Read luo Luka 22 Bible Online

Luka 22 - luo bible

Luka 22

¹ Koro Sap Makati ma ok ketie Thowi, miluongo ni Pasaka, ne chiegni.

²To jodolo madongo kod jopuonj Chik ne dwaro yo ma digineggo Yesu ling’ling’, nimar ne giluoro ji.

³Bang’e Satan nodonjo kuom Judas miluongo ni Iskariot, mane acheil kuom jopuonjre Yesu apar gariyo.

⁴Omiyo nodhi opimo wach gi jodolo madongo kod jotend jorit Hekalu, kaka doket Yesu e lwetgi.

⁵Ne gimor ahinya, kendo ne giwinjore kode ni ginimiye pesa.

⁶Judas noyie, kendo nochako dwaro rieko ma doketgo Yesu e lwetgi ka ji ok ong’eyo.

⁷Chieng’ Sap Makati ma ok ketie Thowi, ma inegoe nyarombo Pasaka, nochopo.

⁸Yesu nooro Petro kod Johana, kowachonigi ni, “Dhiuru ulosnwa Pasaka mondo wabi wacham.”

⁹To ne gipenje ni, “Ere kama idwaro ni mondo walosee?”

¹⁰Nowachonigi niya, “Ka usedonjo Jerusalem, to ubiro romo gi ng’aat moting’o dapi. Luweuru nyaka ot modonjoe,

¹¹kendo nyisuru wuon odno ni, ‘Japuonj penji ni, ere ot moikne, mobiro chamoe Sap Pasaka gi jopuonjrene?’

¹²Eka obiro nyisou ot malach moiki e gorofa malo. Kanyo ema mondo uikie gik moko duto.”

¹³Kamano ne gidhi, kendo ne ginwang’o gik moko duto mana kaka Yesu nosenyisogi, mi giiko Pasaka kuno.

¹⁴Kane sa ochopo, Yesu nobet e mesa kod jootene.

¹⁵Nowachonigi niya, “Asegombo ahinya mondo acham Pasakani kodu kapok osanda,

¹⁶nimar awachonu ni ok nachak achame ngang’ nyaka chop time mogik e Piny Ruoth Polo.”

¹⁷Eka nokawo kikombe, mi ogoyo ni Nyasaye erokamano. Bang’e nowacho niya, “Kawuru ma, mondo upogru,

¹⁸nimar awachonu ni chakre kawuono ok nachak amadh divai nyaka chop Loch Nyasaye bi.”

¹⁹Eka nokawo makati, kendo kosegoyo ni Nyasaye erokamano, nong’ingo makatino, kowacho ni, “Ma e ringra mochiw nikech un. Timuru kamano mondo uparago.”

²⁰ Kamano bende nokawo kikombe bang’ chiemo, kowacho niya, “Kikombe ni e remba, mochwer nikech un, kitimonugo Winjruok Manyien gi Nyasaye.

²¹ To ng’euru ni ng’at mondhoga ni koda e mesa ka!

²²Wuod Dhano biro tho mana kaka Nyasaye nochano. To mano kaka nobed malit ni ng’at mondhoge!”

²³Eka ne gichako penjore kendgi ni en ng’a kuomgi ma ditim gima kamano.

²⁴ Mbaka nowuok e kind jopuonjre ka gipenjore ni en ng’a ma kwano ka ng’ama duong’ moloyo kuomgi.

²⁵Yesu nowachonigi niya, “Ruodhi mag pinyni nigi teko kuom jogi, kendo jotelo dwaro ni mondo ji oluonggi ni, ‘Osiepe ji’.

²⁶ To un ok uchal kamano. Ng’at maduong’ie moloyo kuomu nyaka bed ka ng’ama tinie moloyo, kendo jatelo nyaka bed ka jatich.

²⁷ Kuom ji ariyogi, ere ng’ama duong’ie moloyo wadgi? Jal ma obet kachiemo, koso jal matiyone? Donge en jal ma obet kachiemo? To an, an e kindu ka ng’at matiyo.

²⁸Un e joma osesiko koda e masichena duto,

²⁹kendo kaka Wuora osechano mondo omiya teko mar loch, e kaka un bende asechano mondo uyud loch.

³⁰ Unuchiem kendo unumethi koda e pinya, kendo unubed e kombe ruodhi, kung’ado bura ni dhoudi apar gariyo mag Israel.”

³¹Eka Yesu nodhi nyime ni, “Simon, Simon, winji! Satan oseyudo thuolo mondo opiedhu mana kaka dhako piedho cham.

³²To in aselemoni mondo yieni kik lal, kendo ka iselokori, miduogo ira, to nyaka ijiw oweteni.”

³³Petro nodwoke ni, “Ruoth, aikora dhi kodi e jela kata mana kar tho bende.”

³⁴To Yesu nodwoke niya, “Petro awachoni ni thwon gweno ok ang’ nokog tinende kapok ikweda didek ni ok ing’eya.”

³⁵ Bang’ mano, Yesu nopenjogi ni, “E ndalo mane aorou ka uonge gi ofuko mar pesa, kata sandug wuoth, kata gi wuoche, ne uchando gimoro koso?” Ne gidwoke ni, “Onge gima ne wachando.”

