Read luo Rapar mar Chik 15 Bible Online

Rapar mar Chik 15 - luo bible

Rapar mar Chik 15

¹“Bang’ higni abiriyo ka higni abiriyo nyaka uwe gopeu duto ma ji nigo.

²Unuwegi kama: Ng’ato ka ng’ato nyaka we gope ma ja-Israel owadgi oseholo kuome. Ok nochune mondo ochul, nikech higa ma Ruoth Nyasaye oketo mondo oweyee gope osechopo.

³Jo pinje mamoko to unyalo chuno mondo ochul gope ma gin-go, to gopeu ma jo-Israel weteu nigo nyaka uwenigi.

⁴To kuluoro Ruoth Nyasaye ma Nyasachu kendo urito chikene ma amiyougi, to jochan ok nobedie kuomu, e piny ma omiyou mondo obed mwanduu, to Ruoth Nyasaye ma Nyasachu noguedhu ahinya.

⁶Ka Ruoth Nyasaye ma Nyasachu oseguedhou kaka nosingore ni notim, ji moa e pinje mang’eny biro holo gik moko kuomu, to un ok nuhol gimoro kuomgi. Pinje mang’eny nobed e bwo lochu, to un ok nubed e bwo lochgi.

⁷ “Kapo ni nitie jo-Israel weteu moko ma jochan e dalau moro e piny ma Ruoth Nyasaye ma Nyasachu biro miyou, to kik iu bed makwar, mutamru konyogi,

⁸to ubednigi mang’won, mi uholgi gimoro amora ma gichando.

⁹Kata dabed ni higa mar abiriyo miweyoe gope chiegni chopo, to kik ubed gi ich lit, mutamru miyogi gimoro. Jogo diywag ni Ruoth Nyasaye, mi dubed joricho.

¹⁰Nyaka umigi gik ma gidwarogo mabup, kendo gi chuny maler. Kutimo kamano to Ruoth Nyasaye biro guedhou kuom gik moko duto mutimo.

¹¹ Pile ubiro bedo gi jochan e pinyu, mano emomiyo achikou ni mondo ubed mang’won ni jo-Israel weteu ma jochan kata manie chandruok.

¹² “Ka ing’iewo ja-Hibrania wadu ma dichwo kata ma dhako mondo obed misumbani, enotini kuom higni auchiel, to e higa mar abiriyo nyaka iweye odhi.

¹³To kik iweye odhi gi lwete nono,

¹⁴mak ikowe mabup gi jamni kod cham gi divai. Bed ne mang’won, mana kaka Ruoth Nyasaye ma Nyasachu osebedoni mang’won.

¹⁵Paruru ni ne un wasumbni e piny Misri, to Ruoth Nyasaye ma Nyasachu noresou. Mano emomiyo amiyou chikni.

¹⁶To ka misumbanino ohero dak kodi, mi owacho ni ok odwar weyo dalani, nikech oheri kaachiel gi joodi,

¹⁷to ikaw riw, ituchgo ite, kitenoe dhoot, eka nobed misumbani kuom ngimane duto. Chikno oriwo koda ka misumba ma dhako bende.

¹⁸“To kapo ni iweyo ni misumba thuolo odhi, to onge gima inyalo ywago, nimar ka dine indiko jatich, to dine ichulo msara nyadiriyo moloyo ting’ mane ikawo kirito misumbano. Kamano Ruoth Nyasaye ma Nyasachu noguedh gik moko duto mitimo.

¹⁹ “Waluru kach jambu machwo duto ni Ruoth Nyasaye ma Nyasachu. Kik uket ruedhi ma jou okuongo nywolo e tich, bende kik ung’ad yie imbe ma rombu okuongo nywolo,

²⁰to giga ka giga nyaka utergi kuma Ruoth Nyasaye ma Nyasachu biro yiero, mondo uchamgi kaachiel gi jouteu e nyim Ruoth Nyasaye kuno.

²¹To ka chiayo moro nigi songa, kata ka osuto, kata ka en muofu kata ka en gi mbala moro marach manade, to kik timgo misango ni Ruoth Nyasaye ma Nyasachu.

²²Unyalo chame e miechu. Joma ogak kaachiel gi joma ok ogak nyalo chamo ring’ono mana ka gima en ring ogunde kata ring mwanda.

²³ Remo to kik ucham, to oleuru piny mana ka pi.