Read luo Mariko 15 Bible Online

Mariko 15 - luo bible

Mariko 15

¹Kane piny oru gokinyi mang’ich jodolo madongo nopimo wach piyopiyo gi jodongo gi jopuonj Chik kod jobura mamoko duto. Eka ne gitueyo Yesu, mi gitero e nyim Pilato.

²Pilato nopenje niya, “In e ruodh jo-Yahudi koso?” Yesu to nodwoke ni, “In ema isewacho kamano.”

³Jodolo madongo nodonjone gi weche mathoth,

⁴omiyo Pilato nochako openje niya, “Ok inyal dwoko wach moro koso? Neye weche mathoth ma jogi donjonigogi!”

⁵To Yesu noling’ aling’a. Mano ne omiyo Pilato owuoro.

⁶To higa ka higa e Sap Pasaka, Pilato ne gonyo ng’at achiel ma ji okwaye kuom joma otue.

⁷Koro noyudo ka ng’at moro ma nyinge Baraba ne nie jela, kaachiel gi joma ne ojemo moneko, ka kedo gi joma nie loch.

⁸Kane ji ochokore mondo okwa Pilato otimnigi kaka ne ojatimo e ndalo Pasaka,

⁹ne openjogi ni, “Udwaro mondo agonynu ruodh jo-Yahudi koso?”

¹⁰Nowacho kamano nimar nong’eyo maber ni jodolo madongo nosetero Yesu ire mana nikech nyiego.

¹¹To jodolo madongo nojiwo ji ni mondo okwa Pilato ogonynigi mana Baraba.

¹²Eka Pilato nopenjogi kendo niya, “To ere gima udwaro ni mondo atim ni jal muluongo ni ruodh jo-Yahudini?”

¹³Ne gidwoke ka gikok niya, “Gure e msalaba!”

¹⁴To Pilato nochako openjogi ni, “To ere gima rach mosetimo?” To ne gimedo kok moloyo, ka giwacho ni, “Gure!”

¹⁵Kuom mano, kaka Pilato ne dwaro timo ni ji gima gidwaro, nogonyonigi Baraba, kendo kane osegolo chik mochwad Yesu malit, nochiwe mondo ogure.

¹⁶Askeche nokawo Yesu, motero e laru mar od ruoth, mi giluongo askeche mamoko duto.

¹⁷Ne girwakone kandhu makwar, kendo ne giloso osimbo mar kudho, mi gisidhone.

¹⁸Eka ne gimose, ka giwachone niya, “Ruodh jo-Yahudi mondo odag aming’a!”

¹⁹Ne gichwado wiye gi luth, kendo ging’udho kuome olawo, bende ne gigoyone chonggi piny ka gima gidende.

²⁰Kane gisetieko chare kamano, ne gilonyo kandhu makwarno oko kuome, mi girwakone lepe owuon. Eka ne gitere oko mondo gigure e msalaba.

²¹ Kane giwuotho gidhi, ne giromo gi ng’at moro ma nyinge Simon, mane oyudo biro Jerusalem, koa e gweng’ moro, mi gichuno mondo oting’ni Yesu msalape. Mano e Simon ja-Kurene ma wuon Aleksander gi Rufus.

²²Ne gitero Yesu kama iluongo ni Golgotha, tiende ni Kar Hanga Wich.

²³Ne gimiye divai moruw gi yath makueyo rem miluongo ni manemane mondo omadhi, to ne odagi madho.

²⁴ Eka ne gigure e msalaba, mi gipogore lepe, ka gigoyo ombulu mondo ging’ego law ma ng’ato ka ng’ato dikaw.

²⁵Ne en sa adek onyango ka ne gigure,

²⁶kendo weche modonjnego ondiki ewi msalaba niya, “RUODH JO-YAHUDI.”

²⁷ Jomecho ariyo bende ne giguro kode, achiel e bathe korachwich, to machielo e bathe koracham. [

²⁸Kamano wach mondiki e Muma ni, “Nokwane ka achiel kuom joma richo,” nochopo kare.]

²⁹ Joma ne kadho kanyo nojaro Yesu katwenyone umgi, kendo wachone niya, “Oo! In mane iwacho ni ibiro muko Hekalu, mi ichak iger bang’ ndalo adek,

³⁰koro resri ane, ilor ia e msalaba!”

³¹Kamano bende e kaka jodolo madongo kod jopuonj Chik nojaro Yesu, ka giwacho e kindgi giwegi niya, “Ne oreso jomoko, to koro en owuon dak oresre!

³²Ara koro Kristo ruodh Israel olor oa e msalaba ane, mondo wayie kuome!” Ji ariyo mane ogurego bende noyanye.

³³Kane sa auchiel ochopo, piny duto notimo mudho nyaka sa ochiko,

³⁴ kendo kar sa ochiko nogono, Yesu nokok matek niya, “Eloi, Eloi lama sabakthani?” tiende ni, “Nyasacha, Nyasacha, iweya nang’o?”

³⁵Jomoko mane ochung’ kanyo nowinjo wechego, mi owacho ni, “Winjuru! Oluongo Elija.”

³⁶ To ng’at achiel kuomgi noringo mokawo sipanj, onyumo e kong andwayo, mochwowo e dho odundu. Eka notere e dho Yesu gi odunduno mondo onyodhi, kowacho niya, “Weuru, wane ane ka Elija biro biro, mi lore e msalaba!”

³⁷Bang’ mano, Yesu nokok matek, eka chunye ochot;

³⁸ kendo nanga mane ogeng’o Kama Ler mar Hekalu noriedore diere ariyo, chakre malo nyaka piny.

³⁹Kane jaduong’ lweny mane oyudo ochung’ e nyim msalaba kanyo oneno kaka Yesu okok ka chunye chot, nowacho niya, “Adier ng’atni ne en Wuod Nyasaye!”

⁴⁰ Mon moko bende ne ni kanyo kang’icho gi chien. Kuomgi ne nitie Maria nyar Magdala, gi Salome, kod Maria min Jakobo matin gi Jose.

⁴¹Gin mon mane luwo Yesu, kendo tiyone ka gin Galili. Mon moko mang’eny mane osebiro kode Jerusalem bende ne ni kanyo.

⁴²Kane koro piny ochopo odhiambo, kendo kaka ne en chieng’ Ikruok, tiende ni chieng’ motelo ni Sabato,

⁴³Josef ja-Arimathaya, ma jabura mogen, kendo ma bende nogeno ni none Loch Nyasaye, nodhi ir Pilato gi chir, mokwaye mondo omiye ringre Yesu.

⁴⁴To Pilato nowuoro kane owinjo ni Yesu osetho mana piyo kamano, omiyo noluongo jaduong’ lweny cha, mopenjo ka Yesu osetho adier.

⁴⁵Kane oseyudo wach kuom jaduong’ lweny, noyie ni Josef mondo okaw ringre Yesu.

⁴⁶Josef nong’iewo nanga, kendo kane osegolo ringre Yesu e msalaba, noboye gi nangano, mokete e bur mane osekuny ariwa e kor lwanda. Eka nong’ielo kidi maduong’, molorogo dho bur.

⁴⁷Maria nyar Magdala kod Maria min Jose ne jo ni kanyo, mi oneno kama oketie ringre Yesu.