Read luo Rapar mar Chik 11 Bible Online

Rapar mar Chik 11 - luo bible

Rapar mar Chik 11

¹“Heruru Ruoth Nyasaye ma Nyasachu, kendo nyaka urit chikene gi buchene ndalo duto.

²Kawuono paruru puonj mane uyudo kuom Ruoth Nyasaye ma Nyasachu, nimar, kata obedo ni nyithindu pok oneno kata pok ong’eyo puonjno, un to ung’eye. Bende paruru duong’ mar Ruoth Nyasaye gi tekone kod bade morie,

³ gi ranyisi kod timbe mane otimo e piny Misri, kosandogo Farao kaachiel gi pinye duto.

⁴ Donge nuneno gima notimo gi jolwenj Misri gi faresegi kod gechegi? Kane oyudo gilawou, nomiyo pi Nam Makwar oimogi, motiekogi pep.

⁵Bende paruru gik mane otimonu e thim nyaka nuchopo kaeri,

⁶ kod gima notimo ni Dathan kod Abiram, yawuot Eliab ma ja-Reuben, kendo kaka piny nong’amo dhoge momwonyogi kaachiel gi joodgi gi hembegi kod ji duto mane gin-go, mana ka jo-Israel duto neno.

⁷Un uwegi useneno timbe madongo kendo malich ma Ruoth Nyasaye osetimo.

⁸“Nyaka urit chike duto ma amiyou kawuono, mondo ubed gi teko kendo ukaw piny ma ubiro donjeno.

⁹Kamano unudag aming’a e piny maber kendo momew mane Ruoth Nyasaye osingore ni nomi kwereu gi nyikwagi.

¹⁰Piny ma ubiro donjoe mondo udagieno ok chal gi piny Misri kuma ne uaye, nimar kuno kane usechwoyoe cham, to bang’e nusombo pi uole, mana kaka itimo ni puoth alot.

¹¹To piny ma udonjoe mondo udagieno en piny motimo gode gi holni, kendo en piny koth.

¹²Ruoth Nyasaye ma Nyasachu rito pinyno maber, kendo orange pile pile e higa ngima.

¹³ Omiyo kurito chike ma amiyou kawuonogi, mi uhero Ruoth Nyasaye ma Nyasachu, kendo utiyone gi chunyu duto,

¹⁴to enokelnu koth e ndalo chwiri gi ndalo opon, mondo uyud cham gi mzabibu kod mo.

¹⁵Enomi lum lodhi e legeu mondo jambu ocham, kendo un bende unuyud chiemo moromou.

¹⁶To ritreuru mondo kik ulal, mi uti ni nyiseche ma moko kendo ulamgi.

¹⁷Kutimo kamano, to mirimb Ruoth Nyasaye noliel kuomu ka mach, mi enomi koth rum. Piny ok nochieg cham, kendo karu nolal nono piyopiyo e piny momew ma Ruoth Nyasaye nomiuno.

¹⁸ Kanuru wechegi e chunyu, kutueyogi ka ranyisi e lwetu, kendo kuketogi e lend wengeu ka kido.

¹⁹Puonjuru nyithindu wechegi kendo twaguru kuomgi ka un e mier, kata kuwuotho e yo, kata kudhi nindo, kata kuchiew.

²⁰Ndikgiuru e sirni mag dhoutu, kendo kuom rangeyeu,

²¹mondo un gi nyithindu udag aming’a e piny ma Ruoth Nyasaye nosingore ni nomi kwereu obed maru nyaka chieng’.

²²“Ka urito chike ma amiyougi adimba, mi uhero Ruoth Nyasaye ma Nyasachu, kendo uwuotho e yorene duto, kuketo chunyu kuome,

²³to obiro riembonu ogendinigo mondo owenu thuolo, mi unukaw pinje mag ogendini madongo kendo marateke moloyou.

²⁴ Kamano kamoro amora ma tiendu onyono nobed maru, kendo mbap pinyu nochakre e thim yo milambo nyaka piny Lebanon yo nyandwat, kendo chakre aora Yufrate yo wuok chieng’ nyaka nam Mediterania yo podho chieng’.

²⁵Onge kata ng’ato achiel ma nonyal sirou, kendo Ruoth Nyasaye ma Nyasachu nomi ji luorou, mi kibaji nogogi kuonde duto mudhiye, mana kaka nosingorenu.

²⁶Kawuono aketo gueth kod kuong’ e nyimu.

²⁷Ka urito chike mag Ruoth Nyasaye ma Nyasachu ma amiyou kawuono, to ubiro yudo gueth.

²⁸To ka ok uritogi, mi ubaro kuweyo yo ma asechikou kawuono mondo uluw, mulamo nyiseche mamoko ma ok ung’eyo, to ubiro yudo kuong’.

²⁹ “Ka Ruoth Nyasaye ma Nyasachu oseterou e piny mudhiye mondo ukaw obed maru, to uhul weche gueth e got Gerizim, to weche mag kuong’ uhul e got Ebal.

³⁰Godego ni yo podho chieng’ mar aora Jordan, kama omanyore gi Gilgal, but yadh More, e yo mochiko piny jo-Kanaan.

³¹Koro uchiegni ng’ado aora Jordan mondo udonj e piny ma Ruoth Nyasaye ma Nyasachu miyou mondo ukaw obed maru. To ka usekawe, mudakie,

³²to nyaka une ni urito chike gi buche ma amiyou kawuononi.