Read luo Luka 23 Bible Online

Luka 23 - luo bible

Luka 23

¹Eka joburano duto nochung’ motero Yesu e nyim Pilato,

²mi gichako donjone kuno, ka giwacho niya, “Ne wanwang’o jali kapuonjo jowa marach, kokwerogi ni kik gigol osuru ni Kaisar, kendo kowacho ni en owuon en Mesia, tiende ni ruoth.”

³Eka Pilato nopenjo Yesu ni, “In e ruodh jo-Yahudi koso?” To en nodwoko ni, “In ema isewacho kamano.”

⁴Bang’ mano, Pilato nowacho ni jodolo madongo kod joma nochokore duto ni, “Ok ayudo jali gi ketho.”

⁵To ne gijiwo wach matek niya, “Oketho ji, kopuonjo e Judea duto. Ne ochako Galili, kendo koro osechopo ka.”

⁶Kane Pilato owinjo kamano, nopenjo ka Yesu en ja-Galili.

⁷To kane osenyise ni oa kuno, notere ir Herode ma bende noyudo ni Jerusalem e ndalogo.

⁸Herode nodoko mamor ahinya koneno Yesu, nikech nosewinjo humbe, omiyo nogombo ahinya mondo onene, kendo oneye hono moro motimo.

⁹Ne openjo Yesu weche mang’eny, to Yesu ne ok odwoke kata wach achiel.

¹⁰Jodolo madongo kod jopuonj Chik nobiro, mondonjone matek ahinya.

¹¹Herode kaachiel gi askechene nojare, kendo nonyiere. Eka Herode nogolo chik, morwakne kandhu maber, bang’e odwoke ir Pilato.

¹²Chieng’ onogo, Herode gi Pilato ne jomako osiep, nikech noyudo gisebedo ka gimonre chon.

¹³Pilato noluongo jodolo madongo gi jodongo kod ji duto,

¹⁴mi owachonigi niya, “Nende ukelona jali ni en ng’at maketho oganda, to asenone e nyimu, kendo ok ayudo ni en gi ketho mudonjonegogi.

¹⁵To kata mana Herode bende ok oyude gi ketho, nimar osedwokonwago. Onge gima ng’atni osetimo mowinjore gi buch tho.

¹⁶Emomiyo abiro golo chik mondo odhi.” [

¹⁷Nowacho kamano nikech higa ka higa e Sawo mar Pasaka ne nyaka ogony ni ji ng’at achiel motue.]

¹⁸To oganda ji duto nokok ni, “Neg ng’atni, to gonynwa Baraba!” (

¹⁹Baraba en ng’at mane oseket e jela nikech wach koko mane otimore Jerusalem, kendo nikech nek.)

²⁰Pilato ne dwaro gonyo Yesu, omiyo nochako owuoyo gi ji kendo.

²¹To ne gikok ni, “Gure e msalaba! Gure e msalaba!”

²²Eka nochako openjogi mar adek ni, “To ere gima rach mosetimo? Ok wanwang’o ketho kuome mowinjore gi tho. Omiyo abiro chwade, to aweye odhi.”

²³To ne gisiko ka gikok matek moloyo ni mondo ogur Yesu e msalaba, nyaka kokogi

²⁴nomiyo Pilato oyie ng’ado bura kaka gidwaro.

²⁵Ne ogonyo jal mane gikwayo, mane oyudo otue nikech koko kendo nikech nek. Yesu to noketo e lwetgi mondo gitimne kaka gidwaro.

²⁶Kane gigolo Ysu kanyo mondo gidhi ginegi, ne gimako ng’at moro ma nyinge Simon ja-Kurene mane oyudo biro Jerusalem koa e gweng’ moro. Ne giyieyone msalaba mondo oting’, koluwo bang’ Yesu.

²⁷Oganda maduong’ noluwo Yesu, ka mon goyo nduru malit, kaywage.

²⁸To Yesu nolokore, mowachonigi niya, “Un nyi Jerusalem, weuru ywaga, to ywagreuru mana un uwegi, kendo ywaguru nyithindu,

²⁹nikech ndalo biro ma ji nowachie ni, ‘Mano kaka mon maonge nyithindo gin johawi! Adier, mon ma ok onywol, kendo ma thundegi ok odhodhi gin johawi!’

