Read luo Mariko 3 Bible Online

Mariko 3 - luo bible

Mariko 3

¹Chieng’ moro, Yesu nodhi e od lemo, moyudo ng’at moro ma lwete otal.

²Ji moko ne ni kanyo mane dwaro donjo ni Yesu kuom ketho Chik. Kuom mano ne girange ahinya mondo gine ane ka onyalo chango ng’atno chieng’ Sabato.

³Yesu nowacho ni ng’at ma lwete otalno ni, “Bi ichung’ e diere ka.”

⁴Eka nopenjo ji ni, “Ere gima Chikwa oyienwa timo chieng’ Sabato? Timo gima ber, koso timo gima marach? Reso ngima ng’ato, koso ketho ngimane?” To jogo ne ok odwoko kata wach achiel.

⁵Kane Yesu oneno ka chunygi tek, chunye nodoko malit, mi orangogi gi mirima. Eka nowacho ni ng’atno niya, “Rie lweti.” Ng’atno norieyo lwete, mi lwete ochango.

⁶Kane jo-Farisai oneno kamano, ne giwuok e od lemo, mi gidhi gichokore piyopiyo gi jo-Herode, kendo gichano kaka digineg Yesu.

⁷Yesu nowuok gi jolupne, modhi e dho nam Galili, kendo ji mathoth noluwe. Jogo noa Galili gi Judea

⁸gi Jerusalem kod Idumea gi piny man loka aora Jordan, kaachiel gi gwenge mokiewo gi Turo kod Sidon. Ne gibiro ir Yesu nikech ne gisewinjo humb gik ma otimo.

⁹ Ogandano ne duong’ ahinya, omiyo Yesu nowacho ni jopuonjrene mondo odwarne yie obedie, mondo kik ji thung’e.

¹⁰Ne oyudo osechango ji mang’eny ahinya, omiyo ji matuo nosiko ka riyore, mondo gichop ire, gimule.

¹¹E kinde duto mane jochiende maricho onenee, ne gipodho piny e nyime, ka giywak matek niya, “In e Wuod Nyasaye!”

¹²To Yesu nokwerogi matek mondo kik gihul ni en ng’a.

¹³Bang’e Yesu nodhi e wi got moro, moluongo joma ne odwaro. Ne gidhi ire,

¹⁴mi oyiero apar gariyo kuomgi mondo obed kode, kendo odok jootene ma lando Wach Maber,

¹⁵kendo obed gi teko mar golo jochiende.

¹⁶Joote apar gariyo mane Yesu oyiero e magi: Simon (mane ochako ni Petro)

¹⁷gi Jakobo kod Johana ma yawuot Zebedi, (mane ochako ni Boanerges, tiende ni, jomrima)

¹⁸gi Andrea gi Filipo gi Bartholomayo gi Mathayo gi Thoma gi Jakobo wuod Alfayo, gi Thadayo gi Simon ma jakedo ni piny,

¹⁹kod Judas Iskariot, mane ondhogo Yesu.

²⁰Bang’e Yesu nodhi e ot, mi oganda maduong’ nochako ochokore, ma koro Yesu kod jopuonjrene ne ok nyal yudo thuolo kata mana mar chiemo.

²¹Kane owetene owinjo wachno, ne giwuok mondo gidhi giome, nikech ji ne wacho ni neko osemake.

²² Jopuonj Chik moko mane oa Jerusalem ne wacho ni, “En gi jachien miluongo ni Beelzebul,” kendo ni, “Ruodh jochiendeno ema omiye teko mar golo jochiende.”

²³Kane Yesu owinjo kamano, noluongo ji mondo odhi ire, mi nogoyonigi ngeche moko kopenjo gi ni, “Ere kaka Satan diriembre kende owuon?

²⁴Ka jopiny moro opogore, to pinyno ok nyal gurore.

²⁵Kata ka jodhoot moro opogore, to dhoodno ok nyal gurore.

²⁶Kuom mano, ka jo-Satan opogore e kindgi giwegi, to lochne ok nyal betie, to nyaka okethre mi orum.

²⁷“To bende, onge ng’ama nyalo turo od ng’at maratego, mi kaw mwandune, mak mana ka okwongo otueyo ng’at marategono eka doyak ode.

²⁸“Adier awachonu ni, richo duto mag ji nowenigi, koda ka ayany ma giyanyogo Nyasaye,

²⁹ to ng’at ma oyanyo Roho Maler, to ok nowene nyaka chieng’, nikech osetimo richo ma ok rum.”

³⁰Yesu nowacho kamano nikech jomoko nosewacho ni en gi jachien.

³¹Bang’e min Yesu kod owete Yesu ne jobiro. Ne gichung’ oko e dhoot, mi gioro wach mondo oluongnigi Yesu.

³²Noyudo ka ji mathoth ochokore moluoro Yesu, omiyo ne gikowone wach niya, “Meru gi oweteni jodwari oko.”

³³Yesu nodwokogi kapenjogi niya, “Mama en ng’a? Koso owetena to ng’a gini?”

³⁴Eka norango ji mane obet koluorego mowacho niya, “Neuru, magi e mama kod owetena!

³⁵Ng’ato ang’ata ma timo gima Nyasaye dwaro e owadwa gi nyamera kod mama.”