Read luo Mariko 10 Bible Online

Mariko 10 - luo bible

Mariko 10

¹Yesu noa kuno, modhi e piny Judea nyaka loka aora Jordan. Ji mathoth nochako obiro ire, kendo ne opuonjogi kaka ne ojatimo.

²Eka jo-Farisai moko nobiro mondo oteme kapenje niya, “Bende chikwa oyie ni ng’ato mondo oriemb chiege?”

³Yesu nodwokogi kapenjogi ni, “Ere kaka ne Musa ochikou?”

⁴ Ne gidwoke ni, “Musa ne oyie ni ng’ato nyalo riembo chiege, kosemiye barup weruok.”

⁵Yesu nowachonigi niya, “Musa nomiyou chikno nikech wichtekou.

⁶ To e kar chakruok, kane Nyasaye ochueyo dichwo gi dhako,

⁷ Muma wacho ni, ‘Mano e momiyo ng’ato weyo wuon gi min, to padore kuom chiege

⁸kendo ji ariyogo doko ringruok achiel. Kamano koro ok gin ji ariyo, to gin mana ringruok achiel.’

⁹Kuom mano, gima Nyasaye oseriwo, kik dhano pogi.”

¹⁰Kane gisedok e ot, jopuonjre Yesu nopenje wachno,

¹¹ mi onyisogi niya, “Ka ng’ato oriembo chiege, mi okendo dhako machielo, to oterore.

¹²Kamano bende, ka dhako oweyo chwore, mi oyie ng’at machielo okende, to oterore.”

¹³Ji moko nokelo nyithindo ir Yesu mondo oket lwete kuomgi, to jopuonjrene nokwerogi.

¹⁴Kane Yesu oneno ka jopuonjrene kwero jogo kamano, nosin, mi owacho ni jopuonjrene niya, “Weuru nyithindo obi ira! Kik utamgi, nikech joma kamagi ema yudo gweth mar Loch Nyasaye!

¹⁵ Awachonu adier ni, ng’at ma ok oyie Loch Nyasaye gi chuny machalo gi chuny nyathi matin, ok noyud gueth mar Lochne ngang’!”

¹⁶Eka nokwako nyithindogo, mi oguedho moro ka moro, koketo lwete kuome.

¹⁷Chieng’ moro kane Yesu ochako wuoth, ng’at moro nobiro ire ka ringo, mogoyo chonge piny e nyime, kapenje ni, “Japuonj! In, in ng’ama ber! Ere gima onego atim mondo ayud ngima mochwere?”

¹⁸Yesu nopenje ni, “Ang’o momiyo iwacho ni an ng’ama ber? Onge ng’ama ber, mak mana Nyasaye kende.

¹⁹ Donge ing’eyo chike mawacho ni, ‘Kik ineki, kik iterri, kik ikwal, kik ihang wach, kik imechi e yor wuond, kendo ni, luor wuoru gi meru’?”

²⁰Ng’atno nodwoke niya, “Japuonj, aserito chikego duto, chakre aa e nyathi.”

²¹Eka Yesu nong’iyo wang’e tir, ka mor kode, mowachone ni, “Gimoro achiel ema pod onego itim: dhiyo, ilok gigi duto pesa, mondo imi joma odhier, eka inibed gi mwandu e polo. To ka isetimo kamano, to bi iluwa.”

²²Kane ng’atno owinjo wachno, wang’e nolokore, mi odhi ka chunye lit, nikech ne en jamoko ahinya.

²³Yesu norango jopuonjrene koni gi koni, mowachonigi niya, “Mano kaka donjo e Piny Ruoth Nyasaye nobed matek ni joma nigi mwandu!”

²⁴Jopuonjrene ne ohum nono gi wechego, to Yesu nomedo wachonigi ni, “Nyithinda, mano kaka donjo e piny Ruoth Nyasaye tek!

²⁵Yot ni ngamia kadho e wang’ sandan, moloyo jamoko donjo e Piny Ruoth Nyasaye.”

²⁶Kane jopuonjre owinjo kamano, ne gimedo wuoro ahinya, ka gipenjore e kindgi giwegi ni, “Kara, ere ng’ama nokwo!”

²⁷Yesu nong’iyo wang’gi tir, mowachonigi niya, “Dhano ok nyal warore kende, to Nyasaye ema nyalo gik moko duto!”

²⁸Eka Petro nowachone ni, “To wan waseweyo gik moko duto mondo waluwi!”

