Read luo Rapar mar Chik 2 Bible Online

Rapar mar Chik 2 - luo bible

Rapar mar Chik 2

¹ “Bang’e ne wamako yo mang’ado thim, kwachomo Nam Makwar, kaka Ruoth Nyasaye nochikowa, kendo ne wadigni e piny gode mag Seir kuom ndalo mang’eny,

²nyaka Ruoth Nyasaye nokona niya,

³‘Usebedu kudigni e piny godegi moromo, omiyo koro wichreuru uchom yo nyandwat.

⁴ To wach ni ji kama: “Bang’ kinde manok ubiro ng’ado e piny joweteu ma nyikwa Esau modak Seri.

⁵Ginibed maluor ka ginenou, to un nyaka une ni ok ukwinyogi, nikech ok namiu pinygi kata matin nono, nimar piny gode mag Seir asemiyo Esau ka mwandune.

⁶Unyalo yudo chiemo gi pi kuomgi, to nyaka uchul,

⁷nimar Ruoth Nyasaye ma Nyasachu oseguedhou kuom gik moko duto ma usetimo. Oseritou ka uwuotho e thim malichni. Kuom higni piero ang’wen-gi duto Ruoth Nyasaye ma Nyasachu osebedo kodu, kendo onge gima usechando.” ’

⁸Kamano ne wakadho, mi waweyo jowetewa ma nyikwa Esau modak Seir, kendo ne waweyo yo mochomo Elath gi Ezion-geber, mi ne wawichore mwamako yo mochiko thim Moab.

⁹ “Eka Ruoth Nyasaye nowachona niya, ‘Kik umonj jo-Moab, kendo kik ukwinygi nikech ok namiu pinygi kata matin mondo obed mwanduu, nimar asechiwo dala mar Ar ni nyikwa Lut mondo obed mwandugi.’

¹⁰(Jo-Emim mane oganda maratego ahinya, kendo mane nigi ji mang’eny nosedak kuno e kinde moko. Ne gin joma raboche mana ka jo-Anakim.

¹¹Ji ne luongogi ni jo-Refaim, mana kaka niluongo jo-Anakim, to jo-Moab ne luongogi ni jo-Emim.

¹²Mokwongo jo-Hori nodak Seir to nyikwa Esau notiekogi, mokawo pinygi kendo odakie, mana kaka jo-Israel notimo e piny mane Ruoth Nyasaye omiyogi mondo obed mwandugi.)

¹³“Ruoth Nyasaye nodhi nyime kowachona niya, ‘Wuothuru mondo ung’ad holo mar Zere.’ Mi ne wang’ado.

¹⁴ Ne wasetieko higni piero adek gaboro chakre kinde mane wawuokie Kadesh-barnea, nyaka wang’ado holo mar Zered. E kindeno tieng’ mar jolweny ne koro osetho duto, mana kaka Ruoth Nyasaye nosekuong’ore.

¹⁵Ruoth Nyasaye ema nokelonigi masira, motiekogi pep, ma onge kata ng’atgi achiel mane odong’ e kambi.

¹⁶“Kane jolwenygo duto osetho te,

¹⁷Ruoth Nyasaye nowachona niya,

¹⁸‘Kawuono ubiro ng’ado tong’ mar Moab e dala mar Ar,

¹⁹ kendo kuchopo e piny jo-Moab, to kik ukwinygi kata kik umonjgi, nikech ok namiu pinygi mondo obed mwanduu, nimar asechiwe ni nyikwa Lut.’

²⁰(Pinyno bende ikwano ka piny jo-Refaim. Jo-Refaim nosedak kuno mokwongo, to jo-Amon ne lwongogi ni jo-Zamzumim.

²¹Ne gin oganda maratego ahinya, kendo mane nigi ji mang’eny. Ne gin joma raboche mana ka jo-Anakim, to Ruoth Nyasaye notiekogi, kane gitemo geng’o ni jo-Amon mane monjogi, mi jo-Amon nokawo pinygi mi odakie.

²²Mano notimore mana kaka Ruoth Nyasaye notimo ni jo-Hori mane otemo geng’o ni nyikwa Esau mane odak Seir. Notieko jo-Horigo mi nyikwa Esau nokawo pinygi kendo pod gidakie nyaka chil kawuono.

²³To jo-Avim mane odak e mier matindo but Gaza, jo-Kaftor ema notieko, mokawo pinygi, modakie.)

²⁴“Eka Ruoth Nyasaye nodhi nyime, kowachone niya, ‘Wuothuru mondo ung’ad holo mar Arnon, nimar asechiwo Sihon ja-Amor ma ruodh Heshbon e lwetu kaachiel gi pinye. Koro donjuru e pinye mondo uked kode.

²⁵Chakre kawuono abiro miyo ogendni duto ma e piny ngima luorou ahinya, ma kata ka giwinjo mana humbu, to gibiro kirni ka kihondko omakogi.’

²⁶“Omiyo kane pod wan e thim Kedemoth, naoro joote ir Sihon ruodh Heshbon kakwaye gi ng’wono niya,

²⁷‘Yie mondo wakadh e pinyi. Wabiro luwo mana yo tir ma ok wabaro korachwich kata koracham.

²⁸Bende wabiro ng’iewo kuomu chiemo mwachamo kod pi mwamodho.

²⁹Omiyo yienwa mondo wakadhi mana kaka nyikwa Esau modak Seir kod jo-Moab modak Ar ne jo yienwa, mwakadho. Bang’ mano, wanyalo ng’ado Jordan mondo wadonj e piny ma Ruoth Nyasaye ma Nyasachwa miyowa.’

³⁰To kata kamano, Sihon ruodh Heshbon nodagi miyowa thuolo mondo wakadhi, nimar Ruoth Nyasaye ma Nyasachu nomiyo toke odoko matek mondo ochiwe kaachiel gi pinye e lwetu, kendo uneno ka pinyno pod marwa nyaka chil kawuono.

³¹Kuom mano Ruoth Nyasaye nowachona niya, ‘Biuru, nikech koro adwaro chiwo Sihon kaachiel gi pinye e lwetu. Monjeuru, mondo ukaw pinye.’

³²Kamano Sihon gi joge nowuok morado kodwa Jahaz.

³³To Ruoth Nyasaye ma Nyasachwa nochiwe e lwetwa, mi wanege kaachiel gi yawuote kod joge duto.

³⁴Kinde nogono bende ema ne wakawoe mier mage duto, mwaketho chuth, kendo wanego ji duto mane odakie, chwo gi mon kod nyithindo. Onge ng’ato kata achiel mane waweyo ka ngima.

³⁵Jamni kaachiel gi gik mane wayako e mier mane waloyo kende emane wakawo.

³⁶Onge dala mane nyalo sirowa, chakre Aroer e dho holo mar Arnon, kod dala man e holo hie, nyaka chop Gilead. Adier Ruoth Nyasaye ma Nyasachwa ema nochiwo gik moko duto e lwetwa.

³⁷To kata kamano, nomako chik Ruoth Nyasaye ma Nyasachwa gi chunyu duto mi ok umonjo piny jo-Amon ji yo ka holo mar Jabok, kata mana gi yo ka miechgi manie gode.