Read luo Mariko 5 Bible Online

Mariko 5 - luo bible

Mariko 5

¹Ne gichopo loka machielo mar nam Galili e piny jo-Gerasi.

²Gikanyono mane Yesu owuok e yie, ng’at moro nobiro ire.

³Ng’atno ne nigi jachien marach, kendo ne odak mana kar yiko joma otho. Onge ng’ama koro ne nyalo tueye kata mana gi nyororo, moling’.

⁴Nosetue tiendene kod luetene ndalo mang’eny, to e kinde duto nochodo nyororo mane otuego luetene kendo oriado mago motuego tiendene. Ne otek ma onge ng’ama ne nyalo kete piny.

⁵Ndalo duto ne obayo abaya e kind liete, kendo e gode, odiechieng’ gotieno, koywak kendo ong’olore gi kite.

⁶Ne oneno Yesu kapod en gi chien, mi ne oringo ogoyo chonge e nyime,

⁷koywak matek niya, “Yaye! Yesu Wuod Nyasaye Maduong’ Moloyo! Ilaro ang’o koda? Kuong’rina gi nying Nyasaye ni ok nisanda.”

⁸Ne owacho kamano nikech ne oyudo Yesu owacho niya, “In jachien marach, wuog oko kuom ng’atni.”

⁹Yesu nopenje niya, “Nyingi ng’a?” Ng’atno nodwoko ni, “Nyinga en Oganda, nikech wang’eny.”

¹⁰Eka nosiko kohombo Yesu mondo kik riemb jochiende e pinyno.

¹¹To noyudo ka kueth maduong’ mar ngurue kwayo e bath got, machiegni gi kanyo.

¹²Omiyo jochiendego nokwayo Yesu niya, “Terwa ir ngurue kande, mondo wadonj kuomgi.”

¹³Kuom mano noyie ni jochiendego, mowuok kuom ng’atno, mi odhi odonjo kuom ngurue. Eka kar romb kuethno duto, ma dirom ngurue alufu ariyo, noringo matek, karidore nyaka ei nam, mi pi onegogi pep.

¹⁴Jokwadh nguruego noringo modhi olando wachno e gweng’no duto. Eka ji nowuok mondo odhi one ane gima osetimore.

¹⁵Ne gibiro ir Yesu, mi gineno ng’at mane osebet ka nigi jochiende mang’eny cha, kobet piny kanyo, korwakore kendo ka wiye koro ber, mi giduto ne gidoko maluor.

¹⁶Joma ne oseneno gima notimore ni ngurue, nonyiso ji wachno.

¹⁷Mano omiyo jogo nokwayo Yesu mondo oa e pinygi.

¹⁸Kane Yesu donjo e yie, ng’at mane oyudo nigi jochiende cha nohombe ni, “Yie mondo wadhi kodi.”

¹⁹To Yesu ne ok oyiene, to ne owachone niya, “Dog dala ir joodu mondo inyisgi gik madongo ma Ruoth osetimoni, kendo kaka osebedoni mang’won.”

²⁰Kuom mano ng’atno noa kanyo, mi owuotho e piny Dekapoli, konyiso ji gik madongo mane Yesu otimone, kendo ji duto mane owinjo wachno nowuoro ahinya.

²¹Yesu nong’ado nam, modok loka machielo, kendo oganda maduong’ nobiro, mi olwore e dhowath kanyo.

²²Ng’at moro ma nyinge Jairo, mane jaduong’ od lemo, nobiro kanyo, kendo kane oneno Yesu, nopodho piny e tiende,

²³mohombe niya, “Nyara matin ohewore. Yie mondo ibi iket lueti kuome, ochangi, obed mangima.”

²⁴Kamano Yesu nowuok, modhi kode. To ji mang’eny ne luwe, kothung’e koni gi koni.

²⁵To kuomgi kanyo ne nitie dhako moro mane iye osechuer kuom higni apar gariyo.

²⁶Kata obedo ni jothieth mang’eny nosethiedhe, motieko pesane duto, to tuone nosiko kamedore ameda, ma ok nyal chango.

²⁷Noyudo osewinjo humb Yesu, omiyo nobiro modonjo ei oganda gi yoka ng’e Yesu mosudo ire,

²⁸kowacho e chunye niya, “Ka anyalo mulo kata mana lawe kende, to abiro ddoko mangima.”

²⁹Kamano, nomulo law Yesu, kendo gikanyono rembe nochok, mi ong’eyo e chunye ni osechango.

³⁰To e sa nogono Yesu bende nong’eyo ni teko osewuok kuome. Omiyo nolokore ei ogandano, mopenjo niya, “En ng’a mosemulo lawa?”

³¹Jopuonjrene nodwoke ni, “Ineno kaka ji othung’i marach, to eka pod ipenjo ng’ama omuli!”

³²To Yesu nomedo ng’iyo bathe koni gi koni mondo one ane ng’ama omule.

³³Dhakono nong’eyo gima osetimorene, omiyo nobiro kokirni, ka luoro omake, mi opodho e tiend Yesu, mohulone gima osetimorene.

³⁴Eka Yesu nowachone niya, “Nyara, yieni ema omiyo ichango. Dhiyo gi kue, kendo ibed mangima chuth.”

³⁵Kane pod Yesu wuoyo, joote moko noa e od Jairo, monyiso Jairo ni, “Nyari osetho. Koro ere gima omiyo pod onego ichand japuonj?”

³⁶Yesu to ne ok odewo wachgino, to nowacho ni Jairo niya, “Kik ibed maluor, to bed mana gi yie motegno.”

³⁷Bang’ mano Yesu ne ok oyie ni ng’ato mondo odhi kode, mak mana Petro gi Jakobo kod Johana owadgi Jakobo.

³⁸Ne gichopo e od jaduong’ od lemo, mi Yesu noyudo ka ji kok kendo ywak, ka goyo nduru malich.

³⁹Nodonjo e ot, mopenjogi niya, “Ang’o momiyo ukok kendo uywak? Nyathi ok otho, to onindo aninda!”

⁴⁰Kane giwinjo kamano, ne ginyiere anyiera, to nogologi duto oko. Eka nokawo wuon nyathi gi min mare, kod joma ne en-go, mi odonjo e ot, kuma ne nyathi nitie.

⁴¹Ne omako lwet nyathi, mi owachone niya, “Talitha Kumi,” tiende ni, “Nyako, a malo!”

⁴²Eka nyathino noa malo, mowuotho. (Ne en jahigni apar gariyo.) Kane jogo oneno gima otimorene, dhogi nomoko.

⁴³To Yesu nokwerogi matek mondo kik ginyis ngato wachno. Eka nowachonigi ni mondo gimi nyathino chiemo ocham.