Read luo Rapar mar Chik 17 Bible Online

Rapar mar Chik 17 - luo bible

Rapar mar Chik 17

¹“Kik utim misango ni Ruothn Nyasachu gi rwath kata rombo kata diel man gi mbala kata songa, nikech gima kamano en kuero e nyim Ruoth Nyasaye.

²“Kapo ni unwang’o ng’at ma dichwo e dala moro amora ma Ruoth Nyasaye ma Nyasachu biro miyou, kotimo gima rach e nyim Ruoth Nyasaye, mi oketho singruok kendo odagi chikna,

³ kolamo kendo okulore ni nyiseche mamoko, kata ni wang’chieng kata ni due kata ni gimoro amora manie kor polo,

⁴to nyaka unon wachno maber. Ka ofweny malong’o ni gima rach kamano osetimore adier e Israel,

⁵to nyaka ukel ng’at motimo kamano e dhoranga dala, mi ugoye gi kite nyaka otho, kata da bed ni en dhako kata en dichwo.

⁶ Kik ung’ad ni ng’ato buch tho ka nitie mana janeno achiel kende, to unyalo ng’adone buch tho mana ka nitie joneno ariyo kata adek.

⁷ Joneno ema nyaka kwong goyo ng’at ma kamano gi kite, eka ji duto bende nogoye. Kamano e kaka unupwodhru kuom richo ma kamano.

⁸“Kapo ni unwang’o buche matek ma ok unyal ng’ado, to nyaka udhi piyopiyo kama Ruoth Nyasaye ma Nyasachu biro yiero. Buchego nyalo bet mag nek, kata mag laro gimoro kata mag gorruok.

⁹Unudhi ir jodolo ma jo-Lawi man kuno, kendo ir jang’ad bura muyudo ka nie tich kuno, mondo unyisgi wachno, kendo gin ema gining’ad bura.

¹⁰Gima giwachonu kama Ruoth Nyasaye biro yierono ema nyaka utim.

¹¹Nyaka une ni utimo mana kaka giwachonu, ma ok uweyo kata matin.

¹²Ng’ato ang’ata modagi wach jadolo matiyo ni Ruoth Nyasaye ma Nyasachu kanyo, kata modagi wach jang’ad bura, nyaka negi. Kamano e kaka unupwodh jo-Israel kuom richo ma kamano.

¹³Kutimo kamano, to ji duto nowinj wachno, mi ginibed maluor, kendo onge ng’at ma nochak otim wichteko.

¹⁴ “Ka usedonjo e piny ma Ruoth Nyasaye ma Nyasachu biro miyou mondo ukaw, udagie, mi uparo ni mondo uket ruoth oritu kaka ogendini duto moluorou timo,

¹⁵to nyaka uket mana ng’at ma Ruoth Nyasaye ma Nyasachu noyiernu. Ng’at ma uketo ruothno nyaka bed mana ja-Israel wadu, to kik uket ng’at ma ok ja-Israel.

¹⁶ Kik ruodhno bed gi farese mang’eny, to bende kik oor jo-Israel Misri mondo oomne farese moko ni eka omed bedo gi farese mang’eny, nimar Ruoth Nyasaye nokwerou ni kik udog kuno kendo ngang.

¹⁷ Kik obed gi mon mathoth, nikech mano dipo koketho parone, to mwandu bende kik obedgo mang’eny.

¹⁸Kosekete ruoth, to nyaka ondik weche duto mag chik, kogologi e kitap chik ma jadolo ma jo-Lawi nigo.

¹⁹Nyaka obed gi kitabuno, kendo nyaka osome pile e ndalo duto mag ngimane, mondo opuonjrego luoro Ruoth Nyasaye ma Nyasache, korito chike gi buchego duto.

²⁰Kotimo kamano, to ok nosungre ni jowadgi, kendo ok nowe mak orito chikego kata matin. Bang’e en kaachiel gi nyikwaye ginibed ruodhi mag Israel aming’a.