Read luo Mathayo 3 Bible Online

Mathayo 3 - luo bible

Mathayo 3

¹E ndalogo, Johana Jabatiso nobiro kalando wach e thim Judea.

² Ne owacho niya, “Lokuru chunyu, nikech Loch Polo chiegni.”

³ Johana e jal mane janabi Isaya owuoyo kuome, kowacho ni, “Ng’at moro kok e thim niya, ‘Losuru yo ni Ruoth! Losneuru yo moriere tir.’ ”

⁴ Johana ne rwako law yie ngamia, kendo ne otweyo okanda mar del e nungone. Chiembe ne mana bonyo kod mor kich mae thim.

⁵Ji nodhi ire koa Jerusalem gi piny Judea duto kod gwenge molworo aora Jordan.

⁶Ne gihulo richogi, kendo nobatisogi e aora Jordan.

⁷ To kane Johana oneno jo-Farisai gi jo-Sadukai mathoth kabiro ire, nowachonigi niya, “Un nyithind thuonde! En ng’a mane onyisou ni mondo uring utony e kum mabiro?

⁸Timbeu ema mondo onyis ni uselokoru adier.

⁹ To bende kik chunyu wuondu ka uparo ni ubiro tony nikech un nyikwa Ibrahim, nikech awachonu adier ni Nyasaye nyalo kawo kitegi, mi lok nyikwa Ibrahim!

¹⁰ Kata mana kawuono, le oseketi e tiend yien, omiyo yien duto ma ok nyag olemo mabeyo ibiro tong’ oko, mi wit e mach!

¹¹An abatisou gi pi, mondo obed ranyisi ni useloko chunyu, to ng’at ma biro bang’a nigi teko moloya, ma kata mana wuochene ok awinjora ting’o. En obiro batisou gi Roho Maler kendo gi mach.

¹²En gi rapiedhi e lwete, ma obiro piedhogo cham duto maler. Enochok chambe e dero, to mihudhi nowang’ gi mach mak tho!”

¹³E ndalogo Yesu noa e piny Galili, modhi e aora Jordan mondo Johana obatise.

¹⁴To Johana notemo tame, kakwere ni, “An ema onego ibatisa, to kendo in ema ibiro ira mondo abatisi!”

¹⁵To Yesu nodwoke niya, “We otimre kamano sani, nimar kamano e kaka watimo gik moko duto ma Nyasaye dwaro.” Mano omiyo Johana ne oyie mondo obatise.

¹⁶To kane osebatise, nowuok oa e pi mana gikanyono, kendo polo ne oyaworene, mi oneno Roho mar Nyasaye ka lor ka akuru, kabiro kuome.

¹⁷ Eka duol nowuoyo gie polo niya, “Ma e Wuoda ma ahero. Chunya mor kode.”