Read luo Rapar mar Chik 14 Bible Online

Rapar mar Chik 14 - luo bible

Rapar mar Chik 14

¹ “Un e nyithind Ruoth Nyasaye ma Nyasachu, omiyo kik usar dendu kata kik uliel nyiem wengeu kuywago ng’at motho,

² nikech un joma ler mowal ni Ruoth Nyasaye ma Nyasachu. Ruoth Nyasaye noyierou kuom ogendini duto manie piny mondo ubed joge owuon.

³“Kik ucham gimoro makuero.

⁴To jamni gi le munyalo chamo e magi: Dhiang’ gi rombo gi diel

⁵gi nyakech gi ogunde gi ngawo gi diend thim gi puro gi omoro kod nyambaja.

⁶Unyalo chamo kit jamni gi kit le duto ma ombong’gi opogore ariyo, kendo ma nyamo kambula.

⁷To mak mana ni kik ucham mago ma nyamo kambula, to ombong’gi ok opogore ariyo, kata mago ma ombong’gi opogore ariyo to ok nyam kambula kaka ngamia gi apuoyo kod terere. Mago nyamo kambula to ombong’giu ok opogore, omiyo nyaka ukwan-gi ka gik makuero.

⁸Mbidhi bende kik ucham, nikech kata ombong’ne opogore kamano, to ok onyam kambula omiyo en gima kuero. Kik ucham lego kata mulogi kik umulgi ka gisetho.

⁹“Unyalo chamo rech duto man gi thuokgi kata man gi kagahla,

¹⁰to kik ucham rech moro amora maonge gi gigo, nimar ka en kamano to en gima kuero.

¹¹“Unyalo chamo winy duto ma ok kuero,

¹²to mago ma kuero ma kik ucham e magi: Ongo gi koga gi kwasi

¹³gi kalamindi gi okunekune gi otenga gi winy machal kamago,

¹⁴kod kit agak duto,

¹⁵gi udo gi nyatawo gi okok kod kit olith duto,

¹⁶gi tula matin gi tula maduong’ kod tula ma ite dongo,

¹⁷gi mbusi gi achuth gi osou

¹⁸kod nyamnaha gi kit ng’ang’a duto gi cherwa kod oliktik.

¹⁹Gik mahuyo mang’eny kanyakla gin gik makuero, omiyo kik uchamgi.

²⁰To unyalo chamo gik mahuyo ma ok kuero.

²¹ Kik ucham gima otho kende, nimar un joma ler mowal ni Ruoth Nyasaye ma Nyasachu. Gima kamano unyalo miyo jopinje mamoko modak kodu mondo ocham, kata unyalo ng’iewe gi jopinje mamoko. “Kutedo nyadiel, to kik uolie cha min mare.

²² “Higa ka higa nyaka uket tenge achiel kuom apar mag gik moko duto monyak e puotheu, kaka cham gi divai gi mo, kaachiel gi nyithind jambu duto mokwong nywol.

²³Chamgiuru e nyim Ruoth Nyasaye ma Nyasachu kama obiro yiero mondo nyinge obedie. Kamano ubiro puonjoru luoro Ruoth Nyasaye ma Nyasachu ndalo duto.

²⁴To ka Ruoth Nyasaye ma Nyasachu oseguedhou gii gik mang’eny, kendo ng’atu moro odak mabor gi kama Ruoth Nyasaye biro yierono, ma ok onyal ting’o gigo motundgo kuno,

²⁵to onyalo lokogo pesa, moter kuno.

²⁶Kosetundo kuno, to onyalo ng’iewo gima ohero gi pesago, bed ni en ring dhiang’ kata ring rombo, divai kata kong’o. Unuchiem kuno gi joodu kumor e nyim Ruoth Nyasaye ma Nyasachu.

²⁷To dhiuru gi jo-Lawi modak kodu, ni mar dhood Lawi ok opogne piny kaka opognu.

²⁸“To bang’ higni adek ka higni adek, keluru achiel kuom apar mag gik monyaknu e higano, kendo uket e dhorangeyeu,

²⁹mondo jo-Lawi ma onge gi piny mopognigi, kod jopinje mamoko, gi nyithindo ma kiye kod mond liete modak kodu oyud chiemo moromogi. Kutimo kamano, to Nyasaye noguedh gik moko duto mutimo.