Read luo Luka 8 Bible Online

Luka 8 - luo bible

Luka 8

¹Bang’ kinde moko, Yesu nowuotho e mier madongo kod matindo duto, kalando Wach Maber mar Loch Nyasaye. Jopuonjrene apar gariyo bende ne jodhi kode,

² kaachiel gi mon moko mane osegolonigi jochiende maricho, kendo ochango tuochegi, kaka Maria, mane iluongo ni Magdala, mane osegolone jochiende abiriyo,

³gi Joana chi Chuza, mane jatelo e od Herode, gi Susana, kaachiel gi mon mamoko mang’eny. Mon-go ne konyo Yesu kod jopuonjrene mana gi gigi giwegi.

⁴Ji nosiko ka biro ir Yesu, kaa e mier duto, kendo chieng’ moro kane oganda maduong’ osechokore, Yesu nogoyonigi ngero niya,

⁵“Ng’at moro ne odhi chuoyo, kendo kane oyudo ochuoyo, kodhi moko nolwar e wang’yo, mi ji nonyonogi, kendo winy nochamogi.

⁶To kodhi moko nolwar kama otimo lwanda, kendo kane gisetwi, ne giwang’, nikech lowono ne ok ng’ich.

⁷Kodhi moko to ne olwar e kind kudho, kendo kudho nodongo e kindgi, mothung’ogi.

⁸Kodhi moko to nolwar e lowo maber, mi otwi, kendo odongo, bang’e moro ka moro nonyago kodhi mia achiel.” Eka Yesu notieko kawacho ni, “Ng’at man gi it mar winjo, to mondo owinji!”

⁹Jopuonjre Yesu nopenje mondo onyisgi tiend ngerono,

¹⁰ mi nodwokogi niya, “Un osemiu ng’eyo weche mopondo mag Loch Nyasaye. Ji mamoko to ipuonjo mana e yor ngeche, kaka muma wacho ni, ‘Kata da ging’ichi manadi, to ok ginyal ng’eyo, bende kata da giwinji, to wach ok nyal donjonigi.’ ”

¹¹Eka nowacho ni jopuonjrene niya, “Tiend ngerono e ma: Kodhi en wach Nyasaye.

¹²Omiyo kodhi mane olwar e wang’yo ochung’ kar joma winjo wachno, to Satan biro, kendo gole oko e chunygi, mondo kik gibed gi yie, mi wargi.

¹³To kodhi mane olwar kama otimo lwanda ochung’ kar jogo ma winjo wachno, kendo yiego gi mor. To wachno ok mok e chunygi, to gibedo gi yie mana kuom ndalo matin kende, to ka tem obiro, to gipodho.

¹⁴Kodhi mane olwar e kind kudho, to gin jogo, ma winjo wachno, to parruok, gi mwandu, kod mor mar piny, thung’ogi, kendo ok ginyag gimoro maber.

¹⁵To kodhi mane olwar e lowo maber, gin joma winjo wachno gi chuny makare kendo malong’o, kendo gimake matek, nyaka chop ginyagi.

¹⁶ “Onge ng’at manyalo moko taya, to aye umo gi atonga, kata keto e bwo kitanda. To okete mana e rachungi taya, mondo orieny ni joma donjo e ot.

¹⁷ Onge gima opandi ma ok nong’ere kendo onge gimoro moum, ma ok nofwenyre ratiro.

¹⁸ Emomiyo chikuru itu maber mondo uwinj gima iwachonu, nimar ng’at man-go ema nomedi, to ng’at maongego, noma kata mana mano matin moparo ni en-go!”

¹⁹Min Yesu kod owetene nobiro ire, to ne ok ginyal chopo bute nikech ji ne ng’eny ahinya.

²⁰Eka ng’at moro nowacho ni Yesu niya, “Meru kod oweteni ochung’ oko, dwaro neni.”

²¹To Yesu nodwokogi ni, “Joma winjo wach Nyasaye kendo rito e mama kendo e owetena.”

²²Chieng’ moro Yesu nodonje e yie gi jopuonjrene, mowachonigi niya, “Wang’aduru nam mondo wadhi loka cha.” Kuom mano ne gisiayo yie.

²³To kane gikwang’, nindo notero Yesu. Eka ahiti mang’ongo notugore e nam, mi pi nochako pong’o yie kendo koro ne gichiegni tho.

²⁴Omiyo ne gisudo ir Yesu mi gichiewe, ka giwachone niya, “Ruoth! Ruoth! Watho!” Yesu noa malo, mokwero yamo gi apaka mager mi oling’, kendo nam nokue.

²⁵Bang’ mano, nopenjo jopuonjrene niya, “Ere yie ma un-go?” To ne giluor, kendo ne giwuoro, mi gipenjore niya, “Ma en ng’ama nadi, makwero kata mana yamo gi apaka, to winje awinjani!”

²⁶Ne gikwang’, mi gichopo e piny jo-Gerasi, man loka machielo mar Galili.

²⁷To kane Yesu owuok oko e dhonam, noromo gi ng’at moro man gi jochiende, ng’atno noyudo osedar e dala mane odakie, kendo kuom ndalo mang’eny, nobedo kowuotho duk, bende ne ok odak e ot, to nosiko mana kama iyikoe joma otho.

