Read luo Rapar mar Chik 10 Bible Online

Rapar mar Chik 10 - luo bible

Rapar mar Chik 10

¹“Ruoth Nyasaye nowachona niya, ‘Pa kite ariyo machal gi mane igoyo piny mobarore kande, mondo ibigo ira ewi got. Bende los sanduk mar bao.

²Weche mane andiko kuom kite mokwongo mane ibaro kande ema abiro ndiko kuom kitego, kendo iniketgi e sandugno.’

³Kuom mano, naloso sanduk gi yiend shita, kendo napayo kite ariyo machal gi mokwongo ka, mi adhi ewi got kating’o kite ariyogo e lweta.

⁴Ruoth Nyasaye nondiko kuom kitego chike apar mane osewachonu gie mach ewi got chieng’ chokruok, mana kaka nosendiko e kite mokwongo ka, mi nomiyagi.

⁵Eka nadwogo iru kaa ewi got, mi aketo kitego ei sanduk mane aloso, kaka Ruoth Nyasaye nochika, kendo gisebedo kanyo nyaka chil kawuono.

⁶ “Jo-Israel noa e gweng’ sokni mag jo-Jaakan, mi giwuotho matintin ka gidhi Mosera. Eka Harun notho, moyike kuno, mi Eleazar wuode, nodoko jadolo kare.

⁷Ne gia kuno, mi gidhi Gudgoda. Eka ne gia Gudgoda, mi gidhi Jotbatha, piny motimo aore.

⁸ “E kindego Ruoth Nyasaye nowalo jo dhood Lawi mondo obed joting’ Sandug Muma mare, kendo obed jodolo mage, ka giguedho ji e nyinge, mana kaka pod gitimo nyaka chil kawuono.

⁹Mano emomiyo jo-Lawi onge gi piny mopognigi ka mwandugi, kaka opog ni dhout Israel mamoko. Ruoth Nyasaye ma Nyasachu owuon e mwandugi, mana kaka nosesingorenigi.

¹⁰ “Nabet ewi got kuom ndalo piero ang’wen odiechieng’ gotieno, mana kaka nasetimo mokwongo, mi Ruoth Nyasaye nochako owinjo kwayona moyie ni ok obi tiekou.

¹¹Nowachona niya, ‘Chak wuoth kitelo ni ji, mondo gidhi gikaw piny mane asingora ni nami kweregi.’

¹²“Koro un jo-Israel, ang’o ma Ruoth Nyasaye ma Nyasachu dwaro kuomu? Donge odwaro mana ni mondo uluore kendo uwuoth e yorene duto, kuhere kendo kutiyone gi chunyu duto?

¹³Ubiro timo kamano kurito chikene gi buchene duto, ma amiyou kawuono mondo okonyu.

¹⁴Ruoth Nyasaye ma Nyasachu e wuon polo duto, kata polo man malo manadi, kaachiel gi piny bende kod gik moko duto manie iye.

¹⁵To kata kamano, Ruoth Nyasaye ne pod rito kwereu nikech noherogi, mi bang’gi noyiero mana un nyikwagi kuom ogendini moko duto mondo ubed joge, kaka pod ubet nyaka chil kawuono.

¹⁶Kuom mano, koro nyaka uyie mako singruok gi chunyu duto, kendo kik umed bedo joma tokgi tek,

¹⁷ nimar Ruoth Nyasaye ma Nyasachu en Nyasaye moloyo nyiseche duto, kendo Ruoth moloyo ruodhi duto. En Nyasaye maduong’ kendo malich miwuoro. En kende e Nyasaye miluoro, ma ok dew wang’ ng’ato, kendo ma ok cham asoya.

¹⁸To ong’ado bura kare ni mond liete, kendo ni nyithi kiye. Ohero jodak, kendo omiyogi chiemo gi lewni.

¹⁹Omiyo un bende onego uher jodak man kuomu, nimar un bende ne un jodak e piny Misri.

²⁰Nyaka uluor Ruoth Nyasaye ma Nyasachu, kendo ulame gi chunyu duto, bende kukuong’oru mana gi nyinge.

²¹En ema nyaka upake, nimar en Nyasachu mosetimonu timbe madongo kendo malich, ma useneno gi wang’u.

²² Kane kwereu odhi Misri, ne gin mana ji piero abiriyo kende, to koro Ruoth Nyasaye osemiyo unya ka sulue mae polo.