Read luo Luka 1 Bible Online

Luka 1 - luo bible

Luka 1

¹Kuom Jaduong’ Theofilo: Ji mang’eny osetemo mondo ochan weche mane otimore kuomwa,

²ka giluwo wechena ma joma ne onenogi, kod Joland Wach Maber, onyisowa.

³Kuom mano kaka an bende asenono wechego duto malong’o nyaka a chakruokgi, aneno ni ber mondo andikni mochanore maler,

⁴mondo ing’e ni weche mosepuonji gin adier chutho.

⁵ E ndalo Herode ruodh Judea, ne nitie jadolo moro ma nyinge Zekaria, mane achiel kuom oganda jodolo miluongo ni oganda Abija. Chiege ne nyinge Elizabeth, kendo en bende ne en nyar dhood Harun jadolo.

⁶Giduto ne gin joma kare e nyim Nyasaye, kendo ne girito chike duto mag Ruoth Nyasaye gi chunygi duto.

⁷To ne gionge nyathi, nikech Elizabeth ne dhako ma migumba, kendo giduto koro ne gin joma oti.

⁸Chieng’ moro kane ogandane mar jodolo nie tich, Zekaria ne tiyo tichne mar dolo e nyim Nyasaye.

⁹Ne oyiere gi ombulu, kaluwore gi chik mane jodolo tiyogo, mondo owang’ ubani. Kuom mano nodonjo Kama Ler mar Hekalu mar Ruoth,

¹⁰ka ji to lemo oko e kinde mane iwang’oe ubani.

¹¹Eka malaika mar Ruoth nofwenyore ni Zekaria kochung’ e bath kendo-mar-ubani korachwich.

¹²Kane Zekaria onene, nobwok, mi odoko maluor.

¹³To malaika nowachone niya, “Kik ibed maluor, Zekaria! Nyasaye osewinjo kwayoni, kendo Elizabeth chiegi biro nywoloni nyathi ma wuowi, michak ni Johana.

¹⁴Inibed mamor konywole, kendo ji mang’eny bende nobed mamor,

¹⁵ nimar enobed ng’at maduong’ e nyim Ruoth Nyasaye. Ok nomadh kong’o kata gimoro amora ma mero ji, kendo chakre nywolne enobed kopong’ gi Roho Maler.

¹⁶Enoduog jo-Israel mang’eny ir Ruoth Nyasachgi.

¹⁷ Enotel e nyim Ruoth gi teko kod duong’, mana ka teko kod duong’ mar janabi Elija. Enochak okel winjruok e kind wuone gi nyithindo, bende enolok joma wigi tek mondo oluw rieko mar joma kare. Kamano enoik ni Ruoth Nyasaye oganda mowinjore bedo joge.”

¹⁸Zekaria nopenjo malaika niya, “Ere kaka dang’e ni wachni en adier, nikech an ng’at moti kendo chiega bende hike oniang’?”

¹⁹ Malaika nodwoke ni, “An e Gabriel, mochung’ e nyim Nyasaye. En ema oseora mondo alos kodi, kendo anyisi wach maberni.

²⁰To winji! Koro ibiro bedo momo ma ok ilosi nyaka chop gigo timre, nikech ok iseyie gi wachna mabiro timore adier, ka kinde moketne ochopo.”

²¹To e kinde no duto, ji ne rito Zekaria, kendo ne giwuoro ahinya kaka odeko e Hekalu!

²²To kane owuok oko, ne ok onyal wuoyo kodgi, omiyo ne ging’eyo ni oseneno fweny e Hekalu. Ne ochung’ e nyimgi, konyisogi gik moko mana gi lwete, nikech ne ok onyal wuoyo.

²³Kane Zekaria otieko ndalone mag tich, ne odok dala.

²⁴Bang’e Elizabeth chiege nomako ich, kendo ne ok owuok oko kuom dueche adek, koparo ni,

²⁵“Gima otimorenani, Ruoth ema otimo. Osetimona ng’wono mondo ogolna wichkuot ma asebedogo e nyim ji.”

²⁶Kane Elizabeth nigi ich mar dueche auchiel, Nyasaye nooro malaika Gabriel mondo odhi e piny Galili, e dala moro miluongo ni Nazareth.

²⁷ Ne oore ir nyako moro mane osetimo osiep mar kend gi ng’at moro ma nyakwar Daudi, ma nyinge Josef. Nyakono to ne nyinge Maria.

²⁸Malaika nobiro ire, mowachone niya, “Misawa! Ruoth ni kodi, kendo oseguedhi ahinya.”

²⁹To kane Maria owinjo wechego, chunye nochandore ahinya, koparo gima omiyo omose kamano.

³⁰Malaika nowachone ni, “Kik ibed maluor, Maria, nikech Nyasaye osetimoni ng’wono.

³¹ Ibiro mako ich, kendo ninywol nyathi mawuowi, michak nyinge ni Yesu.

³² Enobed gi duong’, kendo noluonge ni Wuod Nyasaye Maduong’ Moloyo. Ruoth Nyasaye nokete ruoth kar Daudi kwar mare,

³³mi enobed ruodh nyikwa Jakobo nyaka chieng’, kendo lochne ok norum.”

³⁴To Maria nopenjo malaika niya, “Ere kaka mano nyalo timore, to pod an nyako silili kama?”

³⁵Eka malaika nodwoke ni, “Roho Maler biro lor kuomi, kendo teko mar Nyasaye Maduong’ Moloyo biro umi. Kuom mano, nyathi maler mibiro nywolono noluong ni, ‘Wuod Nyasaye’.

