Read luo Mariko 14 Bible Online

Mariko 14 - luo bible

Mariko 14

¹ Koro ne odong’ ndalo ariyo to chop Sap Pasaka kod Sap Makati ma ok ketie Thowi. To jodolo madongo kod jopuonj Chik ne dwaro yo ma digimakgo Yesu ling’ling’ mondo ginegi,

²nimar ne gineno ni ber mondo kik gimake e ndalo Sawo, nikech dipo ka ji otimo koko.

³ Kane Yesu ni Bethania, ka chiemo e od Simon jadhoho, dhako moro nobiro gi chupa molos gi alabasta, moting’o mo mang’ue ng’ar ma nengo ne tek miluongo ni nard. Ne oturo ng’ut chupano mi oolo morno ewi Yesu.

⁴Jomoko kuom ji mane ni kanyo ne mirima omako, mi gipenjore niya, “Ang’o momiyo dhani ketho morni?

⁵Ka da ni oloke, to da okelo pesa moloyo siling’ alufu achiel mi opogne joma odhier.” Kuom mano ne gidhaw gi dhakono, ka gikwere matek.

⁶To Yesu nowachonigi niya, “Weyeuru. Ere gima omiyo uchande? Osetimona gima kare kendo maber.

⁷ Joma odhier ni kodu ndalo duto, omiyo unyalo konyogi kinde duto mudwaro. Anto ok an kodu ndalo duto.

⁸Dhakoni osetimo gima onyalo. Osewiro ringra chon gi mo, mondo obed moikore ne yik.

⁹Awachonu adier ni kamoro amora ma nolandie Wach Maber e piny duto, to gima dhakoni osetimo bende nohul kiparego.”

¹⁰Bang’e Judas Iskariot mane achiel kuom jopuonjre apar gariyo, nowuok odhi ir jodolo madongo mondo oket Yesu e lwetgi.

¹¹Kane jodologo owinjo gima okele, ne gidoko mamor ahinya, mi gisingore kode ni gibiro miye pesa. Kuom mano judas nochako rango yo ma dondhoggo Yesu.

¹²Chieng’ mokuongo mar Sap Makati ma ok ketie Thowi, ma en chieng’ minegoe nyarombo Pasaka, jopuonjre Yesu nopenje ni, “Ere kama idwaro ni mondo wadhi waiknie Pasaka?”

¹³Eka Yesu nooro ji ariyo kuomgi konyisogi niya, “Dhiuru Jerusalem kendo ubiro romo gi ng’at moting’o dapi. Luweuru,

¹⁴nyaka ot modonjoe, kendo nyisuru wuon odno niya, ‘Japuonj penjo ni ere ot moikne, mobiro chamoe Sap Pasaka gi jopuonjrene?’

¹⁵Wuon odno biro nyisou ot malach moik maler e gorofa malo. Kanyo ema mondo uiknwae gik moko duto.”

¹⁶Kamano jopuonjrego nowuok modhi Jerusalem, kendo ne ginwang’o gik moko duto mana kaka Yesu nosenyisogi, mi giiko Pasaka kuno.

¹⁷Kane piny oseyuso, Yesu nobiro gi jopuonjrene apar gariyo,

¹⁸ kendo kane gibet gichiemo, nowachonigi niya, “Awachonu adier ni ng’at achiel kuomu machiemo koda ka biro ndhoga.”

¹⁹Kane giwinjo kamano, chunygi ne ochako chandore mi moro ka moro nopenje ni, “En an koso?”

²⁰Nodwokogi niya, “En ng’at achiel ma luto lwete koda e tawo kuomu un ji apar gariyo.

²¹Wuod Dhano biro tho mana kaka Muma wacho, to mano kaka nodog malit ni ng’ama biro ndhoge! Da obedo maber ni ng’atno ka dine ok onywole!”

²²Kane gichiemo kamano, Yesu nokawo makati moguedho, eka nong’ingo mi omiyo jopuonjrene, kowacho niya, “Kawuru ma e ringra”.

