Read luo Rapar mar Chik 13 Bible Online

Rapar mar Chik 13 - luo bible

Rapar mar Chik 13

¹“Ka jakor wach kata jalek moro ohonore e kindu, mokoro ni ranyisi kata hono moro biro timore,

²mi ranyisi kata hono mowuoyeno otimore, kendo bang’e owachonu ni mondo udhi uluw nyiseche mamoko ma ok ung’eyo, kendo ulam,

³to kik uwinj wachne. Ruoth Nyasaye ma Nyasachu temou mondo ong’e ane kuhere gi chunyu duto.

⁴Luwuru Ruoth Nyasaye ma Nyasachu kumiye duong’ kendo kurito chikene. Winjuru gima owacho, kendo lameuru kupadoru kuome.

⁵To nyaka neg jakor wachno kata jalekno, nimar osewuoyo marach kodwaro ni mondo utamru winjo wach Ruoth Nyasaye ma Nyasachu mane oresou, kagolou Misri, kama nubedoe wasumbni. Ng’atno osetemo witou mondo uwe yo mane Ruoith Nyasaye ma Nyasachu ochikou mondo uluw. Kunege kamano, eka unugol richo ma kama kuomu.

⁶“Ka owadu hie kata wuodi kata nyari kata chiegi mihero, kata mana osiepni migeno osemi ling’ling’ kawachoni ni mondo idhi ilam nyiseche mamoko ma in ok ing’eyo kata ma kwereni bende ne ok ong’eyo,

⁷ma gin nyiseche mag ogendini moluorou, bed ni gin mabor kata machiegni,

⁸to kik iyie, kata mana winjo wachne kik iwinji, nyaka inege anega mak iweye kata ikeche kata ichwake.

⁹In ema nyaka ikwong keto lweti kuome, eka bang’e jou duto nokonyi nege.

¹⁰Unugoye gi kite nyaka otho, nimar notemo hoyou mondo uwe Ruoth Nyasaye ma Nyasachu mane ogolou Misri kuma nubedoe wasumbni.

¹¹Jo-Israel duto nowinj wachno, mi ginidok, maluor, kendo gima rach makamano ok nochak otimre kuomu.

¹²“Kuwinjo ni joweteu ma acheje osehoyo joma odak e dala moro ma Ruoth Nyasaye ma Nyasachu biro miyou mondo udagie,

¹³ka giwachonigi ni mondo gidhi gilam nyiseche mamoko ma un ok ung’eyo,

¹⁴to nonuru wachno matut. Koyud ni gima kuero kamano osetimore kuomu adier,

¹⁵to nyaka uneg joma odak e dalano duto kaachiel gi dhok, kendo uketh chuth gik moko duto manie dalano.

¹⁶Nyaka uchok mwandu duto mag dalano kanyakla, kendo uket e laru manie dier dalano. Eka uwang’ dala duto, kaachioel gi gik moko duto manie iye ka misango miwang’o pep ni Ruoth Nyasaye ma Nyasachu. Dalano ok noger kendo, to nodong’ gunda nyaka chieng’.

¹⁷To kik ukaw gimoro kata achiel kuom gik monego keth chuthgo, eka mirima mager mar Ruoth Nyasaye norum, mi notimnu ng’wono kendo nomi unya kaka nosingore ni kwereu.

¹⁸Ruoth Nyasaye ma Nyasachu biro timo kamano kuwinjo dwonde, kendo urito chikene ma amiyou kawuono, kendo kutimo gik malongo e nyime.