Read luo Mathayo 4 Bible Online

Mathayo 4 - luo bible

Mathayo 4

¹ Bang’ mano, Roho notero Yesu nyaka e thim, mondo Satan oteme.

²Notueyo chiemo kuom ndalo piero ang’wen, odiechieng’ kotieno mi nodenyo.

³Eka Satan nobiro ire, mowachone niya, “Ka in Wuod Nyasaye adier, to nyis kitegi mondo olokre kuon.”

⁴ To Yesu nodwoke niya, “Muma wacho ni, ‘Dhano ok nyal bedo mangima nikech chiemo kende, to obedo mangima gi weche duto mawuok e dho Nyasaye.’ ”

⁵Bang’e Satan notero Yesu Jerusalem, Dala Maler, mi okete e osuch Hekalu.

⁶ Nowachone niya, “Ka in Wuod Nyasaye adier, to chikri piny, nikech Muma wacho ni, ‘Nyasaye noket malaikane mondo oriti Ginitayi gi lwetgi, mondo kik ichwany tiendi e kidi.’ ”

⁷ Yesu nodwoke niya, “To Muma wacho bende ni, ‘Kik item Ruoth Nyasachi.’ ”

⁸Eka Satan ne ochako okawe, motere ewi got marabora, monyise pinje duto manie piny, kowuorore kaka gidongo.

⁹Nowachone niya, “Magi duto abiro miyi, ka igoyo chongi piny, milama.”

¹⁰ To Yesu nodwoke ni, “Dhi kucha, Satan! Muma wacho ni, ‘Ng’ato nyaka lam mana Nyasache, kendo en kende ema nyaka otine.’ ”

¹¹Bang’ mano, Satan noweyo Yesu mi malaika nobiro motiyone.

¹² Kane Yesu owinjo ni Johana osetue, nowuok modok Galili.

¹³ To ne oa Nazareth, mi odhi odak Kapernaum, dala manie dho nam Galili, e piny Zebulun gi Naftali.

¹⁴Mano notimore mondo gima janabi Isaya okoro otimre.

¹⁵ Isaya nosewuoyo kuom piny Zebulun gi piny Naftali man yo podho chieng’ mar aora Jordan, e yo madhi nam Mediterania, tiende ni Galili piny Ogendini. Nowacho niya,

¹⁶“Oganda mane odak e mudho oseneno ler maduong’. Adier, ler oserieny kuom joma ne obet e piny motimo tipo mar tho.”

¹⁷ Chakre kindeno, yesu nochako lando wach, ka nyiso ji niya, “Lokuru chunyu, nikech Loch Polo chiegni.”

¹⁸Kane oyudo Yesu wuotho e dho nam Galili, noneno owete ariyo ma jolupo, ka chiko rech e nam gi tol. Ne gin Simon miluongo ni Petro, gi Andrea owadgi.

¹⁹Yesu nowachonigi niya, “Luwauru, mondo kar yuayo rech to atimu joywa ji.”

²⁰Gikanyono ne giweyo tondegi, mi giluwe.

²¹Kane oa kanyo modhi nyime, ne oneno owete mamoko ariyo, ma Jakobo gi Johana, yawuot Zebedi. Ne ginie yie gi wuon-gi, ka giloso tondegi. Yesu noluongogi,

²²kendo gi kanyono ne giweyo yie gi wuon-gi, mi giluwo Yesu.

²³ Yesu nowuotho e piny Galili duto, ka puonjo ji e utgi mag lemo. Nolando Wach Maber mar Loch Nyasaye, kendo nochango ji duto man gi tuoche mopogore opogore.

²⁴Humbe nolak e piny Siria duto, omiyo ji nokelone joma nigi tuoche mopogore opogore, gi joma rem ohingo, kaka joma nigi jochiende gi jondulme kod joathany, mi nochangogi duto.

²⁵Ji mang’eny noluwe. Ne gia Galili gi Dekapoli gi Jerusalem gi Judea kod piny man loka Jordan.