²³Bang’e ne okawo kikombe kendo ka ne osegoyo ni Nyasaye erokamano, nomiyogi mi gimethoe giduto.

²⁴ Eka nowachonigi ni, “Ma e remba mochwer ni ji mang’eny kitimonigigo Winjruok gi Nyasaye.

²⁵Adier awachonu ni, chakre kawuono ok nachak amadh divai ngang’ nyaka chop amadh divai e piny Ruodh Nyasaye.”

²⁶Bang’ mano ne giwer, to kane gisewer, ne giwuok gidhi e got Zeituni.

²⁷ Yesu nowachonigi ni, “Uduto unuring uweya, nimar ondiki e Muma ni Nyasaye wacho niya, ‘Ananeg jakwath, mi rombe noke!’

²⁸ To ka osechiera, to natel nyimu adhi Galili.”

²⁹To Petro nowachone ni, “Kata ka ji duto oweyi, anto ok naweyi ngang’.”

³⁰Yesu nodwoke ni, “Adier awachoni ni otieno ma kawuononi, ka pok thwon gweno okok diriyo, to ibiro kweda didek.”

³¹To Petro nokwer koramo ni, “Ok nakwedi ngang’, kata ka ochuno ni nyaka atho kodi.” Jopuonjre mamoko duto bende ne owacho mana kamano.

³²Kane gichopo kamoro miluongo ni Gethsemane, Yesu nowacho ni jopuonjrene niya, “Beduru kaeri, ka anto adhi lemo.”

³³To nokawo Petro gi Jakobo kod Johana odhigo. Eka chunye nochako ridore koparore ahinya.

³⁴Nowachonigi niya, “Chuny lit ma an-go lich, ma dwaro mana nega! Beduru ka, kurito.”

³⁵Eka nochwalore nyime matin mopodho piny, kolemo ni, kanyalore to sa mar masirano okadhne.

³⁶Nowacho niya, “Baba! Wuora! In ema inyalo gik moko duto, gol kikombe mar masirani oa kuoma. To kik obed kaka an ema adwaro, to mana kaka in ema idwaro.”

³⁷Ne odok ir jopuonjre adek kande, monwang’o ka nindo oterogi, mi openjo Petro niya, “Simon, inindo? Ok inyal neno kata mana kuom sa achiel kende?”

³⁸Eka nowachonigi ni, “Beduru kuneno mondo ulem, kik udonj e tem. Adier chuny oyie to ringruok ema nyap.”

³⁹Bang’ mano, ne ochako odok molemo konwoyo mana weche mane osewacho mokwongo.

⁴⁰Bang’e nodwogo ir jopuonjrene monwang’o ka nindo ochako oterogi, nikech wengegi ne pek ahinya, kendon ne ok ging’eyo gima digidwoke.

⁴¹Ne ochako odwogo irgi mar adek, mopenjogi niya, “Pod unindo aninda kuyueyo? Oromo! Sa osechopo! Neuru, Wuod Dhano koro ichiwo e lwet joricho.

⁴²Chunguru, wadhiuru. Ero, jandhokna osekayo machiegni.”

⁴³Kane Yesu pod loso, Judas, ma achiel kuom jopuonjre apar gariyo, notucho gi oganda man g ligengni kod arunge, koa ka jodolo gi jopuonj Chik kod jodongo.

⁴⁴Jandhokno nosenyiso jogo gima obiro timo, kowachonigi niya, “Ng’at ma ang’ amoso kanyodho e en. Makeuru, kendo dhiuru kode kurite maber.”

⁴⁵Kamano kane gichopo, Judas nodhi ir Yesu piyopiyo monyodhe, komose ni, “Japuonj!”

⁴⁶Eka jogo nomako Yesu matek.

⁴⁷To ng’at achiel kuom joma ne ochung’ kanyo nowuodho ligangla, mochadhogo it jatich jadolo maduong’ oko.