²⁸Kane oneno Yesu, ne oywak matek, mi opodho e nyime kokok niya, “Yaye! Yesu, Wuod Nyasaye Maduong’ Moloyo! Ilaro ang’o koda? Asayi kik isanda!”

²⁹Ne owacho kamano nikech ne oyudo Yesu osekwero jachien marach mondo owuog oko kuome. Jachiendno nosethage kuom kinde mang’eny, kendo kata obedo ni ji ne orite matek, kotue luetene gi tiendene kod nyororo, to ne ochodo achoda, mi oring odhi e thim ka jachien riembe.

³⁰Yesu nopenje niya, “Nyingi ng’a?” To nodwoko ni, “Nyinga en Oganda.” Nodwoko kamano nikech jochiende mang’eny nosedonjo kuome.

³¹Eka jochiendego nohombo Yesu mondo kik oriembgi gidhi e Bur Matut Maonge Gikone.

³²To noyudo ka kueth maduong’ mar ngurue kwayo e bath got, machiegni gi kanyo. Jochindego nohombo Yesu ni mondo oyienigi gidonj kuom nguruego, mi noyienigi.

³³Omiyo ne giwuok kuom ng’atno, mi gidhi gidonjo kuom ngurue. Eka nguruego duto noringo matek karidore nyaka ei nam, mi pi onegogi pep.

³⁴Kane jokwadhgi oneno gima otimore, ne giringo, mi gidhi gilando wachno e gweng’no duto.

³⁵Eka ji nowuok mondo odhi one ane gima osetimore. Ne gibiro ir Yesu, mi ginwang’o ng’at mane jochiende owuok kuomeno kobet piny e tiend Yesu, korwakore, kendo ka wiye koro ber, mi giduto ne gidoko maluor.

³⁶Joma ne oneno gima ne otimore, ne onyiso ji kaka ng’at mane nigi jochiendeno osechango.

³⁷Bang’ mano, ji duto mane odak e piny jo-Gerasi nokwayo Yesu mondo oa e pinygi, nikech ne giluor ahinya. Kuom mano Yesu nodonjo e yie mondo oa.

³⁸To ng’at mane jochiende owuok kuomeno nohombe ni, “Yie mondo wadhi kodi.” To Yesu nokwere, kawachone ni,

³⁹“Dog dala, mondo inyis ji gik madongo ma Nyasaye osetimoni.” Kuom mano, ng’atno noa modhi owuotho e gweng’no duto, konyiso ji gik madongo mane Yesu otimone.

⁴⁰Kane Yesu oduogo loka machielo, ji mathoth norwake gi mor, nikech noyudo girite giduto.

⁴¹Eka ng’at moro ma nyinge Jairo, mane jaduong’ od lemo, nobiro kanyo. Nopodho piny e tiend Yesu, mi okwaye mondo odhi kode,

⁴²nikech nyare achiel kende ma jahigni apar gariyo ne tuo, ohewore. Kane Yesu oyudo dhiyo kuno, ji ne thung’e koni gi koni.

⁴³To dhako moro ne ni kanyo mane iye osechuer kuom higni apar gariyo. Kata obedo ni nosetieko mwandune duto kochulo jothieth, to onge kata achiel mane nyalo thiedhe.

⁴⁴Nosudo gi yoka ng’e Yesu, momulo riak lawe, kendo gi kanyono rembe nochok.

⁴⁵To Yesu nopenjo niya, “En ng’a momula?” To kane ji duto okwer, Petro nowachone ni, “Ruoth! Ok ineye kaka jogi oluori koni, gi koni, kendo othung’i?”

⁴⁶To Yesu nowachone niya, “Kata kamano, ang’eyo ni ng’ato osemula, nikech awinjo ka teko owuok kuoma.”

⁴⁷Kane dhakono oneno ni osefwenye, nobiro kokirni, mi opodho piny e tiend Yesu. Eka ne onyise, mana e nyim ji duto kanyo, gima ne omiyo omule, kendo kaka ne ochango mana gi kanyono.

⁴⁸Yesu nowachone niya, “Nyara, yieni ema omiyo ichango. Dhiyo gi kue.”

⁴⁹Kane pod Yesu wuoyo, jaote moro nobiro koa e od jaduong’ cha, mowacho niya, “Nyari osetho, omiyo koro kik ichand Japuonj.”

⁵⁰Yesu nowinjo kamano, mowacho ni jaduong’no niya, “Kik ibed maluor, to bed mana gi yie motegno. Nyari biro kwo.”

⁵¹Kane ochopo e odno, ne ok oyie ni ng’ato mondo odonj kode, mak mana Petro gi Johana kod Jakobo, kaachiel gi wuon nyathi kod min mare.

⁵²Ji duto mane ni kuno ne ywago nyathino malit, komako wigi, to Yesu nowachonigi niya, “Weuru ywak, nikech nyathi ok otho, to onindo aninda.”

⁵³To giduto ne ginyiere anyiera, nikech ne ging’eyo ni nyathi osetho.

⁵⁴To Yesu nomako lwet nyathino, mi owachone matek niya, “Nyako, a malo!”

⁵⁵Chunye nodwogo, mi oa malo mana gikanyono. Eka Yesu nowachonigi ni mondo gimiye chiemo ocham.

⁵⁶Jonywolne nohum nono, to Yesu nokwerogi ni kik ginyis ng’ato gima otimore.