³⁰ Bende giniwach ni gode niya, ‘Ruombreuru kuomwa!’

³¹Ka gik ma kamagi timore ni an, ma achalo gi yath manumu, to ang’o ma notimrenu, un muchalo gi yath motwo?”

³²Ji ariyo mamoko ma joketho bende ne gidhigo mondo gigur gi Yesu.

³³Kane gichopo kama iluongo ni, ‘Hanga Wich’, ne giguro Yesu e msalaba, kaachiel gi joketho ariyogo, achiel e bathe korachwich, to machielo e bathe koracham.

³⁴ Yesu nowacho niya, “Wuora, wenigi, nikech gikia gima gitimo.” Askeche to nokawo lepe, mi gipogore gi ombulu.

³⁵ To ji mang’eny ne ni kanyo, kaneno gima timore, kendo jodong jo-Yahudi nonyiere, kawacho ni, “Noreso jomoko, omiyo ka en e Mesia ma Nyasaye oseyiero adier, to mondo oresre ane!”

³⁶ Askeche bende ne ojare. Ne gibiro ire, mi gimiye kong andwayo,

³⁷ka giwachone ni, “Ka in e ruodh jo-Yahudi to resri ane!”

³⁸Bende ewi msalaba malo nondiki ni, “JALI E RUODH JO-YAHUDI.”

³⁹Achiel kuom joketho mane ogur kanyogo nogoyo ni Yesu siboi, kawachone ni, “Donge in e Mesia? Ara, resri ane, kendo ireswa wan bende!”

⁴⁰To ng’at machielo nokwero jalo ni, “Ok iluoro kata mana Nyasaye? Donge ineno ka wanie kum achiel kode?

⁴¹To wan okumwa kare, nikech wayudo gima owinjore gi timwa. Jali to onge gima rach mosetimo.”

⁴²Eka nowacho ni Yesu niya, “Para, chieng’ miyudoe lochni.”

⁴³Yesu nodwoke ni, “Adier awachoni ni, tinende ang’ nibed koda e Paradis.”

⁴⁴ Koro ne en kar sa auchiel mar odiechieng’, to wang’chieng’ noimore, mi piny duto otimo mudho nyaka sa ochiko.

⁴⁵Nanga mane ogeng’o Kama Ler mar Hekalu noriedore diere ariyo.

⁴⁶ Eka Yesu nokok matek niya, “Wuora, aketo chunya e lweti.” To kane osewacho kamano, chunye nochot.

⁴⁷Kane jaduong’ lweny oneno gima otimore, nomiyo Nyasaye duong’, kowacho ni, “Adier jali ne en ng’at makare!”

⁴⁸Ji duto mane ochokore kanyo mondo one wachno noneno gik ma notimore, kendo ne gidok miechgi ka gikino wigi.

⁴⁹ To osiepe Yesu duto, kod mon mane oseluwe koa Galili, nochung’ gi chien kaneno gigo.

⁵⁰Ne nitie ng’at moro ma nyinge Josef, mane oa e dala jo-Yahudi miluongo ni Arimathaya. Ne en ng’at makare kendo mogen, kendo ne ogeno ni none Loch Nyasaye.

⁵¹Kata obedo ni ne en achiel kuom jobuch jo-Yahudi kamano, to ne ok oyie gi dwarogi kata gi gima gitimo.

⁵²Nodhi ir Pilato, mokwayo mondo omiye ringre Yesu.

⁵³Kamano noloro ringre Yesu piny, moboyo gi nanga maber, eka nokete e bur mane osekuny ariwa e kor lwanda. Ne en bur manyien, mapok oyikie ng’ato.

⁵⁴Chieng’no ne chieng’ Ikruok, tiende ni tich abich, kendo Sabato ne okayo machiegni.

⁵⁵Mon mane oseluwo Yesu koa Galili, nodhi gi Josef moneno burno, kendo oneno kaka ne oketie ringre Yesu.

⁵⁶ Bang’e ne gidok Jerusalem, mi giloso mo mang’ue ng’ar kod yath madum mamit. Chieng’ Sabato to ne giyueyo kaka Chik Musa dwaro.