³⁶Bende ng’e ni Elizabeth, wayu moti cha, osemako ich nyathi mawuowi, kendo dhako ma yande iluongo ni migumbano, koro nigi ich mar dueche auchiel,

³⁷ nikech onge gima nyalo tamo Nyasaye.”

³⁸Maria nowachone niya, “Eri an ka, an jatich Ruoth. Ber mondo otimrena kaka iwachono.” Eka malaika noweye modhi.

³⁹Bang’ mano Maria nowuok, moreto kodhi e dala moro e piny gode mag Juda.

⁴⁰Ne odonjo e od Zakaria, momoso Elizabeth,

⁴¹to kane Elizabeth owinjo mos Maria, nyathi notugo e iye. Eka Roho Maler nopong’e,

⁴²mokok kowach niya, “Oguedhi moloyo mon duto, kendo nyathi mibiro nywolo bende ogwedhi!

⁴³Koro anto an ng’a, momiyo min Ruodha obiro lima?

⁴⁴Adier awachoni ni e sa ma awinjo kimosae nyathi manie iya notugo gi mor.

⁴⁵Mano kaka in jahawi kuom yie ni wach ma Ruoth ooroni biro timore.”

⁴⁶Maria nowacho niya,

⁴⁷“Chunya pako Ruoth! Adier, amor nikech Nyasaye Jawarna,

⁴⁸ nimar osepara, an jatichne ma jachan. Chakre kawuono, tienge duto noluonga ni ng’ama oguedhi,

⁴⁹nikech gik madongo ma Nyasaye Manyalo Gik Moko Duto osetimona. Mano kaka en Ng’ama Ler!

⁵⁰Otimo ng’wono ni joma oluore, e tienge duto.

⁵¹Oserieyo bade motegno, mi okeyo josunga, kaachiel gi parogi, kucha.

⁵² Oseriembo ruodhi e kombegi, kendo oseting’o jochan malo.

⁵³Oseyieng’o joma odenyo gi gik mabeyo, to joma omew oseriembo gi lwetgi nono.

⁵⁴Osekonyo jo-Israel jotichne,

⁵⁵ bende oseparo Ibrahim kod nyikwaye, motimonigi ng’wono nyaka chieng’ kaka nosingore ni kwerewa ni notim.”

⁵⁶Maria nobet gi Elizabeth kuom dueche adek, eka nodok thurgi.

⁵⁷Koro kinde nochopo ma onego Elizabeth nywolie, mi ne onywolo nyathi ma wuowi.

⁵⁸Kane joodgi kod jogweng’gi owinjo ng’wono maduong’ mane Ruoth osetimone, giduto ne gidoko mamor, kaachiel kode.

⁵⁹ Eka chieng’ mar aboro, ne gibiro mondo giter nyathi nyangu, kendo ne gidwaro chake ni Zakaria, nying wuon mare.

⁶⁰To min mare nowacho niya, “Ooyo, nyinge en Johana.”

⁶¹To ne giwachone ni, “Onge jaodu moro mochak nyingno.”

⁶²Eka ne giwuoyo gi wuon nyathi gi lwetgi, ka gipenjo nying’ modwaro chake.

⁶³Zakaria nokwayo bao, mi ondikoe ni, “Nyinge en Johana,” mi giduto ne giwuoro!

⁶⁴Gikanyono dho Zekaria noyawore, kendo lewe nogonyore mi ochako wuoyo kodendo Nyasaye.

⁶⁵Luoro nomako jogweng’gi duto, kendo wechego nolandore e piny gode mag Judea duto.

⁶⁶Ji duto mane owinjo wachno nosiko kaparo wachno e chunygi, kendo kawuoro ni, “Nyathini nobed ng’at malich manadi!” To nikech adier Ruoth ne ni kode.

⁶⁷Roho Maler nobiro mopong’o Zekaria, wuon Johana, mi okoro wach kama:

⁶⁸“Wapakuru Ruoth ma Nyasach Israel, nikech ne obiro konyo joge, mi owarogi.

⁶⁹Osekelonwa Jawar maratego, moa e dhood Daudi jatichne, mana kaka nosingore.

⁷⁰Nosingore kamano nyaka nene, komiyo jonabine maler wacho ni

⁷¹obiro resowa e lwet wasikwa, kendo e teko joma mon kodwa duto.

⁷²Ne owacho bende ni notimni kwerewa ng’wono, kendo ni nopar singruokne maler.

⁷³Mano e singruok mane otimo ni kwarwa Ibrahim,

⁷⁴kokuong’ore ni noreswa e lwet wasikwa kendo ni nomi watine maonge luoro,

⁷⁵kwabedo maler kendo malong’o e nyime ndalo duto mag ngimawa.

⁷⁶ To in nyathina, noluongi ni, janabi mar Ng’ama Duong’ Moloyo. Initel nyim Ruoth mondo ilosne yo,

⁷⁷kinyiso joge ni giniyud warruok, ka richogi owenigi.

⁷⁸Mano notimre nikech Nyasachwa ng’won kendo muol. Enomi Jal mawuok e polo, machalo gi ler mar okinyi, limwa,

⁷⁹ mondo orieny kuom joma odak e mudho, kendo e tipo mar tho, kendo mondo otawa e yo mokue.”

⁸⁰Nyathi ma Johana nodongo, modoko motegno e chunye, kendo nodak e thim nyaka nochopo chieng’ mane owuok, monyisoree ratiro e nyim jo-Israel.