²⁹Yesu nodwoke, kawachonigi ni, “Adier awachonu ni ng’ama oweyo dalane, kata owetene, kata nyiminene, kata min, kata wuon, kata nyithinde, kata lope, nikech an, kendo nikech Injili,

³⁰to noyud mier, gi owete, gi nyimine, gi mine, gi nyithindo kod lowo nyadi mia achiel e piny ka, kaachiel gi sand bende, kendo enoyud ngima mochwere e piny mabiro.

³¹ To ji mang’eny ma koro otelo nodog chien, kendo joma koro odong’ chien notel.”

³²Kane gin e yo gidhi Jerusalem, Yesu ne wuotho kotelo e nyim jopuonjrene, mane oyudo hum nono. Jpogo mane luwogi bende luoro nomako. Yesu nochako oluongo joote apar gariyo tenge, mi onyisogi gima biro timorene.

³³Ne owachonigi niya, “Winjuru! Koro wadhi Jerusalem, kuma ibiro chiwie Wuod Dhano e lwet jodolo madongo kod jopuonj Chik. Gining’adne buch tho, mi gikete e lwet joma ok jo-Yahudi.

³⁴Jogo nochare, kendo nong’ul kuome olawo, bende ginichwade, kendo gininege, to bang’ ndalo adek enochier.”

³⁵Jakobo kod Johana, ma yawuot Zebedi, nosudo ir Yesu, mowachone niya, “Japuonj, nitie gimoro ma wadwaro kwayi mondo itimnwa.”

³⁶Yesu nopenjogi ni, “En ang’o ma udwaro mondo atimnu?”

³⁷Ne giwachone ni, “Chieng’ mibet e komduong’ni maler, to yie wabed buti, ka ng’at achiel obet e badi korachwich, to machielo obet e badi koracham.”

³⁸ Yesu nodwokogi niya, “Ok ung’eyo gima ukwayo! Uparo ni dunyal madho kikombe mar masira ma ochunore ni nyaka amadhi? Bende disandu gi sand mibiro sandago?”

³⁹To ne gidwoke ni, “Ee, dwanyal.” Eka Yesu nowachonigi ni, “Adier, ubiro madho kikombe ma amadho, kendo ibiro sandu gi sand misandago.

⁴⁰To yiero ng’ama onego bedi e bada korachwich kata koracham, to ok nie tekona. Nyasaye ema nochiw kuondego ni joma oseikinigi.”

⁴¹Kane jopuonjre apar modong’ owinjo wachno, ne gisin gi Jakobo kod Johana.

⁴² To Yesu noluongogi ire, mowachonigi niya, “Ung’eyo ni ruodhi duto mag piny tiyo jogi gi thwon, kendo jogo man gi loch nigi teko kuom joma gitiyo.

⁴³ Kuomu to, ok en kamano. To ka ng’ato kuomu dwaro bedo gi duong’, to nyaka obed jatichu,

⁴⁴kendo ka ng’ato kuomu dwaro bedo jatendu, to nyaka obed misumba jiduto.

⁴⁵Nikech kata Wuod Dhano bende ne ok obiro mondo ji otine, to nobiro mondo oti ni ji, kendo mondo ochiw ngimane owargo ji mang’eny.”

⁴⁶Ne gichopo Jeriko, kendo kane oyudo Yesu wuok kuno gi jopuonjrene kod oganda maduong’, jakuecho moro ma muofu ma nyinge Bartimeo, tiende ni wuod Timeo, ne oyudo obet e bath yo.

⁴⁷Kane owinjo ni Yesu ja-Nazareth ema kadho, nochako kok, kowacho niya, “Yesu, wuod Daudi, kecha!”

⁴⁸Ji mang’eny nokwere ni mondo oling’, to nomedo mana kok matek ni, “Wuod Daudi, kecha!”

⁴⁹Yesu nochung’, mlowacho niya, “Luongeuru, obi ka.” Eka ne giluongo muofuno, ka giwachone ni, “Hapi ber! Chung’, oluongi.”

⁵⁰Kuom mano, nobolo lawe kucho, moa malo piyo, kodhi ir Yesu.

⁵¹Yesu nopenje ni, “Ere gima idwaro mondo atimni?” Nodwoko ni, “Japuonj, adwaro mondo achak anen kendo.”

⁵²Yesu nowachone niya, “Dhiyo, yieni ema omiyo ichango.” Gikanyono wengene ne oyepo, mi oluwo bang’ Yesu.