Read luo Rapar mar Chik 18 Bible Online

Rapar mar Chik 18 - luo bible

Rapar mar Chik 18

¹“Jodolo ma jo-Lawi, tiende ni dhood Lawi duto, ok noyud pinygi giwegi kaka dhout Israel mamoko. Ginibed ka giyudo pokgi mana kuom misengni motim ni Ruoth Nyasaye, kendo kuom dir mwandu muchiwo ni Ruoth Nyasaye.

² Kaka ok giniyud piny mopognigi ka mwandugi, Ruoth Nyasaye owuon ema nobed mwandugi kaka nosingore.

³Ka ji timo misango gi rwath kata gi rombo kata gi diel, to nyaka gimi jadolo bat gi lem duto kod chino kaka lembgi.

⁴Bende nyaka umigi cham mukwongo kayo gi divai mukwongo loso, gi mor zeituni mokwongo nyak, kaachiel gi yie rombu mukwongo ng’ado,

⁵nimar Ruoth Nyasaye ma Nyasachu oseyierogi kuom dhoutu duto mondo gin kaachiel gi nyikwagi giti e nying Ruoth Nyasaye nyaka chieng’.

⁶“Ka ja-Lawi moro modak e achiel kuom miech Israel obiro kuom herone kama Ruoth Nyasaye biro yiero,

⁷mi otiyo tich dolo e nying Ruoth Nyasaye ma Nyasache kaka jo-Lawi wetene ma tiyo e nyim Ruoth Nyasaye kanyo,

⁸to nyaka oyud pok maromre kodgi, ka ok okwan mwandu monego ocham e dala wuon mare.

⁹“Kusedonjo e piny ma Ruoth Nyasaye ma Nyasachu biro miyou, to kik upuonjru luwo timbe makuero mag ogendini mamoko modak e pinyno.

¹⁰ Kik uyie ni ng’ato kuomu wang’ wuode kata nyare ka gir misango. Bende kik bedie jakor kata jambofwa kata jadil kata jandagla

¹¹ kata ajuok nyakalondo kata japenj jochiende wach.

¹²Joma kamago Ruoth Nyasaye okwedo, kendo timbegi makuerogo ema omiyo Ruoth Nyasaye ma Nyasachu riembo ogendinigo mondo owenu thuolo.

¹³ Ruoth Nyasaye ma Nyasachu dwaro mondo utine gi chunyu duto.

¹⁴“Ogendini ma ubiro kawo pinygigo oyie gi weche jombofwa kod weche jokor, to un, Ruoth Nyasaye ma Nyasachu okwerou ni kik utim gik ma kamago.

¹⁵ Ruoth Nyasaye ma Nyasachu noyier janabi moro ka an kuom jou uwegi, kendo nyaka uwinj wachne.

¹⁶Mano e gima nukwayo Ruoth Nyasaye ma Nyasachu chieng’ mane uchokore Horeb, kuwacho niya, ‘Owinjore kik wachak wawinj duond Ruoth Nyasaye ma Nyasachwa, bende ok onego wachak wane mach maduong’ kama kendo, nono to wabiro tho.’

¹⁷Eka Ruoth Nyasaye nowachona niya, ‘Gima giwachono ni kare.

¹⁸Abiro yieronigi janabi kaka in, kuom ogandagi giwegi. Abiro keto wechena e dhoge, kendo enowachnigi weche duto ma achike.

¹⁹ Ng’ato ang’ata modagi winjo wachna ma janabino wacho, to noyal.

²⁰To janabi ma nohedhre wacho wach moro e nyinga ma ok achike ni mondo owachi, kata ma nowuo e nying nyiseche mamoko, nyaka negi.’

²¹To ma e kaka unyalo ng’eyo wach ma ok oa kuom Ruoth Nyasaye:

²²Ka janabi owacho wach moro e nying Ruoth Nyasaye to bang’e wachno ok ochopo kare, mano nyiso ni ok en wach Ruoth Nyasaye, to osewuoyo mana gi tekone owuon. Omiyo kik umiye duong’.