kaka nowacho. Biuru une kama nende onindoe,

⁷eka udhi piyo, uwach ni jopuonjrene ni osechier oa kuom joma otho, kendo otelo nyimgi odhi Galili, kuma gibiro nenee. Koro ero, asewachonu!”

⁸Mongo noa e liel piyopiyo, kaluor, to kendo mor ahinya, mi giringo gidhi nyiso jopuonjrene.

⁹To kane oyudo gidhi, ne gipo ka Yesu ochung’ e nyimgi, mi omosogi ni, “Okueuru.” Ne gisudo ire mi gimako tiende ka gimiye duong’.

¹⁰Eka Yesu nowachonigi niya, “Kik ubed maluor, to dhiuru unyis owetena mondo odhi Galili, kuma gibiro nenae.”

¹¹Kane mongo pod wuotho dhi, to moko kuom jorit nodok Jerusalem, monyiso jodolo madongo gik moko duto mane osetimore.

¹²Eka jodolo madongo nochokore gi jodong oganda, kendo ka ne gisepimo wach, ne gimiyo joritgo pesa mang’eny,

¹³ka giwachonigi niya, “Nyaka uwach ni, ‘Jopuonjre Yesu nende obiro gotieno mi okwalo ringre ka wanindo.’ ”

¹⁴Eka ne gimedo wachonigi ni, “Kapo ni ruoth owinjo wachno, to wanalos kode mondo kik gimoro marach timu.”

¹⁵Joritgo nokawo pesago, motimo kaka nowachnigi. Wachno nolandore ahinya, kendo pod owachore e kind jo-Yahudi nyaka chil kawuono.

¹⁶ Jopuonjre apar gachiel nodhi, Galili e got mane Yesu owachonigi ni mondo gidhiye.

¹⁷Kane ginene kuno, ne gigoyo chonggi piny ka gimiye duong’ to kata kamano moko kuomgi pod noriwo gi kiawa.

¹⁸Yesu nosudo irgi, mowachonigi niya, “Osemiya teko duto e polo kendo e piny,

¹⁹ omiyo dhiuru ulok ogendini duto jopuonjrena, kubatisogi e nying Wuoro gi Wuowi gi Roho Maler,

²⁰kendo kupuonjogi rito weche duto masenyisou. To winjuru! An kodu ndalo duto nyaka giko piny.”