⁴⁸Yesu nopenjogi niya, “Ere gima omiyo ubirona gi ligengni kod arunge ka joma dwaro jamecho?

⁴⁹ Pile yande an kodu kapuonjo e Hekalu, to ne ok umaka. To gima kama otimore mondo wach ma ondiki e Muma ochop kare.”

⁵⁰Eka jopuonjrene duto noringo, moweye.

⁵¹Wuowi moro noyudo luwo Yesu korwako mana law abola kende. Jogo ne otemo make,

⁵²to nopusore moringo odhi duk, koweyo laweno e lwetgi.

⁵³Ne gitero Yesu e od jadolo maduong’, kuma ne jodolo madongo duto gi jodongo kod jopuonj Chik oyudo chokoree.

⁵⁴Petro noluwo bang’e gi chien nyaka e laru mar od jadolo maduong’, mobet kuno kooyo mach gi jorit.

⁵⁵Jodolo madongo kod jobura duto ne dwaro mondo oyud weche ma digidonjgo ni Yesu mondo onegi, to ne ok ginyal nwang’o,

⁵⁶nikech kata obedo ni ji mang’eny nohango ne wach, to wechegi ne ok chalre.

⁵⁷Jomoko kuomgi nochung’ ka jigone wach niya,

⁵⁸ “Ne wawinjo kowacho ni ‘Abiro muko Hekalu ma lwet dhano ema ogeroni, to bang’ ndalo adek abiro gero machielo ma ok dhano ema ogero.’ ”

⁵⁹To kata mana gin bende wechegi ne ok chalre.

⁶⁰Eka jadolo maduong’ nochung’ e nyim ji duto mopenjo Yesu niya, “Ok idwokie wach moro kuom weche ma jogi donjonigogi koso?”

⁶¹To Yesu noling’ aling’a thi, ma ok odwoko wach moro. Jadolo maduong’ nochako openje ni, “In e Mesia Wuod Ng’ama Imiyo Duong’, koso?”

⁶² Yesu nodwoke ni, “Ee an, kendo unune Wuod Dhano kobet e bat korachwich mar Ng’ama Nyalo Gik Moko Duto, kobiro e boche polo!”

⁶³Kane jadolo maduong’ owinjo kamano, ne oyiecho lawe, kowacho niya, “Ang’o momiyo pod wadwaro joneno?

⁶⁴ Donge usewinjo koyanyo Nyasaye? Un uneno ang’o?” Eka giduto ne ging’adone buch tho.

⁶⁵Jomoko kuomgi nochako ng’ulo kuome olawo, bende ne giumo wang’e kendo gigoye adhong’, ka giwachone ni, “Hul ane ng’ama ogoyi!” Jorit bende nokawe mogoye.

⁶⁶E kindeno duto, Petro ne ni mwalo e laru, kendo achiel kuom nyiri matiyo ni jadolo maduong’ nobiro kanyo.

⁶⁷Kane oneno Petro kaoyo mach, nong’iyo wang’e tir mowachone ni, “In bende ne in kod Yesu ja-Nazareth.”

⁶⁸To Petro nokwere niya, “Ok ang’eyo, bende akia gima iwacho,” Eka nowuok kanyo modhi e dhorangach, kendo e sa onogono, thon gweno nokok.

⁶⁹Nyakono nochako onene e dhorangach kuno, mowacho ni joma nochung’ kanyo ni, “Jali bende en achiel kuomgi.”

⁷⁰To Petro nochako okwer kendo. Bang’e matin, joma ne oyudo ochung’ kanyo nowacho ni Petro niya, “Kwerie ane ka ok in achiel kuomgi, to in bende in ja-Galili.”

⁷¹Eka Petro nokuong’ore, koramo ni, “Ok ang’eyo ng’at muwachoni!”

⁷²Gikanyono thwon gweno nochako okok mar ariyo, mi Petro noparo wach mane Yesu osewachone ni, “Kapok thwon gweno okok diriyo, to nikweda didek.” Kane oparo wachno kamano, noywak malit.