Read luo Mathayo 8 Bible Online

Mathayo 8 - luo bible

Mathayo 8

¹Kane Yesu oselor oa e got, oganda maduong’ noluwe.

²Jadhoho moro nodhi ire mogoyo chonge piny, kawachone niya, “Jaduong’, ang’eyo ni inyalo changa, ka ihero timo kamano.”

³Yesu norieyo lwete, momule, kawachone ni, “Ee, ayie! Changi, ibed mangima.” Gikanyono dhohone ne ochango.

⁴ Eka Yesu nowachone niya, “Kik ihul ni ng’ato wachni, to dhiyo ir jadolo mondo orang dendi. Bang’e itim misango mane Musa ogolo chikne mondo otim. Mano biro nyiso ji duto ni koro ichango.”

⁵Yesu nodonjo Kapernaum, mi jaduong’ lweny moro ma ja-Rumi nobiro ire mohombe mondo okonye, kawacho niya,

⁶“Jaduong’, jatichna nindo e oda kucha, to en gi tuo athany, kendo rem rame malich.”

⁷Yesu nodwoke ni, “Ayie. Abiro dhi mondo achange.”

⁸To jaduong’ lweny nowachone niya, “Ooyo, jaduong, an ok owinjore idonj e bwo tat oda, to wach mana wach kende, to jatichna biro kwo.

⁹Ang’eyo kamano nikech an bende an ng’at michiko, to an awuon bende an gi askeche ma achiko. Ka awacho ni moro ni, ‘Dhiyo!’ to odhi, kendo ka awacho ni machielo ni, ‘Bi!’ to obiro. Jatichna bende ka awachone ni, ‘Tim kama’ to otimo.”

¹⁰Kane Yesu owinjo kamano, ne owuoro, mi owacho ni joma ne luwe niya, “Adiera awachonu ni pok anenoe yie machal gi mar ng’atni, kata mana kuom jo-Israel.

¹¹ Bende awachonu ni ji mang’eny nobi koa yo wuokchieng’ gi yo podho chieng’, kendo ginibed e Piny Ruodh Polo, ka gichiemo gi Ibrahim gi Isaka kod Jakobo.

¹² To joma ne onego bed kuno nowit oko e mudho mandiwa, kama ywagruok gi muodo lak nitie.”

¹³Eka Yesu nowacho ni jaduong’ lweny niya, “Koro dhi adhiya dala! Kaka iseyieno e kaka gino mondo otimreni.” Kamano jatichne nochango mana gikanyono.

¹⁴Yesu nodhi e od Petro, mi oyudo ka min chi Petro nindo, ka nigi midhusu.

¹⁵Yesu nomako lwet dhakono, mi midhusu mane en-go orumo, kendo noa malo, motiyonigi.

¹⁶Kane piny ochopo odhiambo, ji nokelo joma thoth man gi jochiende ir Yesu, mi Yesu nogolo jochiendego mana gi wach kende, kendo nochango joma tuo duto.

¹⁷ Mano notimore mondo ochop gima janabi Isaya nosewacho niya, “En owuon ne okawo midekrewa, kendo noting’o tuochewa.”

¹⁸Kane Yesu oneno oganda maduong’ kolwore, nowacho ni jopuonjrene mondo ging’ad nam, gidhi loka machielo.

¹⁹To japuonj Chik moro nobiro ire, mowachone niya, “Japuonj, ayie luwi kamoro amora midhiye.”

²⁰To Yesu nodwoke niya, “Bwe nigi buchegi, kendo winy bende nigi utgi. Wuod Dhano to onge kata gi kama ketie wiye.”

²¹Eka ng’at moro, mane achiel kuom jopuonjre Yesu, nowacho ni Yesu niya, “Jaduong’, yiena mondo akwong adog ayik wuora, eka anabi aluwi.”

²²Yesu to ne odwoke ni, “We joma otho oyik jogi motho. In to luwa!”

²³Yesu nodonjo e yie, mi jopuonjrene nodhi kode.

²⁴To ahiti malich notugore e nam, mi apaka oimo yie. Yesu to noyudo nindo otero.

²⁵Jopuonjrene nosudo ire, mochiewe, kawachone niya, “Ruoth! Reswa, watho!”

²⁶Yesu nodwokogi kapenjogi ni, “Ere gima omiyo uluor, un joma nigi yie matin-gi?” Eka noa malo, mokwero ahiti kod apaka, mi nam okue thi!

²⁷Ne giwuoro giduto, ka gipenjore niya, “Ng’atni en ng’at manadi, ma kata mana yamo gi apaka winje awinjani?”

²⁸Kane Yesu osechopo loka machielo, e piny jo-Gadara, ji ariyo mowuok kar yiko jomotho nobiro ire. Jogo ne nigi jochiende, kendo ne giger, ma onge ng’ama ne nyalo kadho kanyo.

²⁹Ne gigoyo koko ka giwacho niya, “Yaye, Wuod Nyasaye, ilaro ang’o kodwa? Koso isebiro mondo isandwa kapok ndalo moketi ochopo?”

³⁰To kueth maduong’ mag ngurue noyudo kwayo mochwalore gi kanyo.

³¹Jochiendego nokwayo Yesu niya, “Ka iriembowa, to terwa ir ngurue kande mondo wadonj kuomgi.”

³²Yesu nowachonigi ni, “Ara, dhiuru!” Omiyo ne gidhi, mi gidonjo kuom nguruego kendo kuethno duto noringo matek, karidore nyaka ei nam, mi pi onegogi pep.

³³Jokwadh nguruego noringo matek, modok dala, mi ohulo wachno duto, to moloyo ne gihulo gima notimore ni joma ne nigi jochiende.

³⁴Kuom mano jogweng’no duto nowuok mondo one Yesu, to kane ginene, ne gikwaye mondo oa e gweng’gi.