Read luo Rapar mar Chik 16 Bible Online

Rapar mar Chik 16 - luo bible

Rapar mar Chik 16

¹ “Nyaka utim Sap Pasaka e due mar Abib, nimar dueno ema ne Ruoth Nyasaye ma Nyasachu ogolou e Misri gotieno.

²Nyaka uneg nyarombo kata nyadiel kata nyaroya kutimogo misango mar Pasaka ni Ruoth Nyasaye ma Nyasachu, kama obiro yiero mondo nyinge obedie.

³Kik ucham sawono gi makati moketie thowi, to kuom ndalo abiriyo unucham mana makati ma ok ketie thowi, ma en ranyisi mar sandruoku, nikech nuwuok Misri kurikni. Mano nobednu rapar mochwere muparogo chieng’ mane uwuokie Misri.

⁴Kik ubed gi thowi kamoro amora e pinyu kuom ndalo abiriyogo, to bende ring chiayo muyang’o godhiambo e odiechieng’ mokwongo mar sawo kik nind nyaka okinyi mak uwang’o pep.

⁵Kik uyang’ jamni mag Pasaka e mier ma Ruoth Nyasaye ma Nyasachu dwaro miyou,

⁶to mak mana kama obiro yiero mondo nyinge obedie. Nyaka uyang’gi godhiambo ka chieng’ podho, e sa mane uwuokie Misri.

⁷Nyaka uted ringgi kendo ucham kama Ruoth Nyasaye ma Nyasachu biro yiero, to kinyne nyaka udog e miechu.

⁸Chamuru makati ma ok ketie thowi kuom ndalo auchiel, to chieng’ mar abiriyo nyaka ubed gi chokruok kaka Ruoth Nyasaye ma Nyasachu dwaro, kendo kik uti tich moro amora chieng’no.

⁹ “Kwanuru jumbe abiriyo, chakre ndalo michako kayoe cham.

¹⁰Bang’ jumbego nyaka utim Sap Jumbe kaka Ruoth Nyasaye ma Nyasachu dwaro kukelo chiwo ma ng’ato golo kuom dwarone, maromre gi gueth ma Ruoth Nyasaye ma Nyasachu guedhougo.

¹¹Un kaachiel gi yawuotu kod nyiu, gi wasumbu machwo kod mamon, gi jo-Lawi modak e miechu gi jopinje mamoko gi nyithindo ma kiye kod mond liete modak kodu, nubed mamor e nyim Ruoth Nyasaye ma Nyasachu, kama obiro yiero mondo nyinge obedie.

¹²Paruru ni ne un wasumbni e piny Misri. Mano emomiyo nyaka une ni urito chikego.

¹³ “Kusetieko kayo ngano kendo pono mzabibu, to nyaka utim Sap Kiche kuom ndalo abiriyo.

¹⁴Unutim sawono gi mor, kaachiel gi yawuotu gi nyiu kod wasumbu machwo gi mamon gi jo-Lawi kod jopinje mamoko gi nyithi kiye kod mond liete modak kodu.

¹⁵Nyaka utime ni Ruoth Nyasaye ma Nyasachu kaka obiro yiero, nimar unubed mamor ka Ruoth Nyasaye ma Nyasachu oguedho gik monyak e puotheu kod gik moko duto mutimo.

¹⁶“Jou machwo duto nyaka bi e nyim Ruoth Nyasaye didek e higa ka higa, mondo otim sewni adekgo kama Ruoth Nyasaye biro yiero. Gin Sap Makati ma ok ketie Thowi, gi Sap Jumbe, kod Sap Kiche. Onge ng’at ma nobi e nyim Nyasaye gi lwete nono.

¹⁷To ng’ato ka ng’ato nyaka kel gima romre gi gueth ma Ruoth Nyasaye ma Nyasachu oseguedhego.

¹⁸“Unuyier jang’ad bura kod jotend dhoutu e mier duto ma Ruoth Nyasaye ma Nyasachu biro miyou, kendo nyaka ging’ad ni ji bura kare.

¹⁹ Kik ung’ad buch amwor kata buch nyakonchiel, to bende kik ucham asoya, nimar asoya mono kata mana ng’at mariek wacho adiera, kendo wito buch ng’at ma onge ketho.

²⁰Nyaka une ni uluwo mana adiera kende. Kutimo kamano, to unudag aming’a e piny ma Ruoth Nyasaye ma Nyasachu biro miyou.

²¹ “Kik upidh yath moro amora milamo but kendo-mar-misango, mubiro gero ni Ruoth Nyasaye ma Nyasachu,

²² kata kik uchung siro milamo, nimar gin gik ma Ruoth Nyasaye ma Nyasachu ok dwar.