Read luo Mathayo 7 Bible Online

Mathayo 7 - luo bible

Mathayo 7

¹“Kik ung’ad ni ji bura, mondo un bbende kik ng’adnu bura,

² nikech yo ma ung’adoe ni ji bura, e yo ma un bende nong’adnue bura, kendo rapim ma upimoe ema un bende nopimnue.

³Marang’o ineno mana pilni yath manie wang wadu, to yath maduong’ manie wang’i iwuon to otami neno?

⁴Ere kaka diwach ni wadu ni, ‘We agolni pilni yath manie wang’i,’ ka into yath maduong’ ngolni e wang’i?

⁵In miwuondori awuondani! Kwong igol yath maduong’ manie wang’i iwuon, eka ininen maler mondo igol pilni yath manie wang’ wadu!

⁶“Kik umi guogi gik maler, nimar dipo ka gilokore, gikayou. Bende kik ubol kiteu ma nengogi tek ni nguruwe, nono to ginyonogi gi tiendgi.

⁷“Kwauru, eka nomiu, kendo dwaruru, eka unuyudi, bende dwong’uru eka noyawnu;

⁸nikech ng’at mokwayo ema yudo, kendo ng’at modwaro ema nwang’o, bende ng’at modwong’o ema iyawone.

⁹“Bende nitie ng’ato kwomu, ma, ka nyathine okwaye kuon, to omiye kidi?

¹⁰Kata kokwaye rech, to omiye thuol?

¹¹Koro, ka un joma richo kama ema ung’eyo miyo nyithindu gik mabeyo, to Wuonu mae polo donge dibed mamor kuom chiwo gik moko mabeyo ni joma okwaye?

¹² “Pile timuru ni jowadu mana kaka duher mondo gin bende gitimnu. Mano e tiend Chik Musa gi tiend puonj Jonabi.

¹³“Donjuru e rangach madiny, nikech yo madhi e tho lach, bende rangach midonjogo kuno duong’ kendo joma luwe ng’eny.

¹⁴To yo madhi e ngima diny, bende rangach midonjogo tin, kendo joma nwang’e nok.

¹⁵“Beduru motang’ ni jonabi mag miriambo, mabiro iru korwakore gi lep rombe, to chutho gin mana ondiegi mangemo!

¹⁶Unung’e joma kamago mana gi olemo ma ginyago. Bende ji nyalo pono olemb mzabibu kuom kudho? Koso digipon ng’owo kuom oriang’, ka ok mana kuom yiend olemo?

¹⁷Yien mabeyo nyago olemo mabeyo, to yien maricho nyago olemo maricho.

¹⁸Yath maber ok nyal nyago olemo maricho, kendo yath marach ok nyal nyago olemo mabeyo.

¹⁹ To yath ka yath ma ok nyag olemo mabeyo iting’o mi wit e mach.

²⁰ Mano emomiyo awacho ni, unung’e joma kamago mana gi olemo ma ginyago.

²¹“Kik upar ni ji duto ma luonga ni,’ Ruoth, Ruoth,’ ema nodonji e Piny Ruodh Polo. Ooyo, joma timo gik ma Wuora manie polo dwaro kende ema nodonji.

²²Ka chieng’ giko ochopo, to ji mathoth nowachna niya, ‘Ruoth! Ruoth! Donge ne wakoro wach e nyingi, kendo wagolo jochiende e nyingi? Koso donge e nyingi ema ne watimoe honni?’

²³ Eka anawachnigi niya, ‘Ne ok ang’eyou ngang’! Ayeuru kuoma un jorichogi!’

²⁴“Mano emomiyo ng’at mowinjo wechenagi, mi orito, chalo gi ng’at mariek mane ogero ode ewi lwanda.

²⁵Koth ne ochwe maduong’, mi ohula omol, kendo yamo bende nokudho mogoyo odno, to ne ok opodho, nikech mise mare ne oketi e wi lwanda.

²⁶To ng’at ma winjo wechegi, to ok omako, chalo gi ng’at mofuwo mane ogero ode ewi kuoyo.

²⁷Koth ne ochue maduong’, mi ohula omol, kendo yamo bende nokudho mogoyo odno, mi oruombore piny matek!”

²⁸ Kane Yesu osetieko wacho wechego duto, ji ne owuoro puonjne,

²⁹nimar ne ok opuonj kaka jopuonjgi mag Chik puonjo, to ne opuonjo ka ng’at man gi teko.