Read luo Luka 17 Bible Online

Luka 17 - luo bible

Luka 17

¹Yesu nowacho ni jopuonjrene niya, “Gik mamiyo ji donjo e richo ok nyal bare mak obetie. To mano kaka nobed malit ni ng’at makelogi!

²Da obedo maber ka otuene pong’ e ng’ute, mi onyumego e nam, moloyo komiyo achiel kuom joma tindogi odonjo e richo.

³ Beduru motang’! Ka owadu okethoni, to kwere. To koyie kethone, to wene.

⁴Ka okethoni nyadibiriyo e odiechieng’ achiel, mi obiro iri ndalo abiriyo kokwayi mondo iwene, to nyaka iwene.”

⁵Joote nowacho ni Ruoth Yesu niya, “Medwa yie.”

⁶To Ruoth nowachonigi niya, “Da bed ni un gi yie kata matin marom gi koth karadali, to da uwacho ni yadhni ni, ‘Pudhri, mondo idhi ipidhri e nam,’ mi dowinjou.

⁷“Ere ng’ato kuomu man gi jatich mapuro kata makwayo jambe, ma ka jatichno oa puodho to dowachne ni, ‘Reti ibi ibed piny mondo ichiem’?

⁸Donge dowachne mana ni, ‘Losna chiemo, kendo iikri mondo igamna gima adwaro kachiemo kendo ametho. Eka bang’e in bende ibi ichiem.’

⁹Koso uparo ni bende dogo ni jatichneno erokamano kuom timo gima nowachone ni mondo otim?

¹⁰Kamano e kaka un bende, ka usetimo gik moko duto mane onyisu ni mondo utim, to onego uwach ni, ‘Wan mana jotich aticha, omiyo onge erokamano monego wayudi, nikech wasetiyo mana tichwa.’ ”

¹¹Kane Yesu dhi Jerusalem, nowuotho e kind Samaria gi Galili.

¹²Noyudo odonjo e dala moro, mi jodhoho apar noromo kode. Ne gichung’ gi chien,

¹³mi gikok niya, “Yesu! Yie ikechwa.”

¹⁴ Yesu nonenogi, mowachonigi ni, “Dhiuru ir jadolo mondo orang dendu.” To kane oyudo gin e yo gidhi, ne gichango.

¹⁵Achiel kuomgi, kane oneno ni osechango, nodwogo ir Yesu kopako Nyasaye matek.

¹⁶Ne ogoyo chonge piny, mokulore e tiend Yesu, kogoyone erokamano. To ne en ja-Samaria!

¹⁷Yesu nopenjo niya, “Donge ne gin ji apar mane ochango koso? Koro ere ji ochiko mamoko?

¹⁸Ere gima omiyo japiny moro nononi kende ema oduogo mondo ogo ni Nyasaye erokamano?”

¹⁹Eka nowacho ni ng’atno niya, “Chungi, idhi. Yieni ema omiyo ichango.”

²⁰Jo-Farisai moko nopenjo Yesu chieng’ ma Loch Nyasaye nobie. Nodwokogi niya, “Onge ranyisi ma ji biro neno manyiso chieng’ ma Loch Nyasaye biroe.

²¹Bende onge ng’ama nowach ni, ‘Neuru, erigo!’ kata ni, ‘Echago cha,’ nikech Loch Nyasaye nie dieru!”

²²Eka nowacho ni jopuonjrene niya, “Ndalo nobi ma unugomb nenoe chieng’ achiel kuom ndalo mag Wuod Dhano, to ok unune.

²³Bende jomoko nowachnu ni, ‘Neuru, en kucha!’ kata ni, ‘Neuru, en ka!’ To kik uwuog mondo uluwgi,

²⁴nikech kaka mil polo piatore e kor polo koa konchiel nyaka komachielo, e kaka Wuod Dhano bende nobedi chieng’ mobiroe.

²⁵To mokwongo nyaka one masiche mang’eny, kendo tieng’ ma kawuononi nyaka dage.

²⁶ Kaka notimore e ndalo Nowa, e kaka notimre e ndalo Wuod Dhano.

²⁷ Ji duto nosiko chiemo achiema kendo metho. Chwo ne kendo, kendo nyiri bende ne dhi tedo, nyaka nochopo chieng’ mane Nowa odonjo e yie, mi pi oimo piny, motieko ji pep.

²⁸ Kamano bende, kaka notimore e ndalo mag Lut, e kaka notimre chieng’ ma Wuod dhano biroe. Ji ne chiemo kendo metho. Ne ging’iewo, kendo ne giloko ohala, bende ne gichwoyo, kendo gigedo.

²⁹To chieng’ mane Lut owuokie Sodom, mach kod kite maliel nolwar koa e polo, mi otieko gi pep.

³⁰Kamano e kaka notimre chieng’ ma Wuod Dhano nonyisree.

³¹ “Ng’at manie wi tat ode chieng’no kik lor piny mondo ogol gige manie ot odhigo. Bende ng’at man oko e puodho kik dog dala.

³² Paruru gima notimore ni chi Lut!

³³ Ka ng’ato otemo reso ngimane, to ngimane nolalne, to ka ng’at ma ojwang’o ngimane, nores ngimane.

³⁴Awachonu ni, otienono ji ariyo nobed kanindo e kitanda achiel; achiel nokaw, to machielo nowe.

³⁵Mon ariyo bende nobed ka rego kaachiel; achiel nokaw to machielo nowe. [

³⁶Ji ariyo nobed katiyo e puodho; achiel nokaw, to machielo nowe.”]

³⁷Eka ne gipenje niya, “Mano notimre kanye, Ruoth?” Nodwokogi ni, “Kama gimoro othoe ema achudhe chokoree!”