Read luo Rapar mar Chik 19 Bible Online

Rapar mar Chik 19 - luo bible

Rapar mar Chik 19

¹ “Ka Ruoth Nyasaye ma Nyasachu osetieko ogendini ma obiro miyou pinygi, udakie,

²to unuyier mier adek manie pinyno.

³Poguru pinyno didek, kendo ulosie yore mondo ka ng’ato onego wadgi, to nyalo luwo kadhi tony e achiel kuom miego.

⁴Ng’at moboth monego wadgi ma ok gimonrego ema nyalo ringo dhi kuno mondo ores ngimane.

⁵Ranyisi mar nek moboth kamano chal kama: Ng’ato nyalo dhi e bungu gi wadgi mondo otong’ yien, to ka onyigore gi le kong’udo, mi wi le obwodhore oa e loge mogoyo wadgino monego, to ng’atno nyalo ringo dhi e achiel kuom miego mondo ores ngimane.

⁶Ka ok uloso yorego, kata ka miego bor gi kar nek, to ng’at ma dwaro chulo kuor dipo kolawo janek ka pod mirimbe liet, mi ojuke, kendo onege. To chutho, janekno ok owinjore negi, nikech ne ok gimonre gi wadgi mane onegono.

⁷Mano emomiyo achikou mondo uyier mier adek.

⁸“To kapo ni Ruoth Nyasaye ma Nyasachu oyaro pinyu, mi omiyou piny duto mane osingore ni kwereu ni nomiu,

⁹to nyaka umed yiero mier moko adek kuom mago. Adier enomiu pinyno, kuketo chunyu kuom rito chik ma amiyou kawuononi, mi uhero Ruoth Nyasaye ma Nyasachu kuwuotho e yorene pile.

¹⁰Kuyiero miego, to remb joma onge ketho ok nochuer e piny ma Ruoth Nyasaye ma Nyasachu biro miyou obed mwanduu, kendo richo mar chuero remo ok nobed kuomu.

¹¹“To ka nga’to nigi sigu gi wadgi, mi obutone, eka opoye, kendo ogoye motho, mi bang’e oringo odhi e achiel kuom miego,

¹²jodong dalagi nyaka or ji moko mondo oome, mi kete e lwet owadgi jal monegono, mondo onege ka chulonego kuor.

¹³Kik ukeche, nyaka ugol ketho mar chuero remb ng’at ma ok oketho oko kuom piny Israel. Kamano unudag maber.

¹⁴ “Ka udak e lowo mubiro yudo e piny ma Ruoth Nyasaye ma Nyasacu dwaro miyou, to kik ng’ato kuomu gol kidi ma kwereu noketo manyiso kiepe gi wadgi.

¹⁵ “Wach janeno achiel kende ok nyal mi ng’ad ni ng’ato bura kuom ketho moro, kata kuom richo moro, to wach nyaka ng’ere malong’o e nyim joneno ariyo kata adek.

¹⁶Ka ng’ato obedo janeno mar miriambo mana ni mondo ohiny wadgi kuom ketho moro,

¹⁷ji ariyogo nyaka chung’ e nyim Ruoth Nyasaye kendo e nyim jodolo gi jong’ad bura.

¹⁸Jong’ad bura nyaka non wachno matut, to ka giyudo ni janenono hango ni wadgi wach,

¹⁹to nyaka utimne mana kaka odwaro timo ni wadgino. Mano e kaka unupwodhru kuom richo ma kamano.

²⁰Bang’e jou moko duto nowinj wachno, mi ginidok maluor, kendo gima rach ma kamano ok nochak otimre kuomu.

²¹ Kik ukech jaketho. Ngima nyaka chul kar ngima, wang’ kar wang’, lak kar lak, lwedo kar lwedo, kendo tielo kar tielo.