³⁶Eka nowachonigi niya, “To koro akonu ni ng’at man gi ofuko mar pesa, kata sandug wuoth, mondo okaw, bende ng’at ma onge gi ligangla mondo olok lawe, ong’iewgo ligangla,

³⁷ nimar awachonu ni gima Muma wacho ni, ‘Ne okwane kod joketho’, nyaka timre kuoma, nikech gik ma ondik kuoma koro chiegni timore.”

³⁸Jopuonjrene nowachone ni, “Ruoth, ligengni ariyo eki ni ka.” En to nokwerogi ni, “Weuru wuoyo kamano!”

³⁹Yesu nowuok, modhi e got Zeituni kaka ne otimo pile, kendo jopuonjrene bende nodhi kode.

⁴⁰Kane ochopo kanyo, nowachonigi niya, “Lemuru mondo kik udonj e tem.”

⁴¹Eka noweyogi modhi kuma ochwalore ma dirom diro kidi, mi nogoyo chonge piny, kendo olemo,

⁴²kowacho niya, “Wuora kiyie to gol kikombe mar masirani oa kuoma, to ok kaka an ema adwaro, to gima idwaro ema mondo otimre.” [

⁴³Eka malaika moa e polo nofwenyorene, mi omiye teko.

⁴⁴Chunye nochandore malit ahinya, mi nomedo lemo matek, kendo luya nochotne maton piny mana ka remo.]

⁴⁵Kane oa malo bang’ lemo, ne odok ir jopuonjrene, mi onwang’o ka nindo oterogi, nikech chunye ne lit.

⁴⁶Nowachonigi ni, “Ang’o momiyo unindo? Auru malo ulem, mondo kik udonj e tem.”

⁴⁷Kane pod owuoyo, ji moko mang’eny notucho, ka jal miluongo ni Judas otelonigi. Ne en achiel kuom joote apar gariyo. Nosudo ir Yesu mondo onyodhi.

⁴⁸To Yesu nopenje niya, “Judas, indhogo Wuod Dhano mana gi nyoth koso?”

⁴⁹Kane jopuonjre Yesu oneno gima dwaro timore, ne gipenje niya, “Ruoth, waked gi ligangla koso?”

⁵⁰Eka ng’at achiel kuomgi nong’ado it jatich jadolo maduong’ ma korachwich oko.

⁵¹To Yesu nokwere ni, “We timo kamano!” Eka nomulo it ng’atno, mochango.

⁵²Bang’ mano Yesu nowacho ni jodolo madongo gi jotend jorit Hekalu, kod jodongo mane obiro mondo omake niya, “Ere gimomiyo ubirona gi ligengni kod arunge, mana ka gima an jamecho?

⁵³ Pile ne an kodu e Hekalu, to ne ok umaka. To koro ma e sa maru, ka teko mar mudho tiyo.”

⁵⁴Ne gimako Yesu, mi gitero e od jadolo maduong’, to Petro noluwo bang’gi gi chien.

⁵⁵Kane gisemoko mach e laru, mi gibet piny kanyo, Petro nobiro mobet kodgi.

⁵⁶To nyako moro ma jatich nonene ka mach liel, morango wang’e tir, kendo owacho niya, “Jali bende ne ni kode!”

⁵⁷To Petro nokwer ni, “Nyako! Ok ang’eye.”

⁵⁸Bang’e matin, ng’at moro bende nonene mowachone niya, “In bende in achiel kuomgi!” To Petro nodwoke ni, “Omera, ok an!”

⁵⁹Bang’e kinde ma dirom sa achiel, ng’at machielo nojiwo wach matek, ni, “Adier, jali bende ne ni kode, nikech en ja-Galili.”

⁶⁰To Petro nokwer, kawacho niya, “Omera, ok ang’eyo gima iwacho!” Gikanyono, kapod owuoyo, thwon gweno nokok.

⁶¹Eka Ruoth Yesu nolokore mong’iyo Petro, mi Petro noparo wach mane osewachone ni, “Tinendeni, kapok thwon gweno okok, to ang’ nikweda didek.”

⁶²Mano omiyo Petro nowuok oko, moywak malit.

⁶³Joma ne rito Yesu nojare, kendo ogoye.

⁶⁴Ne giumo wang’e mi gipenje ni, “Hul ane ng’ama ogoyi.”

⁶⁵Bende ne giyanye gi weche mang’eny maricho.

⁶⁶Kane piny oyawore, jodong jo-Yahudi gi jodolo madongo kod jopuonj Chik nochokore, mi oter Yesu e buchgi.

⁶⁷Ne giwachone ni, “Ka in e Mesia adier, to nyiswa ane.” En to nokonigi ni, “Ka anyisou, to ok ubi yie,

⁶⁸to bende ka apenjou gimoro, to ok ubi dwoka.

⁶⁹To chakre kawuono, Wuod Dhano biro bet e bat korachwich mar Nyasaye Manyalo Gik Moko Duto!”

⁷⁰Eka ne gipenje giduto ni, “To kara, in e Wuod Nyasaye?” Nodwokogi ni, “Uwacho adier ni an e en.”

⁷¹Bang’ mano, ne giwacho ni, “Koro pod wadwaro joneno nang’o, to wan wawegi wasewinjo dhoge owuon?”